Yobe 1 - Mukanda wa Nzambi Dihungila Dikulukulu ne Dihungila Dihia-dihia 2003

Makenga a Yobo

¹ Muntu wakadiku mu buloba bua Usa, dina diandi Yobo. Wakadi muntu wa mutshima mutoke ne wa malu makane, wakatshina Nzambi, wakehuka ku malu mabi.

² Bakamulelela bana ba balume muanda mutekete ne bana ba bakashi basatu.

³ Bimuna biandi biakadi mikoko binunu muanda mutekete ne tumelo binunu bisatu, ngombe ibidi ibidi ku bikokedi nkama itanu, bakashi ba nyama ya mpunda nkama itanu. Wakadi ne bantu ba bungi mu nsubu muandi kabidi. Nunku muntu eu wakahita bantu bonso ba ku luseke lua Esete buneme.

⁴ Bana bandi ba balume bakadi ne tshilele tshia kulambishilangana bia kudia mu nsubu yabo, muntu ne muntu dituku diandi; bakadi batuma dî bua kubikila bana ba bakashi basatu bua kudia nʼabo, kunua nʼabo.

⁵ Hakashika matuku a kudia bidia kudi muntu ne muntu nunku, Yobo wakadi ubabikila kudiye, ubajidila. Wakabika ne dinda dionso, wakafila milambu ya kuosha bu muakadi bungi buabo bonso. Bualu bua Yobo wakamba ne, Bumue bana banyi ba balume bakuenza malu mabi, bakuhenda Nzambi mu mitshima yabo. Yobo wakadi wenza nunku misangu yonso.

⁶ Dituku dikuabo hakadisangisha bana balume ba Nzambi ku mesu kua Yehowa, Satana kabidi wakamueneka munkatshi muabo,

⁷ Yehowa wakakonka Satana ne, Udi ufuma kudi kunyi? Satana wakakudimuna Yehowa dî ne, Ndi nfuma ha buloba, nakadi ntambakana, ngendakana eku ne eku.

⁸ Yehowa wakakonka Satana ne, Wakumona muntu wanyi Yobo, anyi? Kakuena muntu mukuabo bu yeye ha buloba; bu mudiye muntu wa mutshima mutoke ne wa malu makane, udi utshina Nzambi ne udi wehuka ku malu mabi.

⁹ Satana wakandamuna Yehowa, wakamukonka ne, Yobo udi utshina Nzambi hatuhu, anyi?

¹⁰ Wewe kuakumunyunguluka ne nsubu wandi ne bintu biandi bionso ne bulami buebe, anyi? Wewe wakuvudishila mudimu wa bianza biandi disanka, ne bimuna biandi biakuvulangana ha buloba.

¹¹ Kadi mpindiu olola tshianza tshiebe, lenga bintu bionso bidiye nʼabi, ne yeye neakudiule ku mesu kuebe.

¹² Nunku Yehowa wakambila Satana ne, Mona, bintu bionso bidiye nʼabi bidi mu bianza biebe; kadi kumulengi tshianza tshiebe. Nunku Satana wakaluhuka ku mesu kua Yehowa.

¹³ Dituku dikuabo hakadi bana bandi ba balume ne bana bandi ba bakashi badia bidia ne banua nvinyo mu nsubu wa mukulu wabo,

¹⁴ messager wakalua kudi Yobo, wamba ne, Bakadi badima mu madimi ne lukasu lukoka kudi ngombe, ne nyama ya mpunda yakadi idia mashinde ha buihi nʼai.

¹⁵ Bena Seba bakabikuata, bakaya nʼabi; bakashiha bansongalume bakadi bayilama ku muele wa nvita. Anu meme nkayanyi nakuhanduka bua kukuambila.

¹⁶ Hakatshidiye wakula, mukuabo wakalua, wakamba ne, Kahia kafuma kudi Nzambi kakatuluka mu diulu, kakosha mikoko ne bansongalume bakadi bayilama, kakabishidisha. Anu meme nkayanyi nakuhanduka bua kukuambila.

¹⁷ Hakatshidiye wakula, mukuabo wakalua, wakamba ne, Bena Kasada bakaditahulula mu bisumbu bisatu, bakakuata tumelo, bakaya nʼatu, bakashiha bansongalume bakadi batulama ku muele wa nvita; anu meme nkayanyi nakuhanduka bua kukuambila.

¹⁸ Hakatshidiye wakula, mukuabo kabidi wakalua, wakamba ne, Hakadi bana bebe ba balume ne bana bebe ba bakashi badia bidia ne banua nvinyo mu nsubu wa mukulu wabo,

¹⁹ mena, tshihehele tshikole tshiakafumina ku tshihela, tshiakakuma ku matumba a nsubu anai, nsubu wakuhukila bansongalume, bakafua biabo. Anu meme nkayanyi nakuhanduka bua kukuambila.

²⁰ Hashishe, Yobo wakajuka, wakahanda muzabi wandi, wakabeya nsuki ya ku mutu, wakatua mpala wandi hanshi, wakatendelela Nzambi.

²¹ Wakamba biandi ne, Nakaluhuka mu difu dia mamuʼanyi butaka, nempingane butaka. Yehowa wakampa bintu, Yehowa wakangata bintu; dina dia Yehowa ditumbishibue.

²² Mu malu au onso Yobo kakenza bibi, kakabanda Nzambi ne, Udi wenza bibi.