Luke 22 - Mukanda wa Nzambi Dihungila Dikulukulu ne Dihungila Dihia-dihia 2003

Badi ne Yesu lukuna hadi bamusangishila dî bua kumushiha

¹ Disanka dia bidia bidi kabi ne luevene diakadi ba buibi, badi badibikila ne, Kuhita kua Yehowa.

² Bakuidi banene ba Nzambi ne bafundi bakakeba mua kumushiha, bua bobo bakadi batshina bantu.

³ Satana wakahuela munda mua Yudasa, wakadibo babikila ne Isakaliote, yeye wakadi wabo wa ba dikumi ne babidi.

⁴ Wakumuka biandi wakasangisha dî ne bakuidi banene ne tuhita tua balami ba ntempelo bualu bua kumufileye mu bianza biabo.

⁵ Bakadi ne disanka, bakamulaya ne, Netukuhe mpalata.

⁶ Yeye wakitabusha, wakakeba mua kumufila mu bianza biabo tshisumbu tshia bantu katshîhu.

Badi balongoluela Yesu ne bayidi bandi ha kudilabo bidia bia Kuhita kua Yehowa

⁷ Dituku dia usanka dia bidia kabî biela luevene diakafika, diakadibo ne bualu bua kushiha bana ba mikoko ya Kuhita kua Yehowa.

⁸ Yeye wakatuma Petelo ne Yone ne, Yai nutulongoluele Kuhita kua Yehowa bua tuetu kudia.

⁹ Bakamukonka ne, Udi musue tuetu tulongoluela kudi kunyi?

¹⁰ Yeye wakabambila ne, Hanuabuela mu musoko, nenusangile ne mulume mutuale mulondo wa mai; numulonde mu nsubu wabueleye.

¹¹ Nuambile muena nsubu ne, Muyishi udi ukukonka ne, Nsubu wa buenyi unadila bidia bia Kuhita kua Yehowa ne bayidi banyi udi hanyi?

¹² Yeye neanuleshe nsubu mimene wa mulu mmuana kulongolola bintu bionso; nulongololemu.

¹³ Bakaya, bakamona bi muakabambileye: bakalongolola Kuhita kua Yehowa.

Tshishikidilu tshia Kuhita kua Yehowa

¹⁴ Hakafika diba wakashikama ku mesa ne bapostolo.

¹⁵ Wakabambila ne, Nakutamba kusua bua kudia nʼenu bidia ebi bia Kuhita kua Yehowa, diambedi tshi muanze kukenga;

¹⁶ ndi nuambila ne, Tshiona ndia bintu ebi kabidi tô ne hashikishabo malu onso mu bukelenge bua Nzambi.

¹⁷ Bakamuhesha luhanza; hakasakidileye Nzambi, wakamba ne, Angatai, nuabanyangane;

¹⁸ ndi nuambila ne, Tshiena nua mai a mamuma a nvinyo kabidi tô ne halua bukelenge bua Nzambi.

Yesu udi ubangila bualu bua bidia ne maluvu, bimanyinu bia mubidi wandi ne mashi andi

¹⁹ Yeye wakamema mutanda wa bidia; hakasakidileye Nzambi, wakautshibula, wakaha bayidi bandi, wakamba ne, Eu udi mubidi wanyi udi unuhebua; enzai nunku bua kunvuluka.

²⁰ Hakashikishabo kudia, yeye wakamema luhanza muomumue kabidi, wakamba ne, Luhanza elu ludi dihungila dihia-dihia dia mu mashi anyi akunumatshishilabo hanshi.

²¹ Kadi, tangilai, tshianza tshia udi untungila tshitungu tshidi nʼanyi ha mesa.

²² Bulelela, Muana wa muntu udi uya bu muakasungulabo, kadi mulau neulue kudi wakumutungila tshitungu.

²³ Bobo bakabanga kukonkangana ne, Nganyi nenze bualu ebu?

Bayidi badi belangana mpata ne, Udi mutambe bakuabo nganyi?

²⁴ Bakadi belangana mpata ne, Bakusungula nganyi bua yeye kutamba bakuabo?

