Muadi 5 - Mukanda wa Nzambi Dihungila Dikulukulu ne Dihungila Dihia-dihia 2003

Kulomba Luse kudi Yehowa

¹ Yehowa, uvuluke bualu buakutukuata; tangila, umone bu mutudi bakuatshike bundu.

² Bakufila buhianyi buetu kudi bantu ba bende, ne nsubu yetu kudi ba mu bisamba bia bende.

³ Tuakulua bu bana ba nshiya, bu badi kabayi ne batatuʼabo; bamamuʼetu badi bu bakashi ba mu lufuila.

⁴ Tudi tusumba mai atudi tunua; nkunyi yetu idi isumbibua anu ku mushinga.

⁵ Batuihatshi badi batutua tshianza mu dikoshi; tudi tuenza mudimu mukole, katuyi bahete dikisha.

⁶ Tuakuolola bianza bietu kudi Bena Ejipitu, ne kudi Bena Ashû, bua kulomba bia kudia bikumbane.

⁷ Batatuʼetu bakenza malu mabi, kabenaku kabidi; ne tuetu tuakuhiana mibi yabo.

⁸ Bahika badi batukokesha, kakuena muntu wa kutuhandisha mu bianza biabo.

⁹ Tudi tukeba kujiuka hatuaheta bia kudia bietu, bualu bua muele wa nvita udi mu tshihela.

¹⁰ Dikoba dietu didi ditema bu luesu ludi heku, bualu bua luya lua tshiole ludi lutuosha.

¹¹ Badi bakuata bakashi ku bukole mu Siona, ne bana bakashi batshidi tumama mu misoko ya mu Yuda.

¹² Badi balembeleshe bakokeshi kulu bakudika ku bianza biabo; kabena banemeka bakulu.

¹³ Bansongalume badi benza mu dimu wa kuhela blé ha dibue, batshidi bana badi balenduka bua bujitu bua nkunyi.

¹⁴ Bakulu kabena bashikama kabidi mu bilumbuluidi bia ku bibi, bansongalume bakulekela kuimba misambu.

¹⁵ Disanka dia mitshima yetu diakujimina, maja etu akuandamuka madilu.

¹⁶ Tshifulu tshia butumbi tshiakutuka ku mutu kuetu; tudi ne mulau! Bualu bua tuakuenza bibi.

¹⁷ Bua bualu ebu mitshima yetu yakuteketa; bua malu â mesu etu adi bitayitayi;

¹⁸ bualu bua Mukuna wa Siona wakulua bu tshihela tshia hatuhu, ne mibuabua idi yendelamu.

¹⁹ Wewe, Yehowa, udi mushikame mu nkuasa webe wa butumbi tshiendelele; nkuasa webe wa butumbi udiku ku bikondo ne bikondo.

²⁰ Bualu kai udi musue kutuhita muoyo tshiendelele, ne kutulekela musangu bule nunku?

²¹ Utuhingashe kûdi kabidi, Yehowa, ne tuetu netuhingane; utulengeshile matuku etu bu muakadiu diambedi,

²² biwikala kuyi mutuhidie tshishiki, biwikala kuyi nʼetu tshiji tshitamba bukole.