Misambu 137 - Mukanda wa Nzambi Dihungila Dikulukulu ne Dihungila Dihia-dihia 2003

Muadi wa Bena Yuda mu Buhika bua mu Babulona

¹ Hatuakadi hehi ne misulu ya mu Babulona, tuakashikamaku, bulelela, tuakadila, hatuakavuluka Siona.

² Tuakakudika nkombe yetu ku mitshi ya nshiba yakadi mu buloba abu.

³ Bualu bua mu buloba abu bakadi batubuesha mu buhika bakasua kutuimbisha mei a misambu; bakadi banukengesha bakasua tuetu tubimbile musambu wa disanka bamba ne, Nutuimbile musambu wa mu misambu ya mu Siona,

⁴ Netumanye mua kuimba musambu wa Yehowa mu buloba bua bende munyi?

⁵ Yelushalema, binahua bualu buebe muoyo, tshianza tshianyi tshia balume tshihange mudimu watshi!

⁶ Ludimi luanyi lulamate mu tshilakalaka tshianyi, bingikala tshiyi nkuvuluka; bingikala tshiyi ntumbisha Yelushalema ha mutu ha disanka dianyi didi ditamba bunene!

⁷ Yehowa, uvuluke muakenza Bena Edome mu dituku dia makenga a mu Yelushalema, bu muakambabo ne, Ubutulai! Ubutulai, tô ne ku bishimikidi biau!

⁸ Ahu, wewe muana mukashi wa Babulona, udi ne bualu bua kubutudibua, disanka dikale kudi wakuhingashila difutu didi bu bienzedi biwakutuenzela.

⁹ Disanka dikale kudi wakuata bana bebe batekete, wabatuta mitu yabo ku mabue.