Muambi 9 - Mukanda wa Nzambi Dihungila Dikulukulu ne Dihungila Dihia-dihia 2003

¹ Bualu bua nakateka malu â onso mu mutshima wanyi bua kuateta bu mudi bantu bakane ne bena meji ne midimu yabo bidi mu bianza bia Nzambi; bikalaku dinanga anyi lukuna, muntu kena mumanye; malu onso adi ku mpala kuabo.

² Nshikidilu wa bantu bonso udi muomumue: udi muomumue kudi bantu bakane ne kudi bantu babi, kudi bantu bimpe badi ne mitshima mitoke ne kudi badi ne mitshima mifike, kudi badi bashihela Nzambi nyama ne kudi badi kabayi bamushihela nyama; muntu muakane udi anu bu muntu mubi; udi muditshihe udi muomumue ne udi utshina mua kuditshiha.

³ Ebu mbualu bubi bua mu malu onso adi menjibue muinshi mua diba ne nshikidilu umue udi kudi bantu bonso; bulelela, mitshima ya bana ba bantu idi miule tente ne malu mabi; kutomboka kudi mu mitshima yabo hatshidibo ne muoyo; ku nyima badi baya kudi bafue.

⁴ Bualu bua udi ubadibue munkatshi mua badi ne muoyo udi ne ditekemena; bualu bua mbua udi ne muoyo udi uhita nyama wa ntambue mufue.

⁵ Bualu bua badi ne muoyo badi bamanye ne, Netufue; kadi bafue kabena bamanye bualu bumue, kabena ne difutu diabo kabidi; kabena babavuluka.

⁶ Dinanga diabo ne lukinu luabo ne mukau wabo biakajimina kale; kabena ne bualu bukuabo tshiendelele mu malu onso adi enjibua muinshi mua diba.

⁷ Ya biebe, udie bidia biebe ne disanka; unue nvinyo yebe ne mutshima wa disanka; bualu bua Nzambi wakumana kuitabusha midimu yebe.

⁸ Bilulu biebe bikale bitoke tô matuku onso; kuhangi kuela manyi ha mutu hebe.

⁹ Usanke ne mukashi webe ûdi munange matuku onso a muoyo webe wa ha buloba akukuhabo muinshi mua diba, matuku ebe mene a ha buloba; ebu mbuebe buhianyi bua mu muoyo ne mu midimu yebe iudi wenza muinshi mua diba.

¹⁰ Malu onso audi wenza wenze ne bukole buebe buonso; bualu bua kakuena mudimu, kakuena kulongolola kua malu, kakuena lungenyi anyi meji ku Muaba wa Bafue kûdi uya.

¹¹ Nakatangila kabidi muinshi mua diba ne, Bena lubilu lukole kabena bahita hakuaho mu kutumbila lubilu misangu yonso, nansha bena bukitu kabena bahitahita bakuabo bukole mu nvita; bena meji kabalu baheta bia kudia bionso; bena lungenyi kabatu baheta bubanji buonso; badi ne ngenzelu muimpe kabatu baheta diakalengele dionso; kadi buonso buabo badi ne bikondo bidi malu abatulukila.

¹² Muntu kena mumanye tshikondo tshiandi; bu mudi minyinyi ya mu mai ikuatshibua mu kahamba kabi, ne bu mudi nyunyu ihia masoka, nunku bana ba bantu badi bakuatshibua mu tshikondo tshibi haluatshi kudibo lukasa.

¹³ Nakatangila lungenyi lua nunku muinshi mua diba, luakunkemesha, luakumueneka bu bualu bunene kundi:

¹⁴ Musoko mukese wakadiku, anu bantu banya-banya bakadimu; mukelenge munene wakalua kuluisha, wakautshintshimika ne wakasa bibumba;

¹⁵ bakasanganamu muena meji muhele; bua lungenyi luandi yeye wakasungila musoko, kadi kakuakadi muntu wakavuluka muhele eu.

¹⁶ Hashishe, nakamba ne, Lungenyi ludi luhita bukole buakane; kadi badi balengulula lungenyi lua muntu muhele ne kabena bunvua mei andi.

¹⁷ Mei a bena meji adibo bunvua talalâ adi ahita mbila ya mukokeshi wa bahote buakane.

¹⁸ Lungenyi ludi luhita bintu bia nvita bukole; kadi muntu mubi umue udi unyanga malu makane a bungi.