Luke 5 - Mukanda wa Nzambi Dihungila Dikulukulu ne Dihungila Dihia-dihia 2003

Petelo udi ukuata mishiha ya bangi

¹ Hakadiye muimane ku muelelu wa dishiba dia Genesaleta, bantu ba bungi bakamunguila bua kunvua dî dia Nzambi;

² wakatangila matu abidi kukala kua mai, kadi bilembi biakadi bimane kuluhuka, biakadi biuvua tuhamba tuabi.

³ Wakabuela mu buatu bukuabo, buakadi bua Simona, wakamuambila ne, Semesha buatu tshituha tshibi mu mai. Wakashikama mu buatu, wakayisha bisumbu bia bantu.

⁴ Hakalekeleye kuakula, wakambila Simona ne, Semesha buabi ku mai male, nuhuekeshe tuhamba, nukuate minyinyi.

⁵ Simona wakandamuna ne, Mukelenge, tuakadi ne mudimu butuku tô, katuakukuata tshintu; kadi nempuekeshe tuhamba bualu bua dî diebe.

⁶ Hakenzabo nunku, bakakunguisha minyinyi ya bungi; tuhamba tuabo tuakamba kutuanyika;

⁷ bakaloba ba bilembi nʼabo bakadi mu buatu bukuabo ne, Luai nutukuatshishe. Bakalua, bakûsha matu abidi tente, akamba kudina.

⁸ Hakamona Simona Petelo bualu ebu, wakadihonena hanshi ku binu bia Yesu, wakamba ne, Mukelenge, Umuka kundi, bualu bua meme ndi muntu bubi.

⁹ Wakakema ne bonso bakadi nʼandi bualu bua bungi bua minyinyi yakakuatabo;

¹⁰ Yakobo ne Yone, bana ba Zebedayo, ba bilembi ne Simona, bakakema kabidi Yesu wakambila Simona ne, Kutshinyi, katataka tô ne tshiendelele wewe neukuate bantu.

¹¹ Hakaluabo ne matu abo ku mpata, bakâshla, bakamulonda.

Yesu udi ulengesha muena nsudi

¹² Hakadiye mu musoko mukuabo, muntu wakadiku, wakadi ne disama dia nsudi dia bungi; hakamoneye Yesu, wakatua mpala hanshi, wakamutendekena, wakamba ne, Mukelenge, biwasua, udi mumanye mua kundengesha.

¹³ Yetu wakuolola tshianza tshiandi, wakamulenga ne, Ndi musue, wikale mulengeshibue. Nsudi yakamulekela lukasa.

¹⁴ Yesu wakamuambila bikole ne, Kuambidi muntu bualu ebu; uye biebe, udimueneshe kudi muakuidi wa Nzambi, udie biakamba Mose bu tshimanyishilu ku mesu kua bantu bualu bua kulengeshibua kuebe.

¹⁵ Kadi lumu luandi tuakatamba kumuangalaka; bantu ba bungi bakahia bua kunvua dî diandi, ne bua kubakolesheye ku matekete abo.

¹⁶ Kadi yeye wakaya biandi mu bihela, wakatendelela Nzambi.

Yesu udi ukolesha muena kaneke

¹⁷ Dituku dikuabo yeye wakadi uyisha bantu; Bafalese ne bayishi ba mikenshi ya Mose bakadi bashikame ha buihi, bafume ku misoko yonso ya Galela ne ya Yudaya ne ku Yelushalema; bukole bua Mukelenge buakadi nʼandi bua kuondaheye nʼabu bantu.

¹⁸ Bakalua ne muntu wakadi ne kaneke mulale mu bulalu; bakakeba kubuela nʼandi mu nsubu bua kumuladika ku mpala kua Yesu.

¹⁹ Hakahangabo mua kubuela nʼandi bualu bua tshisumbu tshia bantu, bakabanda ha mutu ha nsubu, bakalamuna mampana akadi ku musaka, bakamuhuekesha ne bulalu buandi hankatshinkatshi ku mpala kua Yesu.

