Misambu 72 - Mukanda wa Nzambi Dihungila Dikulukulu ne Dihungila Dihia-dihia 2003

Bukokeshi bua Mukelenge Muakane

¹ Wewe Nzambi, uheshe mukelenge kulumbulula kuebe kuakane, uheshe muana wa mukelenge buakane buebe.

² Yeye nealumbuluishe bantu bebe ne buakane, nealumbuluishe bantu bebe bahele ne kulumbulula kuakane.

³ Mikuna mile neyivuishile bantu ditalala, mikuna mihi neyibavuishiledi bua buakane buebe.

⁴ Yeye nealumbuluile bahele bilumbu biabo, neasungile bana ba badi bakengela bintu, neatshibule mukengeshi wabo bituha bituha.

⁵ Bantu nebakutshine hatshidi diba ditema, ne hatshidi ngondo ukenka, tô ne ku bikondo bionso.

⁶ Yeye neikale bu nvula udi uloka ha mashinde makoshibue, neikale bu nvula ya tunsense idi imiamina mai ha buloba.

⁷ Mu matuku andi bantu bakane nebikale ne diakalengele, ditalala divule nedikaleku tô ne hajimina ngondo tshiendelele.

⁸ Yeye neikale ne bukokeshi ku mai manene tô ne ku mai manene makuabo, ne ku Musulu wa Pelata tô ne kunfudilu kua buloba.

⁹ Badi bashikame mu tshihela nebinyike mitu yabo ku mpala kuandi, ne badi nʼandi lukuna nebalake biabo dinfuenkenya dia buloba.

¹⁰ Bakelenge ba mu Tâshishi ne ba mu bisanga bia mai manene nebafile milambu kudiye; bukelenge ba mu Sheba ne ba mu Seba nebalue ne maha abo kudiye.

¹¹ E, bakelenge bonso bamukukuile, ba mu bisamba bionso bia bantu bamukuatshile mudimu.

¹² Bualu bua neahandishe mukengedi wa bintu hadileye kudiye, neabandishe muntu muhele udi kayi ne mukuatshishi.

¹³ Neafuile udi mutekete ne udi ukengela dikuatshisha luse, neasungile mioyo ya bakengedi.

¹⁴ Neuhikule mioyo yabo ku tshinyangu ne malu makole, ne mashi abo neikale tshintu tshia mushinga mukole ku mesu kuandi.

¹⁵ Yeye ikale ne muoyo, bamuhe bituha bia or wa ku Sheba; bamulombele Nzambi mafuku onso, bamuvudishile disanka dinda tô ne ku dilolo.

¹⁶ Blé ikale mivule ha buloba, tô ne ha mitu ha mikuna, miehu yai ihehe bu mudi mitshi ya mu Lebanona iheha. Bantu bavulangane mu musoko, badiunde bu mudi mashinde a ha buloba adiunda.

¹⁷ Dina diandi nedishaleku tshiendelele! Dina diandi netushale kudi tunkanunuma tuandi hatshidi diba ditema. Bantu nebadivudishile disanka mu bualu buandi; bisamba bionso bia bantu nebimubikile ne, Udi ne disanka.

¹⁸ Yehowa Nzambi, Nzambi wa Isalele, avudishibue disanka, anu yeye nkayandi udi wenza malu a kukema.

¹⁹ Dina diandi dia butumbi divudishibue disanka tshiendelele; buloba bujima bûshibue tente ne butumbi buandi. Amen ne Amen.

²⁰ Mitendelelu ya Davidi, muana wa Yishai, yakuhua.