²⁵ Yeye wakabambila ne, Banfumu ba bantu ba bisamba bia bende badi babakokesha ne diambu, ne banfumu babo badi babikidibua ne, Benji ba bilengelele.

²⁶ Kadi nuenu, kanuikadi nunku; udi mutambe bakuabo munkatshi muenu alue biandi muakunyi; udi biandi nfumu alue muena mudimu.

²⁷ Udi mutambe mukuabo nganyi, udi mushikame ku mesa, anyi udi umuhetesha bia kudia? Udi mushikame ku mesa kena mutambe, anyi? Kadi meme udi munkatshi muenu bu muena mudimu.

²⁸ Kadi nuenu mbakunanukila nʼanyi mu makenga anyi;

²⁹ ndi nuha bukelenge bu muakumpa Tatu wanyi bukelenge,

³⁰ bua nuenu kudia ne kunua ku mesa anyi mu bukelenge buanyi; nenushikame mu nkuasa ya butumbi nulumbuluisha bisamba dikumi ne bibidi bia Isalele.

Yesu udi wambila Petelo bualu bua bumuhidia buandi

³¹ Yesu wakamba ne, Simona, Simona, mona, Satana wakalomba mua kunuangata bualu bua kunusengeye bu ntete;

³² kadi nakukulombela wewe Nzambi bua ditabusha diebe kadihangi; wewe, hawakudimuka, ukoleshe mitshima ya bana benu.

³³ Petelo wakamuambila ne, Mukelenge, ndi ne dikima dia mua kuya nʼebe ne mu nsubu wa lukanu ne ku lufu.

³⁴ Yeye wakamba ne, Petelo, ndi nkuambila ne, Tshitala katshî tshianze kusama lelu wewe neuvile misangu isatu ne, Tshiena mumumanye.

Yesu udi umanyisha bayidi bualu bua mayoyo alua

³⁵ Yeye wakabambila ne, Hanakanutuma kanui ne mukaba ne tshibombo ne bisabata, nuakuhanga tshintu, anyi? Bakamba ne, Nasha.

³⁶ Yeye wakabambila ne, Kadi katataka, udi ne mukaba awangate ne tshibombo kabidi; udi kai ne muele wa nvita ahane kazaku kandi, ausumbe.

³⁷ Bualu bua ndi nuambila ne, Budibo nʼabu mbua kushikisha kundi di edi didi difunda ne, Bakamubala hohamue ne bantu babi; bualu bua nebashikishe mei onso akafundabo bualu buanyi.

³⁸ Bakamba ne, Mukelenge, tangila, miele ya nvita ibidi kayiyi. Yeye wakabambila ne, Kuakushika.

Yesu udi unyingalala mu Getesemane

³⁹ Yeye wakaluhuka, wakaya ku mukuna wa Oleve, bu muakadi tshilele tshiandi; bayidi bakamulonda.

⁴⁰ Hakafikeye ku muaba au, wakabambila ne, Nutendelele Nzambi bua nuenu kanuhonyi mu mateyi.

⁴¹ Yeye wakadi nkayandi bu ntanta wa kuela dibue diafika; wakatua binu hanshi, wakatendelela Nzambi,

⁴² wakamba ne, Tatu, biwasua, ungumushile luhanza elu; kadi bualu buenjibue bu mûdi musue, kabuenjibu bu mundi musue.

⁴³ Muanjelo wa mu diulu wakamueneka kudiye, wakamukolesha.

⁴⁴ Wakatamba kukenga ne kanyinganyinga, wakatendelela Nzambi bikole; luanga luakahatuka mamata manene hamʼbidi handi bu mashi amata hanshi.

⁴⁵ Hakajukeye ku kutendelela kuandi, wakalua kudi bayidi, wakabasangana balale tulu bualu bua kanyinganyinga,

⁴⁶ wakabebesha ne, Nudi baladile tulu tshinyi? Jukai, nutendelele Nzambi bua kanuhonyi mu mateyi.

Badi bakuata Yesu

⁴⁷ Hakadiye wamba nunku, monai, tshisumbu tshia bantu tshiakalua, mukuabo wabo wa ba dikumi ne babidi, dina diandi Yudasa, wakalua ku mpala kuabo; wakalua ha buihi ne Yesu bua kutuangana nʼandi mishiku.

