Nehemya 6 - Mukanda wa Nzambi Dihungila Dikulukulu ne Dihungila Dihia-dihia 2003

Bena Lukuna Badi Bahetela Bifufu

¹ Hakambilabo Sanebalata ne Tobiya ne Gesheme, Muena Alabâ, ne bena lukuna betu bakuabo ne, Yeye wakumana lumbu, ne kakuena muaba mushimbuke mushaleku (kadi ku tshikondo atshi tshiakanza kuela bibi bionso ku lumbu),

² Sanebalata ne Gesheme bakantumina dî ne, Lua, tusangakene nʼebe mu umue wa misoko ya mu mpata wa Ono. Kadi bakadi belangana meji bua kungenzela bibi.

³ Nakabatumina ba-messager ne, Meme ndi ngenza mudimu munene, nunku tshiena mua kulua; bundi nʼabu mbua kuhumbisha mudimu hanumuka bianyi bua kulua kunudi bua tshinyi?

⁴ Bobo bakantumina dî adi misangu inai, kadi meme nakabakudimuna anu dî diodimue.

⁵ Hashishe Sanebalata wakatuma muntu wandi kundi musangu muitanu ne mukanda mubulula mu tshianza tshiandi,

⁶ ne mei mafunda nunku ne, Lumu luakatangadika munkatshi mua bisamba bionso bia bantu ne, Gesheme udi wamba bualu ebu ne, Wewe ne Bena Yuda nudi nuelangana meji bua kutomboka; bua bualu ebu wewe udi wibaka lumbu elu; wewe udi musue kuikala mukelenge wabo bu mudi mei â.

⁷ Wewe kabidi wakamana kudisunguila baprofete hua kukuakuilabo mu Yelushalema, bamba ne, Mukelenge udi mu Yuda; katataka nebaye kuambila mukelenge mei â. Lua, tusangishe lungenyi.

⁸ Hashishe nakamutumina dî ne, Kabena benza malu bu mudi wamba, kadi wewe wakâfuanyikisha mu mutshima webe nkayebe.

⁹ Bualu bua bobo bonso bakasua kututshinyisha, bamba ne, Netutekeshe maboko abo mu mudimu, kabawenji nansha. Kadi, Nzambi wanyi, ukoleshe maboko anyi.

¹⁰ Nakaya ku nsubu wa Shemaya, muana wa Delaya, muana wa Mehetabela, wakadi mudinshidile mu nsubu; yeye wakamba ne, Tusangakene nʼebe mu nsubu wa Nzambi, mu ntempelo mene, tuinshile bibi, bualu bua nebalue kukushiha; bulelela, nebalue butuku ebu bua kukushiha.

¹¹ Nakamba ne, Muntu bu meme udi ne bua kunyema bua tshinyi? Nganyi udi bu meme neanyemene mu ntempelo bua kusungila muoyo wandi? Tshiena nyamu nansha.

¹² Nakujingulula bualu ebu ne, Nzambi kakamutuma, kadi yeye nkayandi wakadiambila bualu ebu kuadi bualu bua Tobiya ne Sanebalata bakamuha mbueshilu.

¹³ Bakamuha mbueshilu bua kuntshinyisha bua meme kuenza bualu ebu bubi bua bobo bikale ne lumu elu lubi lua kunfuisha nʼalu bundu.

¹⁴ Nzambi wanyi, uvuluke Tobiya ne Sanebalata bu mudi bienzedi biabo; uvuluke Noadaya muprofete mukashi ne baprofete bakuabo badi bakeba kuntshinyisha.

¹⁵ Nunku lumbu luakashika mu matuku makumi abidi ne atanu a ngondo wa Elula, tuakashikisha mudimu mu matuku makumi atanu ne abidi.

¹⁶ Hakunvua bena lukuna betu bonso lumu elu, bisamba bionso bia bantu biakatunyunguluka biakatshina, biakadi ne bundu bunene ku mesu; bualu bua bobo bakajingulula ne, Nzambi wabo nguakenzesha mudimu eu.

¹⁷ Mu matuku au bantu banene ba mu Yuda bakatumina Tobiya mikanda ya bungi, ne yeye kabidi wakabatumina mikanda.

¹⁸ Bualu bua bantu ba bungi ba mu Yuda bakaditshiha kudiye bualu bua yeye wakadi muku wa Shekanya, muana wa Ala; Yehohanana, muana wandi mulume, wakadi mubake muana mukashi wa Meshulama, muana wa Belekiya.

¹⁹ Bobo bakangambila malu andi mimpe, bakamuambila mei anyi kabidi. Tobiya wakantumina mikanda bua kuntshinyisha nʼai.