Nsumuinu 2 - Mukanda wa Nzambi Dihungila Dikulukulu ne Dihungila Dihia-dihia 2003

Difutu dia Badi Bakeba Meji

¹ Muanʼanyi, bi witabusha mei anyi, biwateka mikenji yanyi munda muebe,

² bua wewe utelejishe matshu ebe ku meji, bua kufila mutshima webe ku dijingulula dia mianda;

³ e, biwadidila dijingulula dia mianda muadi, biwabandishila kumanya kua malu dî diebe,

⁴ biwakukeba bu mûdi ukeba tshiamu tshia argent, biwakukeja bu mûdi ukeja biuma bisokoka,

⁵ nunku neujingulule ditshina dia Yehowa, neusangane dimanya dia malu a Nzambi.

⁶ Bualu bua Yehowa udi uha bantu meji; mukana muandi mudi muhatuka lungenyi ne dijingulula dia mianda.

⁷ Yeye udi ubutshila bantu bakane lungenyi ludi lubakuatshisha; udi biandi ngabu kudi badi benda ne mitshima mitoke;

⁸ bua yeye alame nshila ya kulu mbulula kuakane, bua alengeshe nshila wa bansanto bandi.

⁹ Hashishe neujingulule buakane ne dikosa diakane dia nsambu, neujingulule kulumbulula kuakane, nshila yonso mene udi uya ku buimpe.

¹⁰ Bualu bua meji neabuele mu mutshima webe, lungenyi neluikale lulengele mu muoyo webe.

¹¹ Budimu nebutangidile malu adi afika kûdi, dijingulula dia malu nedikulame;

¹² bua kukuhandisha ku nshila wa malu mabi, mu bianza bia bantu badi bamba mei a tshishiku;

¹³ badi balekela kuya mu nshila ya buakane bua kuendabo mu nshila ya mîdima.

¹⁴ Badi basanka bua kuenza bienzedi bibi, badi batamba kusanka mu tshishiku tshia malu mabi.

¹⁵ Badi bakonyangasha nshila yabo, badi benda eku ne eku.

¹⁶ Bua bualu ebu budi bua kukuhandisha mu bianza bia mukashi wa bende, mu bianza bia mukashi udi muena tshiendenda udi ukubomba ne mei andi.

¹⁷ Udi ulekela mulombodi wakamubangila hakadiye nsongakashi, udi uhua tshihungidi tshia Nzambi wandi muoyo.

¹⁸ Bualu bua nsubu wandi udi uhueka tô ne ku lufu, nshila yandi idi ihueka tô ne ku bantu bafue.

¹⁹ Kakuena muntu wa badi babuela kudiye uhingana kabidi, kabena basangana nshila ya muoyo kabidi.

²⁰ Bua bualu ebu budi bua wewe wende mu nshila ya bantu bimpe, bua ulamate biebe kudi nshila ya bantu bakane.

²¹ Bualu bua badi ne mitshima miakane nebashikame mu buloba, badi ne mutshima umue mutoke nebajalame.

²² Kadi nebajimishe bantu babi ha buloba, nebumushehu bena tshitungu.