Malaki 2 - Mukanda wa Nzambi Dihungila Dikulukulu ne Dihungila Dihia-dihia 2003

Yehowa Udi Uhisha Bena Isalele bua Buhidia Buabo

¹ Nuenu, bakuidi, mukenji eu udi kunudi.

² Yehowa wa misumba udi wamba ne, Binuikala kanuyi baunvuile, ne binuikala kanuyi bauteka mu mitshima yenu, bua kunemeka dina dianyi, nennutumine mulau, nenkudimune masanka enu alue milau; eyo, nakumana kuavuisha milau, bualu bua kanuena nuteka dî dianyi mu mitshima yenu.

³ Monai, nentekeshe maboko enu, nendabe tunvi ha mpala henu, tunvi tua nyama mifila bu milambu mu bidia bienu bia disanka; nebaye nʼenu ku muaba udibo batuimasha.

⁴ Yehowa wa misumba udi wamba ne, Nenujingulule ne meme nakunutumina mukenji eu, bua tshihungidi tshinakadi nʼatshi ne Bena Lewi tshijalame.

⁵ Tshihungidi tshianyi tshiakadi kudibo tshiakadi tshia muoyo ne ditalala, nakabahabi bua bantshine; ne bobo bakatshina, bakakuatshika buowa bua dina dianyi.

⁶ Diyisha dia mei a bushuwa diakadi mukana muabo, ne mei mabi kakahatuka ku mishiku yabo. Bobo bakenda nʼanyi mu ditalala ne mu buakane, bakadimusha mitshima ya ba bungi bua balekele bubi buabo.

⁷ Bualu bua mishiku ya muakuidi idi ne bua kulama lungenyi, ne bantu badi ne bua kukeba diyisha diakane mukana muandi; bualu bua yeye udi messager wa Yehowa.

⁸ Kadi Yehowa wa misumba udi wamba ne, Nuenu nuakusesuka mu nshila; nuakulenduisha ba bungi ku diyisha dienu; nuakunyanga dihungila dia Bena Lewi.

⁹ Bua malu â nennuvuishe bantu bahetudibue ne bahuekeshibue ku mpala kua bantu bonso, bualu bua kanuena nulama mei anyi, kadi nudi nulesha bantu kansungusungu mu diyisha dia mikenji.

¹⁰ Tuetu bonso katuena ne tatu umue, anyi? Nzambi umue kakatufuka, anyi? Bualu kai tudi tusonguelangana, tunyanga bietu dihungila dia batatu betu?

¹¹ Yuda wakalekela Yehowa, tshinyangu tshiakenjibua mu Isalele ne mu Yelushalema; bualu bua Yuda wakanyanga tshitendelelu tshia Yehowa tshidiye unanga, ne wakubaka mukashi mutendeledi wa nzambi wa bende.

¹² Yehowa umushe muntu udi wenza nunku mu ntenta ya Yakoba, nansha mukonki nansha muitabi, nansha udi ulua ne mulambu kudi Yehowa wa misumba.

¹³ Eu mmunga muanda unudi nuenza kabidi: Nudi nubuikila tshioshelu tshia Yehowa ne binsonshi ne kudila ne kuhumuna kuenu, bualu bua yeye katshiena utangisha mesu andi ku mulambu ne katshiena uwitabusha ne disanka ku bianza bienu.

¹⁴ Nuenu nudi nukonka ne, Bualu kai? Mbualu bua Yehowa wakadi mumonyi wa hankatshi hebe ne mukashi wa ku bunsongalume buebe awakulekela; kadi yeye udi muena kuebe ne mukashi wa dihungila diwakuhunga.

¹⁵ Nzambi kakatufuka ne kakatuha muoyo, anyi? Yeye udi ukeba tshinyi? Udi ukeba bana badi banemeka Nzambi. Nunku nudimuke bienu bua umue wenu kalekedi mukashi wa ku bunsongalume buandi.

¹⁶ Yehowa, Nzambi wa Isalele, udi wamba ne, Ndi nkina dishiha dia dibaka; Yehowa wa misumba udi wamba ne, Ndi nkina muntu udi ukengesha mukashi wandi nunku. Nudimuke bienu, bua nuenu kanulekedianganyi.

Dituku dia Kulumbulula Didi ha Buihi

¹⁷ Nuakutondesha Yehowa ne mei enu. Kadi nudi nukonka ne, Tuakumutondesha munyi? Hanuamba ne, Muntu yonso udi wenza malu mabi udi muakane ku mesu kua Yehowa, ne yeye udi usanka bualu buandi; anyi hanuakonka ne, Nzambi utu walumbulula bilumbu ne kulumbulula kuakane udi kudi kunyi?