Misambu 41 - Mukanda wa Nzambi Dihungila Dikulukulu ne Dihungila Dihia-dihia 2003

Badi Balomba Diondaha

¹ Disanka didi kudi muntu udi wela meji a luse bua muntu udi ne mubidi mutekete! Yehowa neamuhandishe mu dituku dia dikenga.

² Yehowa neamulame, neamukube bua yeye ashale ne muoyo. Nebamubale bu muntu udi muvudishibue disanka ha buloba; ne wewe kumufidi mu bianza bia badi nʼandi lukuna bua bamuenzele bu mudibo basue.

³ Yehowa neamukoleshe hadiye ulala ha bulalu bua butekete bua mubidi wandi; wewe wakukudimuna bulalu buandi bua disama buonso bua yeye asangale.

⁴ Meme hanyi nakamba ne, Yehowa, unfuile luse; usangashe muoyo wanyi, bualu bua nakukuenzela bibi.

⁵ Badi nʼanyi lukuna badi bamba mei mabi bua bualu buanyi ne, Yeye neafue diba kai, ne dina diandi nedijimine diba kai?

⁶ Bialua umue wabo kuntangila, udi Wamba mei a kumbomba nʼau. Mutshima wandi udi uditekela malu a bunsonge. Haluhukeye bua kuya ha bule, udi wamba malu â.

⁷ Bonso badi nʼanyi lukuna badi banungana hohamue bua bualu buanyi. Badi bangelela tshifufu bua dikenga dianyi, bamba ne,

⁸ Bualu budi buvuisha lufu budi bulamata bikole kudiye, ne mpindiu yeye mumane kulala hanshi kena ujuka kabidi.

⁹ Mulunda wanyi mene unakadi nʼandi ditalala ne unakeyemena, wakadi udia bidia bianyi wakuntua museba.

¹⁰ Kadi wewe, Yehowa, unfuile luse, umbishe kabidi; bua meme kumanya mua kubahingashila difutu diabo.

¹¹ Ku muanda eu ndi mumanye ne, Wewe udi usanka bua bualu buanyi, bualu bua muena lukuna wanyi kakumpita bukole.

¹² Kadi mundi ngamba bua bualu buanyi, wewe udi unkolesha bualu bua buakane buanyi, udi unshikika ku mesu kuebe tshiendelele.

¹³ Yehowa, Nzambi wa Isalele, avudishibue disanka ku tshibangidilu tô ne kunshikidilu! Amen! Amen!