Mika 6 - Mukanda wa Nzambi Dihungila Dikulukulu ne Dihungila Dihia-dihia 2003

Yehowa Udi ne Luhata ne Bena Isalele

¹ Unvuai dî didi Yehowa wamba, Bikai bienu, nulumbulule ku mpala kua mikuna minene; mikuna mikese yunvue dî dienu!

² Nuenu mikuna minene, unvuai mpata idi Yehowa nʼai; telejai matshu, nuenu bishimikidi bia buloba, bualu bua Yehowa udi ne mpata kudi bantu bandi, ne yeye nealumbulule ne Bena Isalele.

³ Bantu banyi, nakunuenzela tshinyi? Nakunutonda munyi? Nungambile.

⁴ Bualu bua nakanuluhula mu buloba bua Ejipitu, nakanuhikula mu nsubu wa buhika; nakatuma Mose, Alona ne Miyama ku mpala kuenu.

⁵ Bantu banyi, vulukai bienu mpindiu bualu buakahangidisha Balaka, mukelenge wa Bena Moaba, bua kuenza; ne mei akamukudimunabo kudi Belâma, muana wa Beô; vulukai luendu lua ku Shitima tô ne ku Gilegala, bua nuenu nujingulule bienzedi biakane bia Yehowa.

Malu Adi Yehowa Utekemena

⁶ Ndue ne tshintu kai ku mpala kua Yehowa bua kukukuila Nzambi Mutambe Bunene wa mu diulu? Ndue ku mpala kuandi ne milambu ya kuosha, ne ya bana ba ngombe ba tshidimu tshimue, anyi?

⁷ Yehowa neasanke bua binunu bia bimpanga, ne binunu dikumi bia misulu ya manyi, anyi? Nfile muanʼa bute wanyi bua malu mabi anyi, diminu dia mubidi wanyi bua bubi bua mutshima wanyi, anyi?

⁸ Wewe kampanda, bakukulesha bualu budi buakane; ne Yehowa udi utekemena malu kai kûdi? Anu bua wewe kuenza malu makane, kunanga kulesha bakuabo luse, ne kuenda ne Nzambi webe ne mutshima muhuekele.

⁹ Dî dia Yehowa didi diedibua mu musoko, muena meji neatshine dina diandi.

¹⁰ Biuma biakuhetabo ku bibi bitshidi mu nsubu ya bantu babi, anyi? Tshihiminu tshia buivi tshindi ngela mulau tshidimu, anyi?

¹¹ Ndi mumanye mua kuitabusha muntu udi ne tshihiminu tshidi tshidinga, ne udi ne tshibombi tshia bihiminu bidi biba, bu muena mutshima mutoke, anyi?

¹² Bualu bua bantu babanji ba mu musoko eu badi bûle tente ne tshimbambila, ne bena musoko badi bamba malu a mashimi, ludimi luabo ludi anu ne mashimi mukana muabo.

¹³ Nunku meme kabidi nennutahe, nennubutule bualu bua mibi yenu.

¹⁴ Nenudie, kadi kanuena nukuta; tshiole netshikale munkatshi muenu. Nansha wewe inulame bantu bebe ne bintu biebe, kuena unsungila; nembibutule ne muele wa nvita.

¹⁵ Nenukune maminu, kadi kanuena nuahuola; nenudiate tumuma tua olive, kadi kanuena nudilaba mafuta atu; nenudiate tumuma tua nyinyo mu tshikaminu, kadi kanuena nunua nyinyo yatu.

¹⁶ Bualu bua nudi nutumikila mikenji ya Omeli, nudi nulonda bienzedi bia mu nsubu wa Ahaba, nudi nuenda bu mudi lungenyi luabo, meme nenyishe musoko wenu tshikulu, ne bantu badimu nebedibue tshibingu, ne nuenu nenuhendibue ne bihendu bidibo bahenda nʼabi bantu banyi.