Misambu 68 - Mukanda wa Nzambi Dihungila Dikulukulu ne Dihungila Dihia-dihia 2003

Nzambi wa Sinai ne wa Tshitendelelu

¹ Nzambi ajuke, badi nʼandi lukuna bamuangalashibue; bonso badi nʼandi lukuna banyeme ku mpala kuandi.

² Bu mudi luhehele lumuangalasha muishi, wewe ubihata; bu mudi dihula dienguluka ku luya lua kahia, bantu babi bajimine ku mpala kua Nzambi muomumue.

³ Kadi bantu bakane bikale ne disanka, balumbile ku mpala kua Nzambi; e, basanke bikole mu disanka diabo.

⁴ Imbilai Nzambi misambu, imbidilai dina diandi misambu ya kumutumbisha nʼai. Buwai nshila bualu bua yeye ulualua kuhita mu bihela; dina diandi nYehowa; tumbilai bienu ku mpala kuandi.

⁵ Mu muaba wandi wa tshijila mudiye mushikame mudi Nzambi, tatu wa bana ba nshiya ne mulumbuluidi wa bakashi ba mu lufuila.

⁶ Nzambi udi uhesha bantu bashiya hatuhu nsubu bua bobo bashikamemu, udi uluhula bena lukanu, udi ubaha diakalengele; kadi badi bamutombokela badi bashikame mu buloba bûme budi munya wosha.

⁷ Nzambi, hawakaluhuka bua kuya ku mpala kua bantu bebe, hawakenda uhitshila mu tshihela,

⁸ buloba buakazakala, matutu a mu diulu akalokesha nvula hakamuenekau ku mesu kua Nzambi. Sinai au wakakanka ku mesu kua Nzambi, Nzambi wa Isalele.

⁹ Wewe, Nzambi, wakalokesha nvula ya bungi; wakakankamasha ba mu buhianyi buebe hakambabo kuhungila.

¹⁰ Tshisumbu tshia bantu bebe tshiakashikama mu buloba abu; bualu bua buimpe buebe, Nzambi, wewe wakasubula bahele.

¹¹ Mukelenge udi wamba dî diandi, bakashi badi bambila bantu lumu elu badi tshisumbu tshinene, bamba ne,

¹² Bakelenge ba misumba ya masalayi badi banyema, badi banyema! Bakashi badi bashala mu nsubu yabo badi babanyangana bintu binyengibue mu nvita.

¹³ Nenulale munkatshi mua mpangu ya mikoko, bu mahuahua a nyunyu wa nkutshi adi mabuikidibue ne tshiamu tshia argent, ne masala andi mabuikidibue ne or mukunze.

¹⁴ Hakamuangalasha Nzambi Mutambe Bunene bakalenge mu buloba abu, neige wakamata ha Salemona.

¹⁵ Wewe, mukuna wa Nzambi, mukuna wa Bashana; mukuna udi ne mitu ya bungi, mukuna wa Bashana!

¹⁶ Munyi mûdi ne mukau, wewe mukuna udi ne mitu ya bungi, hawamona mukuna udi Nzambi musue bu muaba wandi wa kushikamahu? E, Yehowa neashikamehu tô ne tshiendelele.

¹⁷ Makalu a nvita a Nzambi adi binunu makumi abidi, adi binunu ha mutu ha binunu mene. Mukelenge udi munkatshi muau; ku Sinai udi mu muaba wandi wa tshijila.

¹⁸ Wewe wakubanda mulu, wakuyamu ukoka bantu bawakukuata mu nvita ku nyima kuebe; wakuangata maha munkatshi mua bantu; e, wakuângata kabidi munkatshi mua badi bakutombokela, bua Yehowa Nzambi ashikameku.

¹⁹ Mukelenge avudishibue disanka, udi ututuadila bujitu buetu ku dituku ku dituku; Nzambi mene udi luhandu luetu.

²⁰ Nzambi udi Nzambi wa luhandu kutudi, ne kudi Yehowa Mukelenge kudi kufuma kuhanduka ku lufu.

²¹ Kadi Nzambi neahande mitu ya bena lukuna bandi bihesa, neahande lubombo lua mutu ludi ne nsuki ya bungi lua muntu udi unanukila kuenda mu bubi buandi.

²² Mukelenge wakamba ne, Nempinganeku kabidi ne bandi ngumusha mu Bashana, nempinganeku kabidi ne bandi mpatula mu ndondo wa mu mai manene;

²³ bua wewe Umanye mua kudiatshisha makasa ebe mu mashi, bua ndimi ya mbua yebe ikale ne tshituha tshiai tshia mashi a badi nʼebe lukuna.

²⁴ Nzambi, bantu bebe bakutangila ngendu yebe, bakutangila ngendu ya Nzambi, Mukelenge wanyi, hakubueleye mu muaba wandi wa tshijila.

²⁵ Bimbi ba misambu badi badianjila ku mpala, bimbi ba bisanji badi babalonda ku nyima, ne hankatshi habo hadi bansongakashi bimba biabo makasa:

²⁶ Bimba ne, Vudishilai Nzambi disanka mu masangisha a bantu; vudishilai Mukelenge disanka, nuenu mushimi wa mai wa Bena Isalele.

²⁷ Ka Benyamina mukese udiku, mukokeshi wabo; bakokeshi ba Yuda mu tshisumbu tshiabo tshinene, bakokeshi ba Zebuluna ne bakokeshi ba Nafatale badiku.

²⁸ Nzambi, lesha bukole buebe; Nzambi, jadika malu awakuenza bualu buetu.

²⁹ Bualu bua ntempelo webe wa mu Yelushalema bakelenge nebalue ne maha abo kûdi.

³⁰ Ubele biebe nyama ya munkatshi mua ntuhu, ubele tshisumbu tshia balume ba ngombe diatshimue ne bana ba ngombe ba bantu. Udiate bantu aba muinshi mua makasa ebe badi balua kukokela kûdi ne bituha bia tshiamu tshia argent. Umuangalashe bantu badi basanka bua kuluangana nvita.

³¹ Bantu banene badi bafume ku Ejipitu, Atiopa udi udiendesha lukasa bua kuololeye bianza biandi kudi Nzambi.

³² Nuenu ba mu makelenge a ha buloba, nuimbile Nzambi musambu; nuimbile Mukelenge misambu ya kumutumbisha nʼai.

³³ Nuimbile udi wenda mubande ha mutu ha diulu misambu, ha diulu mene diakadiku kale kale. Monai, udi wela dî diandi, dî diandi dikole mene.

³⁴ Leshai bantu ne, Nzambi udi ne bukole. Buneme buandi budi ha mutu ha Bena Isalele, ne bukole buandi budi mu diulu.

³⁵ Wewe Nzambi, udi ukuatshisha bantu buowa ne malu a ku miaba yebe ya tshijila, Nzambi wa Isalele, yeye udi uhesha bantu bandi bukole ne mukanda. Nzambi avudishibue disanka.