⁴⁸ Kadi Yesu wakamuebesha ne, Yudasa, udi utungila Muana wa muntu tshitungu ku kutuangana kua mishiku, anyi?

⁴⁹ Bakadi ha buihi ne Yesu, hakamonabo ne bualu buakadi ha kulua, bakamuebesha ne, Mukelenge, tubatahe ne muele, anyi?

⁵⁰ Mukuabo wakataha muntu wa muakuidi munene, wakamukosa ditshu dia tshianza tshia bukole.

⁵¹ Kadi Yesu wakandamuna ne, Nubalekele, benze. Wakalenga tshianza ku ditshu diandi, wakamuhingishiladi.

⁵² Yesu wakakonka bakuidi banene ne tuhita tua balami ba ntempelo ne bakulu bakadi bamuluile ne, Nuakulua ne miele ne bibonge bu mudibo bakuata munyengi munyi?

⁵³ Hanakadi nʼenu mu ntempelo ku dituku ku dituku, kanuakandenga bianza; kadi edi diba ndienu, ne bukokeshi bua mîdima.

Badi bakuata Yesu: Petelo udi utuhidia

⁵⁴ Bakamukuata, bakaluhuka nʼandi, bakalua nʼandi mu nsubu wa muakuidi munene. Petelo wakaha londa ha bule ha bule.

⁵⁵ Hakatemeshabo kahia nu bunene bua luhangu, hakashikamabo hohamue, Petelo wakadi mushikame munkatshi muabo.

⁵⁶ Mukashi muenji wa mudimu wakamutangila hakadiye mushikame ku dinkenka dia kahia, wakamutangila talala, wakamba ne, Muntu eu kabidi wakadi ne Yesu.

⁵⁷ Yeye wakavila ne, Mukashiana, tshiena mumumanye.

⁵⁸ Hakaleha tshituha, mukuabo wakamutangila, wakamuambila ne, Wewe kabidi udi umue wabo. Petelo wakamba ne, Nasha, mulumiana, tshiena wabo.

⁵⁹ Hakahita bu tshituha tshia diba, mukuabo wakamba ne, Bulelela, muntu eu wakadi ne Yesu, bualu bua yeye udi Muena Galela.

⁶⁰ Kadi Petelo wakamba ne, Mulumiana, tshiena mumanye tshiudi wamba. Hakadiye wakula nunku, tshitala tshiakasama.

⁶¹ Mukelenge wakatshinguluka, wakatangila Petelo talala. Petelo wakavuluka dî dia Mukelenge diakamuambileye ne, Tshitala katshi tshianze kusama lelu, wewe neumpidie misangu isatu.

⁶² Wakaluhuka biandi, wakadila bikole.

Badi bakuma Yesu

⁶³ Bakadi bakuata Yesu, bakamuseka, bakamukuma bisusu.

⁶⁴ Bakamubuikila tshitambala ku mesu, bakamuambila ne, Amba bualu bûdi umona, wakukukuma nganyi?

⁶⁵ Bakamuambila malu makuabo a bungi bamuhenda.

Badi balua ne Yesu kudi balumbuludi

⁶⁶ Hakatshia butuku, tshisumbu tshia bakulu ba bantu tshiakudisangisha, bakuidi banene ne bafundi; bakaya nʼandi ku tshilumbuluidi tshiabo, bakamuambila ne,

⁶⁷ Biwikala Kilisto, utuambile. Kadi yeye wakabambila ne, Binanuambila, kanuena nuitabusha;

⁶⁸ bianukonka bualu, kanuena nunkudimuna.

⁶⁹ Kadi ha dituku edi tô ne tshiendelele Muana wa muntu neashikame ku tshianza tshia balume tshia bukole bua Nzambi.

⁷⁰ Buonso buabo bakamukosa ne, Wewe udi Muana wa Nzambi, anyi? Yeye wakabakudimuna dî ne, Nudi nuamba mundi yeye.

⁷¹ Bakamba ne, Tudi ne bualu bua bamanyi kabidi kudi kunyi? Tuetu tuakudiunvuila mei a mukana muandi mene.