Nehemya 2 - Mukanda wa Nzambi Dihungila Dikulukulu ne Dihungila Dihia-dihia 2003

Badi Batuma Nehemiya mu Yelushalema

¹ Mu ngondo wa Nisana mu tshidimu tshia makumi abidi tshia bukokeshi bua mukelenge Atashasete hakadibo balua ne nyinyo ku mesu kuandi, meme nakangata nvinyo, nakamuha mukelenge. Diambedi tshiakadi mbungama ku mesu kuandi.

² Hashishe mukelenge wakangebesha ne, Udi ubungamina tshinyi, bualu bua tshiena nkumona ne udi usama? Ebu kambualu bukuabo anu kunyingalala kua mutshima. Hashishe nakatamba kutshina bikole.

³ Nakambila mukelenge ne, Mukelenge ikale biandi ne muoyo tshiendelele; meme tshiena mua kubungama munyi, bualu bua musoko udi nkita ya bankambua banyi udi muhaula ne bibi biau bidi bioshibua ne kahia?

⁴ Hashishe mukelenge wakangebesha ne, Udi ulomba tshinyi? Nunku nakatendelela Nzambi wa mu diulu.

⁵ Nakambila mukelenge ne, Bikala bualu ebu buimpe ku mesu kuebe ne biasangana muntu webe luse ku mesu kuebe, anji kuitabusha bua kuntuma meme ku buloba bua Yuda, ku musoko udi nkita ya bankambua banyi bua meme kuwibaka.

⁶ Mukelenge wakangebesha (mukelenge mukashi wakadi ushikama nʼandi) ne, Wewe udi ulomba luendu lua matuku bungi munyi? Neuhingane tshikondo kai? Nunku mukelenge wakitabusha bua kuntuma; nakamulaya tshikondo.

⁷ Nakambila mukelenge kabidi ne, Bitabusha mukelenge, bampe mikanda kudi ba-gouverneur badi dishiya dia musulu wa Pelata, bua bobo bitabushe bua meme kuhitshila mu maloba abo tô ne hanafika ku buloba bua Yuda,

⁸ ne mukanda mukuabo kudi Asafa, mulami wa metu a mukelenge, bua yeye ampe mabaya a kuenza nʼau mikamba ya bibi bia nsubu wa mukelenge udi hehi ne nsubu wa Nzambi, ne a lumbu lua musoko, ne a nsubu undi mua kulalamu. Mukelenge wakitabusha malu au onso bualu bua tshianza tshimpe tshia Nzambi wanyi tshiakadi kundi.

⁹ Hashishe nakalua kudi ba-gouverneur bakadi dishiya dia musulu wa Pelata, nakabaha mikanda ya mukelenge. Mukelenge wakantuma ne tupitene tua masalayi ne badi benda ha tubalu.

¹⁰ Hakabunvua Sanebalata, Muena Holona, ne Tobiya, Muena Amona, muena mudimu wandi, ne, Muntu wakalua bua kukuatshisheye Bena Isalele, mitshima yabo yakanyingalala.

Nehemiya Udi Ukolesha Mitshima ya Bantu bua Kuasabo Lumbu Tshiakabidi

¹¹ Nakafika ku Yelushalema, nakashikamamu matuku asatu.

¹² Nakabika butuku, meme ne bantu bakuabo bakese bakadi nʼanyi; tshiakambila muntu mukuabo malu akateka Nzambi wanyi mu mutshima wanyi bua kuenza ku Yelushalema; kakuakadi nyama mukuabo nʼanyi anu nyama unakadi mubande ha nyima handi.

¹³ Nakaluhuka butuku ku tshibi tshia ku luseke lua tshibanda, ku dina dia mai a mibuabua ku luseke lua diala, nakatangila lumbu lua Yelushalema luakadi lushimbuka hanshi ne bibi bialu biakadi bioshibua ne kahia.

¹⁴ Hashishe nakaya ku tshibi tshia ku luseke lua mpokolo wa mai ne tshiowelu tshia mukelenge; kadi kakuakadi muaba wa nyama unakadi mubande ha nyima handi kuhitshilaku.

¹⁵ Hashishe nakaya butuku ku kasulu ka mai, nakatangila lumbu; nakalukila, nakabuelela ku tshibi tshia mu tshibanda; nunku nakahingana.

¹⁶ Bantu bakadi ku mutu kua musoko kabakamanya kunakaya anyi malu anakenza; tshiakanza kuambila Bena Yuda anyi bakuidi anyi bantu banene anyi bakadi ku mutu kua musoko anyi benji ba mudimu.

¹⁷ Hashishe nakabambila ne, Nudi batangile dikenga ditudi nʼadi ne bu mudi Yelushalema muhaula, ne bu mudi bibi biau bioshibue ne kahia; luai, tuibake kabidi lumbu lua Yelushalema, bua katuikadi ne bundu kabidi.

¹⁸ Nakabambila bua tshianza tshia Nzambi wanyi tshiakadi tshimpe kundi, ne bua mei a mukelenge akangambileye. Bobo bakamba ne, Tubikai, tuasai. Nunku bakakolesha maboko abo bua mudimu eu muimpe.

¹⁹ Kadi hakabunvua Sanebalata, Muena Holona, ne Tobiya, Muena Amona, muena mudimu wandi, ne Gesheme, Muena Alabâ, bakatuseka, bakalengulula, bakatukonka ne, Bualu ebu bunudi nuenza budi tshinyi? Nudi basue kutombokela mukelenge, anyi?

²⁰ Hashishe nakitaba kudibo, nakabambila ne, Nzambi wa mu diulu neakuatshishangane nʼetu; nunku tuetu bantu bandi netubike, netuase lumbu elu; kadi nuenu kanuena ne buhianyi, nansha tshituha, nansha tshivulukidi mu Yelushalema.