Nsumuinu 7 - Mukanda wa Nzambi Dihungila Dikulukulu ne Dihungila Dihia-dihia 2003

Mateyi a Mukashi wa Ndumba

¹ Muanʼanyi, ulame mei anyi, uteke mikenji yanyi mu mutshima webe.

² Ulame mikenji yanyi, wikale ne muoyo; ulame diyisha dianyi bu mûdi ulama kamonyi ka disu diebe.

³ Ubisuike ku minu yebe; ubifunde mu mutshima webe.

⁴ Wambile meji ne, Udi muanʼetu wa bakashi; widike dijingulula dia mianda dina ne, Mukuetu wa bakashi.

⁵ Bua biobi bikulame bua wewe kuebela mukashi wa bende, bua kuehela biebe mukashi wa bende udi wamba mei a tshianyishanyisha.

⁶ Bualu bua ku dididishi dia mu nsubu muanyi nakatangila mu tusoso tua mabaya matshiamakanangane ha mbelu.

⁷ Nakatangila munkatshi mua batshimbakanyi, munkatshi mua bansongalume, nakamona nsongalume wakadi kayi ne lungenyi.

⁸ Wakadi uhitshila mu musesu hehi ne masangu akadi nsubu wa mukashi, wakahuka ku nsubu kuandi,

⁹ mu diba dia kafuanshimba, hakabuela diba, munkatshi mua butuku ne mîdima mikole.

¹⁰ Monai! Mukashi udi ulua kumuakidila, muluate bivualu bia mukashi wa masandi, muikale ne mutshima wa budimu.

¹¹ Udi ne mutoyi, udi ne tshishiku; makasa andi kaena ashala mu nsubu muandi.

¹² Musangu eu udi mu misesu, musangu mukuabo udi mu bisatu, ne mu masangu onso udi umualamina.

¹³ Hashishe, udi umukuata, udi uluangana nʼandi mishiku, muikale ne mpala wa dikamakama, udi umuambila ne,

¹⁴ Nakadi ne bua kufuta milambu ya kuyuisha nʼai ditalala; lelu eu nakumana mitshihu yanyi.

¹⁵ Nunku nakuluhuka bua kumuakidila, bua kukebakeba mpala webe, ne nakukumona.

¹⁶ Nakulongolola bulalu buanyi ne bilulu bia kububuikila; bilulu bidi ne mihola bia ku buanda bua ku Ejipitu.

¹⁷ Nakumiamina manananshi ha bulalu buanyi adi a mula, a alo, ne a cinnamone.

¹⁸ Lua, tumanyangane mu dinanga tô ne ku dinda, tudisankishe mu dinanga.

¹⁹ Bualu bua mulume wanyi kena ku nsubu, wakuya ku luendu lule.

²⁰ Wakuya ne tshibombi tshia argent, neahingane hatentama ngondo.

²¹ Yeye udi umuitabushishe ne mei a bungi a kutekesha nʼau mutshima wandi, udi umuenzesha bua kuya nʼandi hamubombeye ne mei andi.

²² Ha diba adi udi umulonda, bu mudi ngombe uya ku tshishihelu, bu mudi muntu muhote musuikibue bua kumukengeshabo,

²³ tô ne hamuasabo mukete musompoke mutshima wandi. Mbu mudi nyunyu ubuela mu buteyi lubilu, ne kena mumanye ne neajimishe muoyo wandi.

²⁴ Nunku nuenu, bana banyi ba balume, unvuai dî dianyi, nuteleje matshu ku mei a mukana muanyi.

²⁵ Mutshima webe kausesuki bua kuyila mu nshila yandi, kuhambuki bua kubuela mu nshila idiye wendela.

²⁶ Bua bantu bakutaheye bahone hanshi badi ba bungi; e, bonso bakushiheye badi musumba munene.

²⁷ Nsubu wandi udi nshila wa ku Muaha wa Bafue, udi uhueka tô ne ku nsubu ya lufu.