Misambu 120 - Mukanda wa Nzambi Dihungila Dikulukulu ne Dihungila Dihia-dihia 2003

Badi Balomba bua Kuhandishibua kudi Bena Tshinyangu

¹ Mu dikenga dianyi ndi ndila kudi Yehowa, ne yeye udi ungunvuila.

² Yehowa, uhandishe muoyo wanyi ku mishiku ya mashimi, ku ludimi ludi ludinga.

³ Nebakuhe tshinyi, nebakutentekele bualu bukuabo kai ha mutu, wewe ludimi ludi ludinga?

⁴ Nebakuase mikete misakisha ya muena bukitu, diatshimue ne makala adi atema bikole a ku mutshi wa mukenyi.

⁵ Mulau udi mikuata bua ndi ndala mu Mesheke, bua ndi mushikame munkatshi mua nsubu ya ntenta ya Kedâ!

⁶ Muoyo wanyi wakumana kushikama musangu muhite bule munkatshi mua badi bakina ditalala.

⁷ Ndi nnanga ditalala; kadi hanamba dî bualu buadi, bobo badi basue nvita.