Misambu 96 - Mukanda wa Nzambi Dihungila Dikulukulu ne Dihungila Dihia-dihia 2003

Musambu wa Kutumbisha nʼAu Nzambi

¹ Nuimbile Yehowa musambu muhia-muhia; nuimbile Yehowa musambu, nuenu bonso ba ha buloba.

² Nuimbile Yehowa musambu, nuvudishile dina diandi disanka; nuambile bantu lumu lua luhandu luandi ku dituku ku dituku.

³ Nuambile ba munkatshi mua bantu ba bende butumbi buandi, numanyishe ba munkatshi mua bantu bonso malu a kukemi akenzeye.

⁴ Bualu bua Yehowa udi munene, budiye nʼabu mbua kutumbishibua bikole; budiye nʼabu mbua kunemeshibua ha mutu ha nzambi yonso ya hatuhu.

⁵ Bualu bua nzambi yonso ya bantu ba bende idi bintu bia hatuhu; kadi Yehowa wakafuka bia mu diulu.

⁶ Butumbi ne buneme bidi ku mpala kuandi; bukole ne bulengele bidi mu tshitendelelu tshiandi.

⁷ Nuenu ba mu biota bia bantu, nuambike Yehowa malu andi, nuambike Yehowa butumbi ne bukole.

⁸ Nuambike Yehowa butumbi budi buakanangane ne dina diandi. Luai ne mulambu kudiye, nubuele mu biendedi bia tshitendelelu tshiandi.

⁹ Tendelelai bienu Yehowa baluate bivualu bia tshijila, Zakalai ku mpala kuandi, nuenu bonso ba ha buloba.

¹⁰ Nuambe munkatshi mua bisamba bia bantu ne, Yehowa udi ukokesha e, buloba budi bujadikibue, kabuena mua kunyungishibua. Yeye nealumbuluishe bantu kayi ne kansungusungu.

¹¹ Diulu dikale ne disanka, buloba busanke kabidi. Mai nianene enze tshiona, ne bionso bidimu bibile.

¹² Budimi bua mu mpata busanke, ne bionso bidimu bisanke kabidi. Hashishe mitshi yonso ya muitu neyimbe misambu bua disanka dia

¹³ ku mpala kua Yehowa, bualu bua yeye udi ulua, bua udi ulua bua kulumbuluisheye ba ha buloba. Nealumbuluishe ba ha buloba bu mudi buakane buandi, nealumbuluishe bukua bantu bu mudi lulamatu luandi lua bushuwa.