Mika 1 - Mukanda wa Nzambi Dihungila Dikulukulu ne Dihungila Dihia-dihia 2003

Mika Udi Udila bua Samalea ne Yelushalema

¹ Dî dia Yehowa diakalua kudi Mika, Muena Molesheta, mu matuku a Yotama, Ahaza ne Hezikiya, bakelenge ba Yuda, bualu bua Samalea ne Yelushalema.

² Unvuai, nuenu bantu, buonso buenu; telejaiku, wewe buloba ne bintu biebe bionso. Mukelenge Yehowa, Mukelenge mu ntempelo wandi wa tshijila, anuleshe.

³ Monai, Yehowa udi uhatuka mu muaba wandi, neahueke hanshi ne neadiate ha mitu ha mikuna ya ha buloba.

⁴ Mikuna neyivingutuke muinshi mua makasa andi, bibanda nebihandike mitanta, bu dihula mu kahia, bu mai ahueka ha tshibungubungu.

⁵ Bua kutomboka kua Bena Yakoba malu â onso adi alua, ne bua mibi ya tshisamba tshia Bena Isalele. Kutomboka kua Bena Yakoba ntshinyi? KanSamalea, anyi? Bubi bua Bena Yuda budi tshinyi? KanYelushalema, anyi?

⁶ Bua malu â nenvuishe Samalea bu mushiki wa mabue mu budimi, bu madimi a kukuna tumuma tua nvinyo. Nembungulushe mabue andi mu tshibanda, nemmueneshe bishimikidi biandi hatoke tô.

⁷ Nebatshibule mpingu yabo yonso misonga bituha, neboshe bintu biabo bionso biakafilabo kudi mpingu mu kahia, ne nembutule mpingu yabo yonso yakafulabo. Bualu bua bakabiheta ku difutu dia mukashi wa masandi, nebihingane kudi mukashi wa masandi bu difutu diandi.

⁸ Bua muanda eu nengase muadi, nendile, nengende butaka ne ku makasa kutuhu; nengase muadi bu wa mibuabua, nendile ne kudila bu kua nyunyu wa nfiondo.

⁹ Bualu bua mputa wakumutahabo kena mua kuondahibua, bualu bua wakufika tô ne ku Yuda; wakufika ku tshibi tshidi bantu hanyi babuelela, ku Yelushalema mene.

¹⁰ Kanuambi bualu ebu mu Gata, kanudidi nansha. Mu Betele-afela nudibonde mu dinfuenkenya.

¹¹ Hita biebe, muana mukashi udi mushikame butaka, udi mufuishibue bundu mu musoko wa Shafila. Muana mukashi wa mu musoko wa Sânana kena muanji kuluhukamu. Muadi wa Bete-esele neunuhumbishe bua kuimana hehi nʼandi.

¹² Muana mukashi udi mushikame mu Malota udi uhampakana hadiye windila lumu luimpe. Bualu bua dikenga difume kudi Yehowa diakufika tô ne ku tshibuelelu tshia ku Yelushalema.

¹³ Suika makalu ku tubalu tudi tuenda lubilu, wewe muana mukashi udi mushikame ku Lakisha. Wewe wakadi tshibangidilu tshia bubi kudi muana mukashi wa mu Siona, bualu bua bakasangana malu mabi a Bena Isalele kûdi.

¹⁴ Nunku bûdi nʼabu mbua kufila tshintu tshia kulayangana nʼatshi kudi Molesheta-Gata. Nsubu ya Akiziba neyilue tshilenduishi kudi bakelenge ba Isalele.

¹⁵ Wewe, muana mukashi udi mushikame mu Malesha, nendue kukuha muntu udi ukuhiana. Butumbi bua Isalele nebulue ku Adulama.

¹⁶ Dikungula mutu, kosa nsuki yebe yonso, bua kujinga bana baudi usankila; ubeye dibala mu mutu bu dia nyunyu wa mukanku, bualu bua nebumushibue kûdi bua kuya mu buhika kule.