Nehemya 3 - Mukanda wa Nzambi Dihungila Dikulukulu ne Dihungila Dihia-dihia 2003

Badi Batahululangana Nseke ya Lumbu bua Kuyilongololabo

¹ Hashishe Eleyashiba muakuidi munene wakabika ne hana babo bakuidi, bakibaka lumbu lua ku luseke lua tshibi tshia mikoko; bakalujidila, bakateka bibi bialu, bakalujidila tô ne ku tshibumba tshia Hamea ne ku tshibumba tshia Hananele.

² Ku luseke luandi lukuabo bakadi bibaka kudi Bena Yeleko. Ne ku luseke luandi bakadi bibaka kudi Zakû, muana wa Imele.

³ Bana ba Hasena bakasa luseke lua ku tshibi tshia minyinyi ya mu mai; bakajadika makunshi, bakateka bibi bialu ne milonda yabi ne biamu biabi.

⁴ Ku luseke luabo lukuabo bakasa kudi Melemota, muana wa Uliya, muana wa Hakosa. Ku luseke luabo lukuabo bakasa kudi Meshulama, muana wa Belekiya, muana wa Meshezabela. Ku luseke luabo lukuabo bakasa kudi Sadoka, muana wa Bâna.

⁵ Ku luseke luabo lukuabo bakasa kudi Bena Tekoa; kadi bantu babo banene kabakalenga bianza biabo ku mudimu wa Mukelenge wabo.

⁶ Yehoyada, muana wa Pasea, ne Meshulama, muana wa Besodaya, bakasa ku luseke lua mushiku wa mbelu mukulukulu, bakajadika mikamba, bakateka bibi ne milonda ne biamu biabi.

⁷ Ku luseke luabo lukuabo bakasa kudi Melataya, Muena Gibeona, ne Yadona, Muena Melonita, ne Bena Gibeona bakuabo ne Bena Misepa ba ku luseke lua gouverneur wa dishiya dia musulu wa Pelata.

⁸ Ku luseke luabo lukuabo bakasa kudi Uziele, muana wa Hâhaya, batudi ba biamu bia or. Ku luseke luandi lukuabo bakasa kudi Hananya, umue wa benji ba manananshi. Bakakolesha lumbu lua Yelushalema tô ne ku lumbu lua muhimbu munene.

⁹ Ku luseke luabo lukuabo bakasa kudi Lefaya, muana wa Hû, mukokeshi wa tshituha tshia luseke lua Yelushalema.

¹⁰ Ku luseke luabo lukuabo bakasa kudi Yedaya, muana wa Halumafa, ku luseke lua nsubu wandi mene. Ku luseke luandi lukuabo bakasa kudi Hatusha, muana wa Hashabaneya.

¹¹ Malakiya, muana wa Halima, ne Hashuba, muana wa Pahata-moaba, bakasa tshituha tshikuabo ne tshibumba tshia bikulu.

¹² Ku luseke luandi lukuabo bakalongolola kudi Shaluma, muana wa Halohesha, mukokeshi wa tshituha tshia luseke lua Yelushalema, yeye ne bana bandi ba bakashi.

¹³ Hanuna ne Bena Zanoa bakalongolola mushiku wa mbelu mutangile tshibanda, bakawasa, bakateka bibi biau ne milonda ne biamu biau; bakasa mutantshi wa coudées tshinunu wa lumbu tô ne ku tshibi tshia ku luseke lua diala.

¹⁴ Malakiya, muana wa Lekaba, mukokeshi wa luseke lua Bete-hakeleme, wakalongolola mushiku wa mbelu wa ku luseke lua ku diala; wakawasa, wakateka bibi ne milonda ne biamu biau.

¹⁵ Mushiku wa mbelu wa ku mpokolo wa mai bakalongolola kudi Shaluma, muana wa Kole-hosa, mukokeshi wa luseke lua Misepa; wakawasa, wakaubulula, wakateka bibi ne milonda ne biamu; wakalongolola lumbu lua ku dina dia mai a Shela hehi ne tshibunda tshia mukelenge tô ne ku tshibandilu tshidi tshihueka ku musoko wa Davidi.

