Yezekiyele 41 - Mukanda wa Nzambi Dihungila Dikulukulu ne Dihungila Dihia-dihia 2003

¹ Wakalua nʼanyi mu ntempelo, wakidikisha makunshi a ku mbelu, akadi coudées isambombo mu butshiama buau ku luseke ne ku luseke.

² Butshiama bua mushiku wa mbelu buakadi coudées dikumi, tshibi tshia ku luseke ne ku luseke lua mushiku tshiakadi ne butshiama bua coudées itanu. Hashishe wakidikisha munda mua tshitendelelu, muakadi coudées makumi anai mu bule buamu ne coudées makumi abidi mu butshiama buamu.

³ Ku nyima wakabuela mu nsubu wa munda mua tshitendelelu, wakidikisha makunshi a ku mbelu; dikunshi ne dikunshi diakadi bunene bua coudées ibidi; mushiku wa mbelu wakadi ne butshiama bua coudées isambombo, ne bule bua tshimanu tshia ku luseke elu lua mushiku buakadi coudées muanda mutekete, bule bua tshimanu tshia ku luseke lukuabo buakadi coudées muanda mutekete.

⁴ Wakidikisha bule bua nsubu mene, coudées makumi abidi, ne butshiama buandi buakadi coudées makumi abidi, ku mpala kua muaba wa tshijila wa ntempelo. Yeye wakangambila ne, Muaba eu udi muaba mutambe tshijila.

⁵ Wakidikisha tshimanu tshia tshitendelelu, muhimbu watshi coudées isambombo; ne butshiama bua nsubu yonso yakadi minyunguluke bimanu buakadi coudées inai, nsubu ei mikale ku nseke yonso ya tshitendelelu.

⁶ Nsubu ei mituangane yakadi isatu mitentakasha; nsubu makumi asatu yakadi mu mulongo umue; milongo yakadi isatu. Yakajadikibua ha miaba yakayilongoluelabo mu tshimanu tshia tshitendelelu mu nseke yatshi yonso, bua nsubu ijadikibue ha miaba yai ne bishimikidi biai bishilangane ne bia tshimanu tshia tshitendelelu.

⁷ Nsubu ei yakadi minyunguluke bimanu bia tshitendelelu yakenda idiunda mu butshiama buai kulu, bualu bua bimanu bia tshitendelelu biakenda bikeha kulu. Bua kubanda mu nsubu ya mulu, muntu wakadi ne bua kuhitshila mu nsubu ya hankatshi.

⁸ Nakamona kabidi ne nsubu wa tshitendelelu wakadi! muashila ha tshibumba tshinene, bule buatshi mulu buakadi coudées isambombo ne tshituha, ne bishimikidi bia nsubu yakadi minyunguluke bimanu bia tshitendelelu biakadi ha mutu hatshi.

⁹ Muhimbu wa bimanu bia ha mbelu bia nsubu mituangane wakadi coudées itanu, ne tshituha tshia tshibumba tshiakashala tshiakadi coudées itanu.

¹⁰ Ha mbelu ha tshibumba hakadi muaba wa butshiama bua coudées makumi abidi minyunguluke tshitendelelu.

¹¹ Mishiku ya mbelu ya nsubu yakadi minyunguluke bimanu bia tshitendelelu yakatangila ku tshituha tshia tshibumba tshiakadi tshishala hatuhu, mushiku mukuabo mutangile ku luseke lua nôde, mukuabo mutangile ku luseke lua sude. Butshiama bua tshituha atshi tshiakadi tshishala buakadi coudées itanu ku nseke yonso.

¹² Nsubu mukuabo wakadi ku luseke lua wesete wakadi coudées makumi muanda mutekete mu butshiama buandi; bimanu bia nsubu eu biakadi ne muhimbu wa coudées itanu ne bule bua coudées makumi tshitema.

¹³ Hashishe yeye wakidikisha nsubu yonso ya tshitendelelu, bule buatshi coudées lukama; ne muaba wa coudées makumi abidi ne nsubu wa ku luseke lua wesete ne bimanu biandi biakadi ne bule bua coudées lukama.

¹⁴ Butshiama bua tshitendelelu ku mpala kuatshi ku luseke lua esete ne bua muaba wa coudées makumi abidi busangisha buakadi coudées lukama.

¹⁵ Wakidikisha nsubu wa ku luseke lua wesete ku mpala kua muaba wa coudées makumi abidi, ne bimanu biandi bia ku luseke ne ku luseke, bule buabi bisangisha buakadi coudées lukama. Muaba wa tshijila wa mu tshitendelelu, muaba mutambe tshijila ne mbalanda wa ku mpala kua tshitendelelu biakadi bibamba mabaya ku bimanu munda mua nsubu.

¹⁶ Buonso buabi bisatu biakadi ne madidishi ku nseke yonso mabuikila ne tubaya tutshiamakashe. Bimanu bia munda mua tshitendelelu biakadi bibamba mabaya ku nseke yonso, hanshi tô ne ku madidishi andi, ku madidishi tô ne kulu,

¹⁷ ku muaba wa ha mutu ha mushiku wa mbelu wa ku muaba mutambe tshijila tô ne kulu, munda ne ha mbelu. Ha bimanu bia tshitendelelu, mu muaba mutambe tshijila ne mu muaba wa tshijila kabidi,

¹⁸ bakazola bifuanyikishi bia bakeluba ne bia mabue a ngashi. Dibue dia ngashi diakadi hankatshi ha mukeluba ne mukeluba, ne mukeluba yonso wakadi ne mpala ibidi.

¹⁹ Nunku mpala wa muntu wakatangila dibue dia ngashi ku luseke lukuabo, ne mpala wa nyama wa ntambue wakatangila dibue dia ngashi ku lunga luseke. Bintu ebi bizola biakadi munda mua nsubu muonso.

²⁰ Bakazola bifuanyikishi bia bakeluba ne mabue a ngashi ku bimanu bia tshitendelelu hanshi tô ne kulu; nunku bakalengesha bimanu bia ntempelo.

²¹ Bimanu bia muaba mutambe wa tshijila biakadi luidi lumue nseke yonso; ku mpala kua muaba mutambe tshijila kuakadi tshinfuanyi bu tshia tshioshelu.

²² Tshioshelu tshiakadi tshia mabaya, tshiakadi coudées isatu mu bule bua mulu, coudées ibidi mu bule, coudées ibidi mu butshiama; ku mpenga yatshi, tshitekelu tshiatshi ne nseke yatshi biakadi bia mabaya. Yeye wakangambila ne, Au mmesa adi ku mpala kua Yehowa.

²³ Muaba wa tshijila ne muaba mutambe tshijila biakadi ne bibi bibidi ku mishiku ya mbelu.

²⁴ Tshibi ne tshibi tshiakadi ne bituha bibidi biakamanya mua kutuangana, bituha bibidi ku tshibi tshikuabo, bituha bibidi ku tshibi tshikuabo.

²⁵ Bakazola bifuanyikishi bia bakeluba ne bia mabue a ngashi hamʼbidi habi, bu muakabizolabo ha bimanu bia nsubu. Tshitadikilu tshia mabaya tshiakadi ha mutu ha tshibuelelu ku mpala kua mbalanda.

²⁶ Bifuanyikishi bia bakeluba ne bia mabue a ngashi biakadi ha bimanu bibidi biakadi ku luseke ne ku luseke lua mbalanda ne ha tshitadikilu atshi kabidi.