Misambu 108 - Mukanda wa Nzambi Dihungila Dikulukulu ne Dihungila Dihia-dihia 2003

Badi Balomba Dikuatshisha bua Kutamba Bena Lukuna

¹ Nzambi, mutshima wanyi udi mushindike; nengimbe misambu; bulelela, nengimbe misambu ya kukutumbisha nʼai, kukuimbila mbutumbi buanyi.

² Tabalai, nuenu lunzenze ne lunkombe! Meme hanyi nentabashe kabundubundu!

³ Nenkusakidile wewe, Yehowa, munkatshi mua bantu; nenkuimbile misambu ya kukutumbisha nʼai munkatshi mua bisamba bia bantu.

⁴ Bualu bua luse luebe lujalame ludi lunene, lufika tô ne ha mutu ha diulu; lulamatu luebe lua bushuwa ludi lufika ku matutu.

⁵ Nzambi, wikale mubandishibue ne butumbi ha mutu ha diulu! Butumbi buebe buikale ha buloba buonso!

⁶ Bua bantu bebe baudi munange bahandishibue, ubasungile ne tshianza tshiebe tshia bukole, ungitabe.

⁷ Nzambi wakuamba dî mu kudijidila kuandi ne, Nentumbe bianyi, nentahulule buloba bua Shekeme, nengabanye tshibanda tshia Sukota.

⁸ Gilada nguanyi; Manashe nguanyi kabidi; Efelayima udi tshifulu tshia tshiamu ku mutu wanyi; Yuda udi dikombo dianyi dia bukelenge.

⁹ Moaba udi dilonga dianyi dia kuowelamu; nengele Edome tshisabata tshianyi; nengele mbila bua nakutamba Peleshete.

¹⁰ Wanfikisha mu musoko mukolesha ne ngumbu nganyi? Wandombola tô ne ku Edome nganyi?

¹¹ Wewe Nzambi, kuakutubenga, anyi? Nzambi, kuena uluhuka bua kufila misumba ya masalayi etu.

¹² Utuheshe dikuatshisha diebe mu nvita yetu ne bena lukuna, bua dikuatshisha dia bantu didi hatuhu.

¹³ Bituikala ne dikuatshisha dia Nzambi, netuenze bienzedi bia bukitu; bualu bua nyeye udi udiata badi nʼetu lukuna muinshi mua makasa andi.