Misambu 140 - Mukanda wa Nzambi Dihungila Dikulukulu ne Dihungila Dihia-dihia 2003

Badi Balomba Bulami Hadi Bakuabo Babakengesha

¹ Yehowa, umpandishe mu bianza bia bantu babi; undame kudi bena tshimbambila.

² Badi bahangidisha malu mabi mu mitshima yabo, badi basonsola bantu bua kuluanganabo nvita matuku onso.

³ Badi basakisha ndimi yabo bua kutuayi bu ya nyoka, lulengu lua nyoka wa mbanvu ludi mukana muabo.

⁴ Yehowa, undame ku bianza bia bantu babi, undame kudi bena tshimbambila, bakuhangidisha bua kuselemusha makasa anyi.

⁵ Badi badisue bakasokoka buteyi bua kunkuatamu, bakunsokokela masoka; bakuanda bukuondo ha buihi ne nshila, bakume ya mateyi.

⁶ Ndi ngambila Yehowa ne, Wewe udi Nzambi wanyi; Yehowa, teleja matshu ebe ku kutendekena kuanyi.

⁷ Yehowa, Mukelenge wanyi, bukole bua luhandu luanyi, wewe wakubuikila mutu wanyi mu dituku dia nvita.

⁸ Yehowa, kuheshi mundi mubi malu adiye musue; kulumbuluishi bualu buandi bubi buakuhangidisheye.

⁹ Hadi badi bannyunguluke bahisha mitu yabo, malu mabi adi ahatuka mu mishiku yabo ahone ha mutu habo.

¹⁰ Bamatshishe makala a kahia atshidi atema hamʼbidi habo. Bedibue mu kahia, mu majimba male, bua kabajuki kabidi.

¹¹ Muena mukoso kajadikibu mu buloba; dikenga dibi dikebe muena tshimbambila bua kumubutula.

¹² Ndi mumanye ne, Yehowa neabingishe muena dikenga hamulumbuluishabo, nealumbuluile bahele biakane.

¹³ Bulelela, bantu bakane nebasakidile dina diebe; badi ne mitshima miakane nebashikame ku mpala kuebe.