Luke 24 - Mukanda wa Nzambi Dihungila Dikulukulu ne Dihungila Dihia-dihia 2003

¹ Kadi hakatshia butuku dituku dia kumudilu dia lumingu, bakashi bakalua ku lukita ne bintu bia muhuya muimpe biakalongololabo.

² Bakasangana dibue diumusha ku mushiku wa lukita.

³ Bakabuelamu, kabakasangana tshitalu tshia Mukelenge Yesu.

⁴ Hakadibo balubakana bua bualu ebu, monai, balume babidi bakadi bimane ha buihi nʼabo baluate bilulu biengelela.

⁵ Hakatshinabo, hakatuabo mpala hanshi, balume bakabakonka ne, Nudi nukebela udi ne muoyo munkatshi mua bafue tshinyi?

⁶ Yeye kena kunoko, wakubika; numiluke bu muakanuambileye hakadiye mu Galela ne,

⁷ Budi Muana wa muntu nʼabu mbua kumufilabo mu bianza bia bantu babi ne bua kumushihabo ku mutshi mutshiamakane ne bua kubikeye kabidi hahita matuku asatu.

⁸ Bakavuluka mei andi,

⁹ bakumuka ku lukita, bakahiana, bakambila bayidi dikumi ne umue ne bakuabo bonso malu â onso.

¹⁰ Bakashi aba bakadi Malia wa ku Magadala ne Yoana ne Malia mamu wa Yakobo; bakashi bakuabo kabidi bakadi nʼabo bakambila bapostolo malu â.

¹¹ Kadi mei â akadi bu biakulakula ku matshu abo, kabakitabusha muakambabo.

¹² Kadi Petelo wakabika, wakaya lubilu ku lukita; wakinangila, wakatangilamu, wakamona bilulu bia line ha buabi; wakahingana kuandi ukema bua malu au.

Yesu udi umueneka kudi bayidi bandi babidi mu nshila wa ku Emau

¹³ Dituku adi mene babidi babo bakadi baya ku musoko dina diau Emau, ku Yelushalema ne ku musoko au kuakadi ntanta bu kilometa dikumi ne umue.

¹⁴ Bakadi bayikila bua malu â onso akalua.

¹⁵ Hakadibo bayikila bakonkangana, Yesu mene wakalua nʼabo ha buihi, wakenda nʼabo.

¹⁶ Kadi mesu abo akadi bitayitayi, kabakamumanya.

¹⁷ Yeye wakabakonka ne, Nudi nuenda nuyikidila tshinyi? Bobo bakimana babungame.

¹⁸ Mukuabo, dina diandi Keleopa, wakamukonka kabidi ne, Ahu wewe udi muenyi udi usomba ha nkayebe mu Yelushalema kui mumanye malu akulua matuku â?

¹⁹ Yeye wakabakonka ne, Malu kai? Bakamuambila ne, Malu a Yesu, Muena Nazaleta, wakadi biandi muprofete mukole mu bienzedi ne mu mei ku mpala kua Nzambi ne kua bantu bonso;

²⁰ bakuidi banene ne miloho yetu bakamufila bua kumuhishabo ne lufu, ne bua kumushihabo ku mutshi mutshiamakane.

²¹ Kadi tuetu tuakadi bamutekemene ne, Nyeye wahikula Isalele! Ne bualu bukuabo kabidi, matuku asatu akuhita akalua malu â.

²² Ne bualu bukuabo bakashi bakuabo ba mu tshisumbu tshietu bakadi ku lukita dindadinda bakatukemesha;

²³ hakahangabo kumona tshitalu tshiandi, bakahingana, bakamba ne, Tuakumona bikena kumona bu banjelo bakatuambila ne, Yeye udi ne muoyo.

²⁴ Bakuabo bakadi nʼetu bakaya ku lukita, bakasangana bualu bu muakamba bakashi; kadi kabakamumona.

²⁵ Yesu wakabambila ne, Nuenu bantu kabai ne lungenyi, nudi nunenga ha kuitabusha mei onso akamba baprofete!

²⁶ Kabiakadi bimpe bia Kilisto kukengeye mu malu â ne bua kubueleye mu butumbi buandi, anyi?

