Yobe 7 - Mukanda wa Nzambi Dihungila Dikulukulu ne Dihungila Dihia-dihia 2003

Yobo Udi Ukonka Nzambi

¹ Muntu kena ne tshikondo tshia kuenzeye mudimu mukole hanshi ha buloba, anyi? Matuku andi kaena bu a muena mudimu wa difutu, anyi?

² Bu mudi muhika ujinga mundidimbi wa dihueka dia diba, bu mudi muena mudimu wa difutu windila difutu diandi,

³ nunku badi bampesha ngondo idi anu ne malu a hatuhu, badi bakunguila mafuku adi ne ntatu.

⁴ Hanalala hanshi, ndi ndikonka ne, Nembike diba kai, nsangana butuku bumane kutshia? Ndi nsumpakana eku ne eku tô ne hatshia butuku.

⁵ Bikusu ne mabuwa a buloba bidi hamʼbidi hanyi bonso; dikoba dianyi didi dihandika, dihatuka mai.

⁶ Matuku anyi adi ahita mundongo wa mukumi wa bilulu kuenda lubilu, adi afika kunshikidilu kuau tshiyi ne ditekemena.

⁷ Nzambi, uvuluke biebe ne muoyo wanyi udi anu muhuya, disu dianyi kadiena dimona diakalengele kabidi

⁸ Disu dia udi untangila kadiena dintangila kabidi, mesu ebe neikale kundi, meme tshitshiyihu.

⁹ Bu mudi ditutu ditangadika ne dijimina, nunku muntu wahueka mu Muaba wa Bafue kena uhingana kabidi,

¹⁰ kena uhingana kabidi mu nsubu muandi, ba ku muaba wakadiye ushikama diambedi kabena bamumona kabidi.

¹¹ Meme kabidi tshiena mbuikila mukana muanyi; nengambe di ne kanyinganyinga ka mutshima wanyi; nentontolole bua ntatu ya mu muoyo wanyi.

¹² Ndi mai manene anyi nyama wa mu mai manene bua wewe udi uteka mutentekedi bua kuntentekela, anyi?

¹³ Hangamba bianyi ne, Bulalu buanyi nebunsambe, ditanda dianyi dia kulala nediholeshe meji adi annyingalasha;

¹⁴ wewe udi untshinyisha ne bilota, udi unkuatshisha buowa bukole ne bikena kumona.

¹⁵ Nunku mutshima wanyi udi utamba kusungula bua kunfiekelabo mu nshingu; ndi nsungula lufu ku mpala kua makenga anyi.

¹⁶ Muoyo wanyi udi untonda! Tshiena musue kuikala ne muoyo tshiendelele. Undekele, bualu bua matuku anyi adi anu bu muhuya.

¹⁷ Muntu udi tshinyi, bua wewe udi umutumbisha, ne bua wewe udi uteka mutshima webe kudiye;

¹⁸ bua wewe udi ulua kumutangila ku dinda ku dinda, ne udi umuteta meba onso?

¹⁹ Musangu neulehe bule munyi wewe kuyi muanji kumusha mesu ebe kundi? Neundekele musangu bule munyi bua meme kumina mate anyi?

²⁰ Bingikala muenze bibi, ndi mua kukuenzela tshinyi, wewe, mulami wa bantu? Bualu kai wewe wakunteka bu tshimanyinu tshia kuasaku mikete yebe, tô ne hakalua bualu ebu bujitu kundi?

²¹ Wewe kuena umbuikidila bubi buanyi, kuena ungumusha malu mabi anyi bua tshinyi? Bualu bua mpindiu nendale hanshi mu dinfuenkenya, ne wewe neunkebe ne disuminyina, kadi tshiena ngikalaku.