Luke 4 - Mukanda wa Nzambi Dihungila Dikulukulu ne Dihungila Dihia-dihia 2003

Diabolo adi uteya Yesu

¹ Yesu wakadi mûle tente ne Nyuma Muimpe, wakafuma ku Yadene, Nyuma wakamulombola mu tshihela tô matuku makumi anai,

² Diabolo wakadi umuteya. Kakadia tshintu matuku au; hakashikau, yeye wakadi ne nsala.

³ Diabolo wakamuambila ne, Biwikala Muana wa Nzambi, amba dibue edi diandamuke mutanda wa bidia.

⁴ Yesu wakamuandamuna ne, Bakafunda dî ne, Muntu kikadi biandi ne muoyo bualu bua bidia nkayabi.

⁵ Diabolo wakabanda nʼandi, wakamulesha makelenge onso a ha buloba tshikondo tshimue.

⁶ Diabolo wakamuambila ne, Nenkuhe bukokeshi ebu buonso ne butumbi bua makelenge au; bakamana kubumpa; muntu yonso undi musue kumuhabu, nemuhebu.

⁷ Biwankukuila, nebuikale buebe.

⁸ Yesu wakamuandamuna ne, Bakafunda dî ne, Kukuila Mukelenge Nzambi webe, umuenzele yeye nkayandi mudimu.

⁹ Diabolo wakaya ngandi ku Yelushalema, wakamushikika ha musonga wa ntempelo, wakamuambila ne, Biwikala Muana wa Nzambi, udiele hanshi,

¹⁰ bualu bua bakafunda ne, Yeye neakufile mu bianza bia banjelo bandi, bakulame;

¹¹ Ne dî dikuabo ne, Nebakutuale mu bianza biabo, Bua wewe kukumi dikasa diebe ku dibue.

¹² Yesu wakamuandamuna ne. Bakamba ne, Kuteyi Mukelenge Nzambi webe.

¹³ Hakashikisha diabolo mateyi onso, wakamusha tô ne ku tshikondo tshikuabo.

Yesu udi uhingana mu Galela

¹⁴ Yesu wakahingana mu Galela ne bukole bua Nyuma; lumu luandi luakatangadika mu luseke elu luonso.

¹⁵ Yeye wakabayisha mu bitendelelu biabo, buonso buabo bakadi bamutumbisha.

Yesu udi mu nsunagoga wa Nazaleta

¹⁶ Yeye wakalua ku Nazaleta kuakakoleleye; wakabuela mu nsunagoga dituku dia Lumingu lua Bayuda bu muakadi tshilele tshiandi, wakimana bua kubala mukanda.

¹⁷ Bakamulesha mukanda wa muprofete Yeshaya. Yeye wakavungulula mukanda, wakamona muaba wakafundabo ne,

¹⁸ Nyuma wa Nzambi udi hamʼbidi hanyi, Bualu bua yeye wakangela manyi ha mutu ne, Ambila bantu bahele lumu luimpe; Yeye wakuntuma ne, Ambila bena lukanu bualu bua dikohoka diabo, Ne bafofo bualu bua kutabasha kua mesu abo, Uhe badi batata budishikaminyi,

¹⁹ Ambila bantu bualu bua tshidimu tshiakitabusha Mukelenge.

²⁰ Yeye wakavunga mukanda, wakauhingisha mu bianza bia mulami wau, wakashikama; bonso bakadi mu nsunagoga bakamutangila talalâ.

²¹ Yeye wakabanga kubambila ne, Lelu bualu ebu buakafundabo buakujalama mu matshu enu.

²² Bantu bonso bakamuvidila, bakakema bualu bua mei a luse akaluhuka mukana muandi, bakakonka ne, Yeye ke muana wa Yosefe, anyi?

²³ Yeye wakabambila ne, Bulelela, nenungelele lusumuinu ne, Wewe muena buanga, udiondahe, enza biebe kuenu malu atuakunvua wenza ku Kapênuma.