²⁰ Hakamoneye ditabusha diabo, wakamba ne, Mulumiana, mibi yebe idi mijimishibue.

²¹ Bafundi ne Bafalese bakabanga kukonkangana ne, Muntu eu udi uhenda Nzambi nganyi? Muntu kai udi mumanye mua kujimisha mibi, anu Nzambi nkayandi?

²² Hakamanya Yesu dikonkangana diabo, yeye wakabandamuna ne, Nudi nukonkelangana nunku munda muenu tshinyi?

²³ Tshidi tshitambe butekete ntshinyi, kuambila umena kaneke ne, Mibi yebe idi mijimishibue; anyi kumuambila ne, Bika, enda biebe?

²⁴ Kadi bua nuenu mimanye ne, Muana wa muntu udi ne bukole, hatshidiye ha buloba, bua kujimisha mibi (yeye wakambila muena kaneke ne), Ndi nkuambila ne, Bika biebe, ambula bulalu buebe, ya ku nsubu kuebe.

²⁵ Wakabika lukasa ku mesu kuabo, wakambula tshiakadiye mulale, wakaya ku nsubu kuandi, utumbisha Nzambi.

²⁶ Buonso buabo bakakema, bakatumbisha Nzambi; buowa buakabakuata, bakamba ne, Lelu tuakutangila malu a kukema.

Yesu udi ubikila Matayo

²⁷ Hakashika malu â, yeye wakumukaku, wakamona musangishi wa mulambu, dina diandi Lewi, mushikame ku tshilambuidi, wakamuambila ne, Undonde.

²⁸ Wakashîa bintu bionso, wakabika, wakamulonda.

Yesu adi ubela Bafalese ne bafundi

²⁹ Lewi wakamulambishila bidia bia bungi mu nsubu muandi; basangishi ba mulambu ba bungi ne bantu bakuabo kabidi bakadi bashikame nʼabo ku mesa.

³⁰ Bafalese ne bafundi babo bakajiana bayidi ba Yesu, bakabakonka ne, Nudi nudila, nudi nunuina ne basangishi ba mulambu ne bantu babi tshinyi?

³¹ Yesu wakabandamuna ne, Badi ne bukole kabena ne muondahi bualu, anu badi ne mabedi.

³² Tshiakuluila bua kubikila badi bakane bua kukudimunabo mitshima yabo, nakuluila bua kubikila anu badi babi.

³³ Bakamuambila ne, Bayidi ba Yone batu bajila bia kudia misangu ya bungi, batu balomba Nzambi, bayidi ba Bafalese batu benza nunku kabidi; kadi bebe batu badia, batu banua.

³⁴ Yesu wakabakonka ne, Nudi bamanye mua kujidisha balunda ba mubaki wa mukashi bia kudia, hatshidi mubaki wa mukashi nʼabo, anyi?

³⁵ Kadi matuku makuabo nealue; habanyengabo mubaki wa mukashi, nebajile bia kudia matuku au.

Lusumuinu lua tshivualu ne lua milondo ya biseba

³⁶ Yeye wakabelela lusumuinu ne, Bantu kabatu bahanda tshihesa tshia tshmialu tshihia-tshihia bualu bua kutshitelalula ha tshmialu tshikulukulu; bienzabo nunku, nebabande tshivualu tshihia-tshihia, ne tshihesa tshiatshi kabidi katshiena tshiakanangane ne tshikulukulu.

³⁷ Bantu kabatu bela maluvu mahia-mahia mu milondo ya biseba bikulukulu; bienzabo nunku, malulu neahande biseba, neaye hanshi, ne biseba nebifue.

³⁸ Kadi bidi bimpe bia kuelabo maluvu mahia-mahia mu milondo ya biseba bihia-bihia.

³⁹ Bikala muntu munue maluvu makulukulu, yeye kena musue mahia-mahia; bualu bua yeye neambe ne, A kale adi matambe.