Misambu 77 - Mukanda wa Nzambi Dihungila Dikulukulu ne Dihungila Dihia-dihia 2003

Badi Basambibue Hadibo Bavuluka Bienzela Bikole bia Nzambi

¹ Neudile kudi Nzambi ne dî dikole, nendile ne dî dikole kudi Nzambi, ne yeye neateleshe matshu andi kundi.

² Mu dituku dia makenga anyi nakakeba Mukelenge. Tshianza tshianyi tshiakadi tshiolola kudiye butuku katshiyi tshihange; muoyo wanyi wakabenga kusambibua.

³ Ndi nvuluka Nzambi, ndi ntua mikemu; ndi ngelangana meji munda muanyi, nyuma wanyi udi uhanga.

⁴ Wewe udi ukuata bilafinyi bia mesu anyi bua ashale matabale; ndi ntata tô ne handi tshiyi mumanye mua kuamba dî.

⁵ Nakuelangana meji bua matuku a kale, ne bua bidimu bia bikondo bia diambedimbedi.

⁶ Ndi nvuluka musambu unakimba butuku; ndi ngelangana meji mu mutshima wanyi muine; ne nyuma wanyi udi unanukila kukeba mua kujingulula malu.

⁷ Mukelenge neabenge tshiendelele, anyi? Kena wikala ne diakalengele kabidi, anyi?

⁸ Luse luandi lujalame luakumana kuhuwa tshiendelele, anyi? Mulayi wandi wakuhanga tshiendelele, anyi?

⁹ Nzambi wakuhua muoyo bua kutufuileye luse luandi, anyi? Wakujibika luse luandi bualu bua udi ne tshiji, anyi?

¹⁰ Ndi ngamba ne, Ebu mbualu budi busamisha mutshima wanyi ne, Tshianza tshia bukole tshia Mutambe Bunene wa mu diulu tshiakukudimuka.

¹¹ Nentele bienzedi bia Yehowa, bualu bua nenvuluke malu ebe a kukema awakenza kale.

¹² Nengelangane meji a mudimu webe wonso, nengelangane meji munda muanyi a bienzedi biebe.

¹³ Nzambi, nshila webe udi wa tshijila. Nzambi kai udi munene bu mudi Nzambi wetu?

¹⁴ Wewe udi Nzambi udi wenza malu a kukema; wewe wakumuenesha bukole buebe munkatshi mua bantu.

¹⁵ Wewe wakuhikula bantu bebe ne diboko diebe, bana ba Yakoba ne bana ba Yosefe.

¹⁶ Nzambi, mai akakutangila; mai akakutangila, akakuatshika buowa; e, ndondo wa mai wakakanka kabidi.

¹⁷ Matutu akahumuna mai; diulu diakatuma mukungulu; mikete yebe yakendakana kuonso.

¹⁸ Dî dia mukungulu webe wa nvula diakadi mu nvunde, miele yebe ya nvula yakahenyina ba ha buloba. Buloba buakakanka, buakazakala.

¹⁹ Nshila webe wakadi mu mai manene, nshila yebe yakahita mu mai matambe bukole; ne biendedi biebe kabiakamanyibua.

²⁰ Wakalombela bantu bu tshisumbu tshia mikoko, ku tshianza tshia Mose ne tshia Alona.