Osheya 10 - Mukanda wa Nzambi Dihungila Dikulukulu ne Dihungila Dihia-dihia 2003

¹ Bena Isalele badi bu muonshi udi ulamba bikole, udi ukuama mamuma a bungi. Bu muakakuamabo mamuma a bungi, mbu muakavudishabo bioshelu bia bungi; bu muakadi buimpe bua buloba buabo, mbu muakalengeshabo makunshi a tshijila.

² Mitshima yabo idi mitahuluke nseke ibidi; mpindiu badi ne bua kukenga bua muanda eu; Yehowa neatshibule bioshelu biabo bituha bituha, neashimbule makunshi abo a tshijila.

³ Bulelela, nebambe biabo ne, Katuena ne mukelenge; bualu bua katuena tutshina Yehowa, ne mukelenge eu, yeye udi mua kutuenzela tshinyi?

⁴ Badi bamba mei a hatuhu; badi baditshiha ne mitshihu ya mashimi, badi bahunga bihungidi; nunku kulumbulula kuabo kua bilumbu nekujuke bu mudi mamuma a mulungu atoloka mu mabula a madimi.

⁵ Bua muana wa ngombe wa ku Bete-awena Bena Samalea nebakuatshike buowa; bualu bua bantu bandi ne bakuidi bandi nebamuashile madilu; nebase muadi bua butumbi buandi, bualu bua buakûmuka kudiye.

⁶ Nebaye nʼandi kabidi ku Ashû, bua kumufila bu mulambu kudi Mukelenge Yaleba. Bena Efelayima nebakuatshike bundu, ne Bena Isalele nebakuatshike bundu bua meji akadibo balesha bakuabo.

⁷ Mukelenge wa mu Samalea neabutudibue bu tshihatu ha mutu ha mai.

⁸ Bitendelelu bia ha mukuna wa Awena nebibutudibue, biakadi bubi bua Bena Isalele; meba ne mingonge nebimene ha bioshelu biabo; ne bobo nebambile mikuna ne, Nutubuikile! Nebambile mikuna mikese ne, Nutuhonene!

⁹ Ku matuku a ku Gibea tô ne mpindiu, nuenu Bena Isalele nuakuenza bibi; mu muaba au bantu babi bakatantamena; nvita kayakafika kudi bantu babi mu Gibea, anyi?

¹⁰ Hanasua kubakengesha, nembakengeshe; ne ba mu bisamba bia bantu nebadisangishe hohamue bua kubabunda, hanabakengesha bua malu mabi abo abidi.

¹¹ Bena Efelayima bakadi bu lukungulu lua ngombe luakuyishabo, ludi lunanga kudiata mamimu bua kuashihula; kadi nakuteka mutshi wa tshikokedi ha nshingu walu muimpe. Nenteke Bena Efelayima muinshi mua mutshi wa tshikokedi; Bena Yuda nebendeshe lukasu lukoka kudi ngombe, Bena Yakoba nebavingutule mabuwa.

¹² Nudikunyine buakane, nuhuole luse lujalame; nudime buloba buenu bukadi bubande; bualu bua etshi ntshikondo tshia kukeba Yehowa, tô ne halueye kunulokeshila buakane bu nvula.

¹³ Nunkukuna malu mabi, nuakuhuola anu bubi, nuakudia mamuma a mashimi; bualu bua nuakueyemena nshila wenu ne tshisumbu tshia bena bukitu benu.

¹⁴ Nunku diyoyo nedijuke munkatshi mua bana benu, misoko yenu yonso ya ngumbu ya nvita neyibutudibue, bu muakashiha Shalamana Bete-âbela mu dituku dia nvita; bakatshibula bamamu ne bana bakalelabo diatshimue.

¹⁵ Nuenu Bena Isalele, nebanuenzele nunku bualu bua bunene bua bubi buenu; hatshiabu, mukelenge wa Isalele neabutudibue kabutu.