²⁴ Yeye wakamba ne, Bulelela, udi nuambila ne, Kabatu bitabusha muprofete kudi ba ku luseke luabo.

²⁵ Bulelela, ndi nuambila ne, Bakashi ba mu lufuila ba bungi bakadi mu Isalele mu matuku a Eliya, hakadi diulu dibuikila bidimu bisatu ne ngondo isambombo, ha kalua tshiole tshinene ha buloba bu onso;

²⁶ kadi Eliya kakatumibu a kudi bakuabo, anu ku Salefata mu boloba bua Sidona, kudi mukashi wakadi mu lufuila.

²⁷ Bena nsudi ba bungi bakadi mu Isalele mu matuku a muprofete Elisha; kadi bakuabo kabakalengeshibua, anu Nâmana Muena Sulia.

²⁸ Bantu bonso bakadi mu nsunagoga bakûlangana ne tshishi, hakunvuabo malu â.

²⁹ Bakabika, bakamuihata mu musoko, bakalua nʼandi ku mutu kua mukuna wakadibo base musoko bua kumukuha ma luhongo mutu muinyika munshi.

³⁰ Yeye wakahita munkatshi muabo, wakaya biandi.

Yesu udi uya ku Kapênuma, udi umusha nyuma ya bukoya munda mua bantu

³¹ Wakahueka ku Kapênuma, musoko wa Galela. Wakabayisha dituku dia Lumingu lua Bayuda;

³² diyisha diandi diakabakemesha, bualu bua dî diandi diakadi ne bukole.

³³ Mu nsunagoga muakadi muntu wakadi ne nyuma wa demon wa bukoya, wakela dî diandi bikole ne,

³⁴ Ei! Wewe Yesu, Muena Nazaleta, tudi nʼebe bualu kai? Wewe wakulua bua kutushiha, anyi? Ndi mukumanye, wewe udi Wa Tshijila wa Nzambi.

³⁵ Yesu wakamusamina ne, Hua, Umuka munda muandi. Hakamuela demon hanshi munkatshi muabo, wakumuka munda muandi, kai mumuenzele bibi.

³⁶ Buowa buakabakuata bonso, bakakonkangana ne, Edi ndî kai? Yeye udi ne bukokeshi ne bukole bua kuela nyuma ya bukoya dî, yumuke munda mua bantu.

³⁷ Lumu luandi luakaya mu miaba yonso ya luseke alu.

Yesu udi ukolesha muku wa Petelo mukashi ne bantu bakuabo ba bungi

³⁸ Wakabika mu nsunagoga, wakabuela mu nsubu wa Simona. Muku wa Petelo mukashi wakadi ne mubidi wandi mukuatshike kahia ka bungi; bakasengelela Yesu bua disama diandi.

³⁹ Yeye wakimana mumuinangile, wakakandika disama dia kahia; diakamulekela; yeye wakabika lukasa, wakabalongoluela bia kudia.

⁴⁰ Hakamba diba kubuela, bonso bakadi ne bakuatshike mabedi a bungi bakalua nʼabo kudiye; wakabalenga bianza buonso buabo, wakabakolesha.

⁴¹ Bademon bakumuka munda mua bantu ba bungi, bela dî bikole ne, Wewe udi Muana wa Nzambi. Yeye wakabasamina, kakitabusha bua bobo kuakula, bualu bua bobo bakamanya ne, Yeye udi Kilisto.

⁴² Hakatshia butuku, wakaluhuka, wakaya mu tshihela; bantu ba bungi bakamukeba, bakalua kudiye, bakakeba kumuhumbisha ne, Kumuki munkatshi muetu.

⁴³ Kadi yeye wakabambila ne, Bundi nʼabu mbua kuambila misoko mikuabo lumu luimpe lua bukelenge bua Nzambi; buakantuminabo mbualu ebu.

⁴⁴ Yeye wakadi wamba bualu bua Nzambi mu nsunagoga ya mu Galela.