Misambu 135 - Mukanda wa Nzambi Dihungila Dikulukulu ne Dihungila Dihia-dihia 2003

Yehowa Udi Munene ne Mpingu Idi Tshianana

¹ Tumbishai Yehowa. Tumbishai dina dia Yehowa. Numutumbishe, nuenu bena mudimu ba Yehowa,

² nuenu badi bimane mu nsubu wa Yehowa, mu biendedi bia mu nsubu wa Nzambi wetu.

³ Tumbishai Yehowa, bua Yehowa udi muimpe; nuimbe misambu ya kutumbisha nʼai dina diandi, bualu ebu budi bulengele.

⁴ Bua Yehowa wakudisunguila Yakoba bua kuikaleye nʼandi, wakadisunguila Isalele bu buhianyi buandi.

⁵ Bualu bua ndi mumanye ne, Yehowa udi munene, ne Mukelenge wetu udi ha mutu ha nzambi yonso

⁶ Yehowa wakenza malu onso akasueye kuenza, mu diulu ne ha buloba, mu mai manene ne mu ndondo yonso.

⁷ Yeye udi ubandisha dibungi ku matengu a buloba, udi wenzela nvula miele ya nvula, udi uhatula luhehele mu bibutshilu biandi.

⁸ Yeye wakashiha banʼa bute ba mu Ejipitu, ba bantu ne ba nyama.

⁹ Yeye wakatuma bimanyinu ne malu a kukema munkatshi muenu, nuenu Bena Ejipitu, biakakengesha Palô ne bena mudimu bandi bonso.

¹⁰ Yeye wakabutula bisamba bia bantu bia bungi, wakashiha bakelenge bakadi ne bukole:

¹¹ Sihona, mukelenge wa Bena Amole, Oga, mukelenge wa Bashana, ne bakelenge bonso ba mu Kanâna.

¹² Wakahesha bantu bandi bukole buabo bu buhianyi, bu buhianyi kudi Bena Isalele, bantu bandi.

¹³ Yehowa, dina diebe didiku tô ne tshiendelele; Yehowa, divuluka dia dina diebe didiku tô ne ku bikondo bionso.

¹⁴ Bualu hua Yehowa nealumbuluile bantu bandi ne kulumbulula kuakane, neafuile bena mudimu bandi luse.

¹⁵ Mpingu ya bisamba bia bantu idi ya tshiamu tshia argent ne tshia or, idi bintu bienza ku bianza bia bantu.

¹⁶ Idi ne mukana, kadi kayena yakula; idi ne mesu, kadi kayena imona.

¹⁷ Idi ne matshu, kadi kayena yunvua; mukana muai kamuena muhuya.

¹⁸ Badi bayenza badi bafuanangana nʼai; bulelela, bonso badi bayeyemena badi nunku!

¹⁹ Nuenu Bena Isalele, nuvudishile Yehowa disanka! Nuenu ba mu tshiota tshia Alona, nuvudishile Yehowa disanka!

²⁰ Nuenu ba mu tshiota tshia Lewi, nuvudishile Yehowa disanka! Nuenu badi banemeka Yehowa, nuvudishile Yehowa disanka!

²¹ Badi mu Siona bavudishile Yehowa disanka, Yeye mene udi mushikame mu Yelushalema! Tumbishai Yehowa!