Nsumuinu 15 - Mukanda wa Nzambi Dihungila Dikulukulu ne Dihungila Dihia-dihia 2003

¹ Dî dia kalolo didi diandamuna tshiji, kadi dî dikole didi disonsola tshiji.

² Ludimi lua muena meji ludi luhatula lungenyi, kadi mukana mua bahote mudi muhatula buhote.

³ Mesu a Yehowa adi kuonso, adi alama bantu babi ne bantu bimpe.

⁴ Ludimi ludi luamba mei a kalolo ludi bu mutshi wa muoyo, kadi ludi luamba mei a buhidia ludi lunyanga mutshima.

⁵ Muhote udi uhetula diyisha dia tatuʼandi, kadi udi unvuila bamubedi udi ne budimu.

⁶ Mu nsubu wa muntu muakane mudi tshibutshilu tshinene, kadi luhetu lua bantu babi ludi lujimina.

⁷ Mishiku ya bena meji idi itangalasha lungenyi, kadi mitshima ya bahote kayena yenza nunku.

⁸ Mulambu udi bantu babi bafila udi utondesha Yehowa, kadi ditendelela dia bantu bakane didi dimusankisha.

⁹ Bienzedi bia muntu mubi bidi bitondesha Yehowa, kadi yeye udi unanga muntu udi ulonda buakane.

¹⁰ Nebakengeshe muntu udi uhambuka mu nshila bikole; udi ukina mibelu neafue biandi.

¹¹ Muaba wa Bafue ne wa Kubutuka bidi buashi ku mesu kua Yehowa, mitshima ya bantu idi mitambe kubululuka kudiye!

¹² Mubuidi kena musue bantu bamubele; kena uya kudi bena meji nansha.

¹³ Mutshima wa disanka udi uvuisha mpala wa musangelu, kadi bikala mutshima ne kanyinganyinga, muoyo wa muntu udi utekela teketê.

¹⁴ Mutshima wa mujinguludi wa mianda udi ukeba lungenyi, kadi mukana mua bahote mudi mudia buhote.

¹⁵ Matuku onso a mukengi adi mabi, kadi muena mutshima wa disanka utu wikala ne bidia bia disanka matuku onso.

¹⁶ Kuikala ne bintu bibalê ne ditshina dia Yehowa kudi kutamba kuikala ne biuma bia bungi ne ntatu buimpe.

¹⁷ Kudia anu matamba nkayau hadi dinanga kudi kutamba kudia munyinyi wa ngombe wa manyi hadi lukuna buakane.

¹⁸ Muntu udi ukuata tshiji lukasa udi usonsola nvita, kadi udi ukuata tshiji bitekete udi ukolesha matandu.

¹⁹ Nshila wa mufuba udi ne luhangu lua mingonge ya meba, kadi nshila wa bantu bakane udi bu tshibebe tshibatamisha.

²⁰ Muana mulume wa meji udi usankisha tatuʼandi, kadi muntu muhote udi uhetula mamuʼandi.

²¹ Buhote budi disanka kudi muntu udi kayi ne meji, kadi mujingulule wa mianda udi utangisha mpala wandi mu nshila mululame.

²² Bikalaku kakuyi bulombodi bua meji, malu adi bantu bahangidisha adi ahumbishibua, kadi bikalaku tshisumbu tshia balombodi, malu â adi alubuluka.

²³ Disanka didi dikuata muntu bua dî didi mukana muandi muandamune; monai mudi dî diamba mu tshikondo tshiakane mudidi diakane!

²⁴ Kudi muena meji nshila wa muoyo udi kulu, bua yeye ehuke ku Muaba wa Bafue udi hanshi.

²⁵ Yehowa udi usasula nsubu wa badi badisue, kadi udi ujadika mukalu wa buloba bua mukashi wa mu lufuila.

²⁶ Meji a malu mabi adi atondesha Yehowa, kadi mei a disanka adi makane kudiye.

²⁷ Muntu udi ne lukuka lua luhetu udi ukengesha ba mu nsubu muandi, kadi udi ukina mbueshilu neikale ne muoyo.

²⁸ Mutshima wa muntu muakane udi welangana meji a bualu budiye mua kukudimuna, kadi mukana mua bantu babi mudi muhatula malu mabi.

²⁹ Yehowa udi kule ne bantu babi, kadi udi unvua kulomba kua bantu bakane.

³⁰ Ntangidilu wa musangelu udi usankisha mutshima, lumu luimpe ludi lusangasha mifuba.

³¹ Udi ne matshu adi ateleja mibelu ya muoyo neashikame munkatshi mua bena meji.

³² Udi ubenga diyisha udi uhetula muoyo wandi, kadi udi unvua dî dia bamubedi udi uheta lungenyi.

³³ Ditshina dia Yehowa didi diyisha dia meji, ne kudihuekesha kudi kuya ku mpala kua butumbi.