Malaki 1 - Mukanda wa Nzambi Dihungila Dikulukulu ne Dihungila Dihia-dihia 2003

Yehowa Udi Unanga Yakoba

¹ Dî dia tshijila dia Yehowa diakambileye Bena Isalele mukana mua Malaki.

² Yehowa udi wamba ne, Nakunusua, kadi nudi nuamba ne, Wakutunanga munyi? Yehowa udi ukonka ne, Esau kakadi muanʼabo ne Yakoba, anyi? Nakananga Yakoba,

³ kadi nakadi ne Esau lukuna; nakavuisha mikuna yandi tshihela tshia tshianana, nakavuisha buhianyi buandi muaba wa mibuabua ya mu mpata.

⁴ Biamba Edome ne, Bakatubutula, kadi netuibake mu bikulu kabidi, Yehowa wa misumba udi wamba ne, Base biabo, kadi meme nenguhule. Bakuabo nebababikile ne, Buloba bua bubi, ne Bantu badi Yehowa nʼabo tshiji tshiendelele.

⁵ Mesu enu neamone malu â, nenuambe ne, Yehowa udi munene, nenuambe dî edi tô ne mu miaba mihite butshika bua buloba bua Isalele.

Yehowa Udi Uhisha Bakuidi

⁶ Muana wa balume udi unemeka tatuʼandi, muhika udi unemeka nfumu wandi; kadi bingikala tatu, kunemekibua kuanyi kudi hanyi? Bingikala mukelenge, dintshina didi hanyi! Edi ndikonka dia Yehowa wa misumba kunudi, nuenu bakuidi, badi balengulula dina dianyi. Kadi nudi nunkonka ne, Tuakulengulula dina diebe munyi?

⁷ Nudi nufila bia kudia binyanguka ha tshioshelu tshianyi. Nudi nunkonka ne, Tuakubinyanga kudi kunyi? Nudi nubinyanga hanuamba ne, Mesa a Yehowa adi tshintu tshia kulengulula.

⁸ Hanuafila nyama idi ne bufofo, kambualu bubi, anyi? Hanuafila mikuabo idi milema ne idi misame, kambualu bubi, anyi? Binuayifila kudi gouverneur wenu, yeye neikale nʼenu disanka, anyi? Yehowa wa misumba udi unukonka nunku.

⁹ Kadi ndi nnuambila mpindiu ne, Kebai diakalengele kudi Nzambi bua yeye atuleshe luse luandi; bua muanda eu unuakuenza ku bianza bienu, yeye neanuanyishe ne disanka, anyi? Yehowa wa misumba udi unukonka nunku.

¹⁰ Nakadi kusua bua muntu wa munkatshi muenu inshile bibi bia ku biendelu bia mu ntempelo bua nuenu kanutemeshi kahia ha tshioshelu tshianyi tshianana! Yehowa wa misumba udi wamba ne, Tshiena ne disanka bua malu enu, tshiena ngitabusha mulambu ku tshianza tshienu.

¹¹ Yehowa wa misumba udi wamba ne, Ku kuhatuka kua diba tô ne ku kubuela kuadi dina dianyi didi dinene munkatshi mua ba mu bisamba bia bantu. Mu muaba wonso badi bangoshila musenga wa manananshi ne badi bafila mulambu, mulambu muakane mene, mu dina dianyi; bualu bua dina dianyi didi dinene munkatshi mua ba mu bisamba bia bantu.

¹² Kadi nuenu nudi nunyanga dina dianyi, hanuamba ne, Mesa a Yehowa adi mabiha, ne bia kudia biandi, milambu ya ha mesa, mbintu bia kulengulula.

¹³ Yehowa wa misumba udi wamba ne, Nuenu nudi nuamba ne, Monai mudi bualu ebu butulonda! Nuakubilengulula, nuakulua ne nyama inuakunyenga ku bukole, milema ne misame; nudi nulua nʼabi bu milambu! Ndi mua kubitabusha ku bianza bienu, anyi? Edi ndikonka dia Yehowa.

¹⁴ Kadi mulau wikale kudi udi udinga, udi ne mulume wa mikoko mu bimuna biandi, udi ulaya bua kumufila, hashishe, udi ufila mukuabo udi mulema kudi Yehowa. Yehowa wa misumba udi wamba ne, Meme ndi Mukelenge mimene, dina dianyi didi ditshinyisha ha mu bisamba bia bantu.