Muadi 4 - Mukanda wa Nzambi Dihungila Dikulukulu ne Dihungila Dihia-dihia 2003

Dikenga Diabo Dikole

¹ Monai, tshiamu tshia or tshiakubuitshidila! or mulelela wakakudimuka! Badi bela mabue akadi mu nsubu wa tshijila hanshi mu misesu yonso.

² Bana balume ba Siona ba mushi nga mukole, bu or mulelela, badi babadibua mpindiu bu milondo ya dima, mudimu wa bianza bia mufumbi mene!

³ Nyama ya mibuabua mene mene idi yamusha bana bai mabele; kadi muana mukashi wa bana betu wakulua bu muena lukinu, bu nyunyu ya nfiondo ya mu tshihela tshia lusenga.

⁴ Ludimi lua muana utshidi wamua mabele ludi lulamata mu tshilakalaka bualu bua nyota yandi. Bana batekete badi balomba bidia, ne kakuena muntu udi ubahabi.

⁵ Bakadi badia bia kudia bishema badi bafue mu misesu mpindiu; bakadi baluata bilulu bikunzekunzû diambedi badi balala mu diala mpindiu.

⁶ Dikenga diakukuata muana mukashi wa bana betu bua mibi yandi didi dihita dikenga diakukuata musoko wa Sodoma bukole, musoko wakubutulabo mu kuvinya kua disu, kauyi ne tshianza tshia muntu tshilenga.

⁷ Bakokeshi bandi bakadi ne mitshima mihite neige butoke, yakahita mabele kutoka; mibidi yabo yakadi ne lukunjilakunjila luhite dibue dia corail kukunza; dinkenke diai diakadi bu dia dibue dia saphir.

⁸ Kadi mpindiu mpala yabo idi ihita makala a kahia bufike; kabena bamanyibue kabidi hahitabo mu misesu; dikoba diabo difuate didi dilamata ha mifuba yabo; didi diandamuke bu mutshi mûme.

⁹ Diakalengele dia badi bashihibue ku muele wa nvita didi dihita dia badi bashihibue ne nzala buakane; bua badi baleuka, bateketa-teketê, bualu bua kabena ne bintu bia mu madimi.

¹⁰ Bianza bia bakashi badi ne mitshima ya luse biakalamba bana babo baledibue ha kahia; bakalua bia kudia biabo mu tshikondo tshia kubutuka kua muana mukashi wa bana betu.

¹¹ Yehowa wakabakengesha tô ne hakashika tshiji tshiandi, wakahumuna tshiji tshiandi tshitambe bukole; wakatemesha kahia mu Siona, kakosha bishimikidi biandi.

¹² Bakelenge ba ha buloba ne bantu bonso kabidi kabakitabusha ne, Mukengeshi ne muena lukuna nebabuele mu bibi bia ku Yelushalema.

¹³ Malu â akulua bualu bua mibi ya baprofete bandi ne malu mabi a bakuidi bandi, bakamatshisha mashi a bantu bakane munkatshi mua musoko.

¹⁴ Bakadi babubuta bu bantu bafofo mu misesu; bakadi banyanguke ne mashi, nunku bantu kabakadi mua kulenga bivualu biabo.

¹⁵ Bakabela mbila ne, Umukai kutudi! Nudi banyanguke! Unvuai, unvuai, kanutulengi! Nunku bakalua banyemi ne bendakanyi; bantu bakamba munkatshi mua bisamba bia bantu ne, Kabena mua kushala nʼetu kabidi.

¹⁶ Tshiji tshia Yehowa tshiakubamuangalasha; yeye kena ubatangila kabidi; kabakunemeka bakuidi babo, kabakulesha bakulu kanemu.

¹⁷ Mesu etu akufula hatuakadi bindile, batekemena dikuatshisha; kadi kuindila kuetu kuakadi hatuhu; tshisamba tshitu akutekemena katshiakadi mua kutusungila.

¹⁸ Batukebi bakadi benda batulonda bua kututatshisha, nunku katuakadi mua kuenda mu misesu yetu; nshikidilu wetu wakadi ha buihi, matuku etu akakumbana, bualu bua nshikidilu wetu wakafika.

¹⁹ Batuihatshi bakahita nyunyu ya mikanku ya mulu kuya lubilu; bakatuihata tô ne ha mikuna, bakatualamina mu tshihela.

²⁰ Mukelenge muedibue manyi kudi Yehowa, wakakuatshibua mu majimba abo, utuakatekemena bu muhuya wa mûlu etu; uwakamba bualu buandi ne, Muinshi mua mundidimbi wandi netuikale ne muoyo munkatshi mua bisamba bia bantu.

²¹ Wewe muana mukashi wa Edome, udi mushikame mu buloba bua Uza, anji kusanka, wikale ne disanka mu mutshima. Luhanza nelufike kûdi kabidi; neukuatshike maluvu, neuvule bilamba biebe bionso.

²² Wewe muana mukashi wa Siona, dikenga diebe bua bubi diakushika, kabena baya nʼebe mu buhika kabidi. Kadi wewe muana mukashi wa Edome, nebakukengeshe bua bubi buebe; nebasokolole malu mabi ebe.