Misambu 102 - Mukanda wa Nzambi Dihungila Dikulukulu ne Dihungila Dihia-dihia 2003

Badi Batontolola mu Dikenga

¹ Unvua kulomba kuanyi, Yehowa; muadi wanyi ufike kûdi.

² Kusokoki mesu ebe kundi mu dituku dia dikenga dianyi! Teleja matshu ebe kundi, witabe kundi lubilu dituku dindi nkubikila.

³ Bualu bua matuku anyi adi ajimina bu muishi wa kahia, mifuba yanyi idi mishila bu tshishelele.

⁴ Mutshima wanyi udi mutahibue bu mashinde, wakufubidila; bualu bua ndi mpua muoyo bua kudia bidia bianyi.

⁵ Bua muadi mukole wa kutua kuanyi kua mikemu mifuba yanyi idi ilamata ku misunyi yanyi.

⁶ Ndi bu mpunga tshikola wa mu tshihela, nakulua bu tshihungulu tshia mu miaba ya kubutuka.

⁷ Ndi ndala tshitabala, nakulua bu mushamusha udi wikala ha nkayau ha musonga wa nsubu.

⁸ Dinda tô ne dilolo badi nʼanyi lukuna badi bampenda, badi nʼanyi lukuna lutambe bukole badi batela dina dianyi helabo bantu milau.

⁹ Bua nakudia butue bu mundi ndia bidia, nakusangisha binsonshi ne bia kunua bianyi,

¹⁰ bualu hua njiya yebe ne tshiji tshiebe kundi. Bua wewe wakungambila, wakunguisha.

¹¹ Matuku anyi adi bu mundidimbi udi uleha hamba diba kubuela; nakufubidila bu mashinde.

¹² Kadi wewe Yehowa, udi mushikame mu nkuasa wa butumbi kashidi; nebakuvuluke tô ne ku bikondo bionso.

¹³ Wewe neujuke, nenfuile musoko wa Siona luse; bua tshikondo tshiakufika tshia kuwanyisha; e, tshikondo tshiwakuamba tshiakufika.

¹⁴ Bualu bua bantu bebe badi ne mabue au dinanga, badi bafuila luhuishi luau luse.

¹⁵ Nunku ba mu bisamba bia bantu nebatshine dina dia Yehowa, bakelenge bonso ba ha buloba nebatshine butumbi buebe.

¹⁶ Bualu bua Yehowa neibake Siona kabidi, neamueneke mu butumbi buandi.

¹⁷ Neateleje matshu andi ku kulomba kua bakengi, kena ulengulula mulombu wabo.

¹⁸ Bafundile ba mu tshikondo tshialua bualu ebu, bua bantu balueye kufuka batumbishe Yehowa.

¹⁹ Bualu bua wakuntangila hanshi ku muaba wandi wa tshijila wa mulu. Mu diulu mudi Yehowa mumone buloba,

²⁰ bua kunvueye kutua kua mikemu kua bena lukanu, bua kusululeye bantu badi bamane kuhisha bua kufua,

²¹ bua bantu bambile ba mu Siona dina dia Yehowa, babamanyishe butumbi buandi mu Yelushalema,

²² badisangisha bantu hohamue, hadisangisha makelenge kabidi, bua kukuatshilabi Yehowa mudimu.

²³ Wakutekesha bukole buanyi mu nshila mundi nyilamu; wakukehesha matuku anyi.

²⁴ Ndi ngamba ne, Nzambi wanyi, kungumushi hankatshi ha matuku anyi, wewe muena bidimu bidi bileba tô ne ku bikondo bionso.

²⁵ Wewe wakajadika bishimikidi bia buloba kale kale, bia mu diulu bidi bienzedi bia bianza biebe.

²⁶ Bintu ebi nebijimine, kadi wewe udi ushala tshiendelele; e, buonso buabi nebikulukashe bu tshivualu. Wewe neubishintakashe bu mudibo bashintakasha tshitalu, nebikudimuke.

²⁷ Kadi wewe udi muomumue, ne bidimu biebe kabiena ne nshikidilu.

²⁸ Bana baledibue ba bantu bebe nebashikame mu buloba talalâ, ne tunkanunuma tuabo netujadikibue ku mpala kuebe.