¹⁶ Ku nyima kuandi Nehemiya, muana wa Azabuka, mukokeshi wa luseke lua Bete-sû, wakalongolola tô ne ku muaba wa nkita ya Davidi ne ku dina dia mai diakumbulabo ne ku nsubu wa bena bukitu.

¹⁷ Ku nyima kuandi Bena Lewi bakalongolola: Lehuma, muana wa Bani, wakalongolola. Ku luseke luandi lukuabo bakalongolola kudi Hashabiya, mukokeshi wa tshituha tshia luseke lua Kila, bua luseke luandi.

¹⁸ Ku nyima kuandi bakalongolola kudi bana babo, Bawai, muana wa Henedada, mukokeshi wa tshituha tshia luseke lua Kila.

¹⁹ Ku luseke luandi lukuabo Ezê, muana wa Yeshua, mukokeshi wa Misepa, wakalongolola tshituha tshikuabo, buludiludi ne nsubu wa bintu bia nvita ku ditumba dia lumbu.

²⁰ Ku nyima kuandi Baluka, muana wa Zabai, wakananukila kulongolola tshituha tshikuabo ku ditumba dia lumbu tô ne ku tshibi tshia nsubu wa Eleyashiba muakuidi munene.

²¹ Ku nyima kuandi Melemota, muana wa Uliya, muana wa Hakosa, wakalongolola tshituha tshikuabo ku tshibi tshia ku nsubu wa Eleyashiba tô ne ku ndekelu wa nsubu wandi.

²² Ku nyima kuandi bakuidi, bantu ba ku Mpata, bakalongolola.

²³ Ku nyima kuabo Benyamina ne Hashuba bakalongolola buludiludi ne nsubu wabo. Ku nyima kuabo Azaya, muana wa Mâseya, muana wa Ananiya, wakalongolola ku luseke lua nsubu wandi.

²⁴ Ku nyima kuandi Binui, muana wa Henedada, wakalongolola tshituha tshikuabo, ku nsubu wa Azaya tô ne ku ditumba dia lumbu tô ne ku tshibumba.

²⁵ Palala, muana wa Uzai, wakalongolola buludiludi ne ditumba dia lumbu tô ne ku tshibumba tshiakadi tshiasa hehi ne nsubu wa mukelenge wakadi ku mukuna, tshidi ku luseke lua luhangu lua balami ba ku bibi. Ku nyima kuandi Pedaya, muana wa Palosha, wakalongolola.

²⁶ Bena Netinima hakadi bashikama mu Ofele ku muaba wa buludiludi ne mushiku wa mbelu wa ku mai ku luseke lua esete ne ku tshibumba tshiakadi tshisompoka.

²⁷ Ku nyima kuandi Bena Tekoa bakalongolola tshituha tshikuabo buludiludi ne tshibumba tshinene tô ne ku lumbu lua Ofele.

²⁸ Ku mutu kua mushiku wa mbelu wa tubalu bakuidi bakalongolola, mu ntu ne muntu buludiludi ne nsubu wandi.

²⁹ Ku nyima kuabo Sadoka, muana wa Imê, wakalongolola buludiludi ne nsubu wandi. Ku nyima kuandi Shemaya, muana wa Shekanya, mulami wa ku mushiku wa mbelu wa ku esete, wakalongolola.

³⁰ Ku nyima kuandi Hananya, muana wa Shelemeya, ne Hanuna, muana muisambombo wa Salafa, bakalongolola tshituha tshikuabo. Ku nyima kuabo Meshulama, muana wa Belekiya, wakalongolola buludiludi ne nsubu wandi.

³¹ Ku nyima kuandi Malakiya, umue wa batudi ba biamu bia or, wakalongolola ku nsubu wa Kena Netinima ne wa bangendʼa mushinga, buludiludi ne mushiku wa mbelu wa Hamifekada tô ne ku luseke ludi lubanda ku tshibumba.

³² Hankatshi ha luseke ludi lubanda ku tshibumba ne mushiku wa mbelu wa mikoko batudi ba biamu bia or ne bangendʼa mushinga bakalongolola.