Misambu 147 - Mukanda wa Nzambi Dihungila Dikulukulu ne Dihungila Dihia-dihia 2003

Badi Basakidila Nzambi bua Diakalengele Didiye Ulesha Yelushalema

¹ Tumbishai Yehowa! Bua bidi bimpe bua kuimbila Nzambi wetu misambu ya kumutumbisha nʼai. Bua yeye udi muimpe, ne kumutumbisha kudi kuakane.

² Yehowa udi wasa Yelushalema kabidi; ukungisha ba mu Isalele bakadi bamuangalashibue hohamue.

³ Udi ukolesha badi ne mitshima minyingalale, udi ujingila bilulu ha mputa yabo.

⁴ Udi ujadika bungi bua mitoto, udi uyibikila buonso buai ku mena ai.

⁵ Mukelenge wetu udi munene, udi ne bukole bukumbane; dijingulula diandi dia malu kadiena ne kunfudilu kuadi.

⁶ Yehowa udi wimanyika bahuekele, udi wela bantu babi hanshi ha buloba.

⁷ Imbilai Yehowa misambu ne disakidila dienu; nuimbile Nzambi wetu misambu ne lunkombe.

⁸ Udi ubuikila diulu ne matutu, udi ulongoluela buloba nvula, udi umenesha mashinde ha mikuna.

⁹ Udi uha nyama bia kudia biai, udi ubihesha bana ba bikololo habididilabo.

¹⁰ Kena ne disanka bua bukole bua kabalu, kena ne disanka bua mikolo ya muntu.

¹¹ Kadi Yehowa udi usanka bua badi bamutshina, bua badi ne ditekemena diabo mu luse luandi lujalame.

¹² Wewe Yelushalema, tumbisha Yehowa; wewe Siona, tumbisha Nzambi webe.

¹³ Bualu bua wakukolesha nkanu idi ikuata bibi biebe, wakuvudishila bana bebe badi munda mua ngumbu yebe disanka.

¹⁴ Udi uvuisha ditalala mu matshika ebe, udi ukûkutshisha ne blé udi mutambe buimpe.

¹⁵ Udi utuma mukenji wandi ha buloba; dî diandi didi diya lubilu.

¹⁶ Udi umatshisha neige mufuane miosa ya mikoko; udi umuangalasha mume mukuatakasha mashika bu butue.

¹⁷ Udi umatshisha mabue andi a mashika bu nkototo. Wamanya mua kuimana talalâ ku mpala kua mashika andi nganyi?

¹⁸ Udi utuma dî diandi, udi ulengulula, udi ulehesha luhehele luandi, mai adi ahueka

¹⁹ Udi umanyisha Yakoba di diandi, udi uyisha Bena Isalele mikenji yakafundileye ne mei adiye musue benze.

²⁰ Kena muenzele ba mu tshinga tshisamba nunku nansha; kabena bamanye kulumbulula kuandi. Tumbishai Yehowa!