²⁷ Wakabangila ku Mose ne ku baprofete bonso, wakabajinguluila malu akafundabo mu Mukanda wa Nzambi wonso bualu buandi.

²⁸ Hakafikabo ha buihi ne musoko wakadibo baya, yeye wakamba kuhita.

²⁹ Bakamusengelela bikole ne, Ulale nʼetu kunoko; bualu bua diba dikadi dibuela, munya ukadi ushika. Yeye wakaya kulala nʼabo.

³⁰ Hakashikameye nʼabo ku mesa, wakamema mutanda wa bidia, wakatendelela Nzambi: hakautshibuleye bituha, wakabahabi.

³¹ Mesu abo akabuluka, bakamumanya; yeye wakabajimina ku mesu kuabo.

³² Bakambilangana ne, Mitshima yetu kayakadi itema munda muetu, anyi, hakadiye utuambila malu mu nshila, hakadiye utujinguluila Mukanda wa Nzambi?

³³ Bakabika ha diba adi mene, bakahingana mu Yelushalema, bakasangana bayidi dikumi ne umue badisangishe hohamue ne bakuabo bakadi nʼabo,

³⁴ bakamba ne, Mukelenge wakubika ku lufu bulelela, wakumueneka kudi Simona.

³⁵ Bakabalondela malu akanjibua mu nshila ne muakadiye mumanyibue kudibo mu kutshibula kua bidia.

Yesu udi umueneka kudi bayidi dikumi ne umue

³⁶ Hakadibo bamba mei â, yeye mene wakimana munkatshi muabo, wakabambila ne, Nuikale talala.

³⁷ Kadi mitshima yabo yakabandika, bakatshina, bakelangana meshi ne, Tudi lutangila mukishi.

³⁸ Yeye wakabakonka ne, Nudi nutshinyina tshinyi? Makonka adi ajuka mu mitshima yenu bua tshinyi?

³⁹ Monai bianza bianyi ne makasa anyi ne, Meme muine; nundenge bianza, nutangile, bualu bua mukishi kena ne munyinyi ne mifuba binudi nuntangila nʼabi.

⁴⁰ Hakabambileye dî edi, wakabalesha bianza biandi ne makasa andi.

⁴¹ Hakadibo kabai banze kuitabusha bualu bua disanka diabo, hakadibo bakema, yeye wakabakonka ne, Nudi ne tshintu tshia kudia kunoko, anyi?

⁴² Bakamuhesha tshihesa tshia mushiha mukanga.

⁴³ Yeye wakatshiangata, wakatshidia ku mesu kuabo.

⁴⁴ Wakabambila ne, Â adi mei anyi anakanuambila hanakadi nʼenu, ne, Budibo nʼabu mbua kushikisha malu onso akafundabo bualu buanyi mu mikenshi ya Mose ne mu luseke lua baprofete ne mu misambu.

⁴⁵ Hashishe yeye wakabulula mitshima yabo bua kujingululabo Mukanda wa Nzambi.

Mukenshi Munene wa Yesu

⁴⁶ Yeye wakabambila ne, Bakafunda ne, Mbimpe bia Kilisto kukengeye ne kubikeye ku lufu hahita matuku asatu;

⁴⁷ mbimpe kabidi bia kuambilabo bisamba bionso bualu bua kukudimuna kua mitshima ne bua kujimishibua kua mibi yabo mu dina diandi, babangile ku Yelushalema.

⁴⁸ Nuenu nudi bamanyi ba malu â.

⁴⁹ Monai, ndi nutumina mulayi wa Tatu wanyi; kadi nushale mu musoko eu tô ne hanuluatshishabo bukole bua mu diulu.

Yesu udi ubanda mu diulu

⁵⁰ Yesu wakabalombola tô ne ku muaba wakadi buludiludi ne Betania; wakabisha bianza biandi, wakabasankisha.

⁵¹ Hakadiye ubasankisha nunku, wakumuka kudibo, wakatuadibua mu diulu.

⁵² Bakamutendelela, bakahingana ku musoko ne disanka dinene;

⁵³ bakadi mu ntempelo ku dituku ne ku dituku batumbisha Nzambi.