Luke 19 - Mukanda wa Nzambi Dihungila Dikulukulu ne Dihungila Dihia-dihia 2003

Zakayo udi ukudimuna mutshima wandi

¹ Yesu wakafika mu Yeleko, wakadi uhita.

² Muntu wakadimu, dina diandi Zakayo; wakadi muntu munene wa basangishi ba mulambu, wakadi mubanshi.

³ Wakakeba mua kutangila Yesu ne, Udi nganyi? Yeye kakadi mumanye mua kumutangila bualu bua tshisumbu tshia bantu ne bualu bua yeye wakadi wa tshituha.

⁴ Wakanyema ku mpala, wakabanda ku mutshi wa sukomo bua kumutangila, bualu bua yeye wakamba kuhitshilaku.

⁵ Hakafika Yesu ha muaba au, wakatangila kulu, wakamuambila ne, Zakayo, tuluka lukasa, bundi nʼabu mbua kuikala mu nsubu muebe lelu.

⁶ Wakatuluka lukasa, wakamubuesha mu nsubu usanka.

⁷ Hakamonabo bualu ebu, bakajiana ne, Wakuya kulala mu nsubu wa muntu mubi.

⁸ Zakayo wakimana, wakambila Mukelenge ne, Mukelenge, unvua, nempe bahele tshituha tshia hankatshi ha bintu bianyi; ne bingikala muangate tshintu tshia muntu mukuabo ku mashimi anyi, nemuhingishile bintu binai.

⁹ Yesu wakamuambila ne, Lelu luhandu luakulua ku nsubu eu, bualu bua yeye kabidi udi muana wa Abalahama.

¹⁰ Bualu bua muana wa muntu wakuluila bua kukeba ne bua kusungila tshidi tshijimine.

Lusumuinu lua mpalata dikumi

¹¹ Hakunvuabo mei â, yeye wakatenteka dî dikuabo, wakela lusumuinu, bualu bua yeye wakadi hehi ne Yelushalema, ne bualu bua bobo bakadi belangana meshi ne, Bukelenge bua Nzambi bukadi ha kulua katataka.

¹² Wakamba ne, Muntu munene wakadiku, wakaya ku luseke lukuabo kule bua kuangata bukelenge buandi, ne bua kuhingana kabidi.

¹³ Wakabikila bahika bandi dikumi, wakabaha mpalata dikumi, wakabambila ne, Nuenduluke nʼai mushinga tô ne hanalua.

¹⁴ Kadi bantu bandi bakadi nʼandi lukuna, bakatuma miloho bua kumulonda ne, Katuena basue muntu eu ikale mukelenge wetu.

¹⁵ Hakangateye bukelenge, hakahinganeye, wakabikila bahika bakaheye mpalata bua kumanyeye bintu biakuhetabo ku mushinga.

¹⁶ Wa kumudilu wakalua ku mesu kuandi, wakamba ne, Mukelenge, mpalata webe wakuheta minga mpalata dikumi.

¹⁷ Wakamuambila ne, Bimpe, wewe udi muhika muimpe: bualu bua wewe wakadi mutumikile hawakadi ne tshintu tshikese, wikale biebe nfumu wa misoko dikumi.

¹⁸ Muibidi wakalua, wakamba ne, Mukelenge, mpalata webe wakuheta mpalata itanu.

¹⁹ Wakamuambila kabidi ne, Wewe wikale nfumu wa misoko itanu.

²⁰ Mukuabo wakalua, wakamba ne, Mukelenge, mpalata webe kayeu, unakadi musuike mu dituaya;

²¹ nakukutshina, bua wewe udi amena tshinyangu, utu wambula tshiudi kui muteke, utu wahuola biudi kui mukune.

²² Wakamuambila ne, Wewe udi muhika mubi, nenkuleshe bua mei akuhatuka mukana muebe. Wewe wakamanya ne, Meme ndi muena tshinyangu, ntu ngambula tshindi tshi muteke, ntu ngahuola tshindi tshi mukune;

²³ munyi kufidi mpalata wanyi mu bianza bia basombeshanganyi? Nunku hanakulua, nakadi kumuangata ne tshia kasombelu.

²⁴ Wakambila bakadi bimane ha buihi nʼandi ne, Numunyenge mpalata, nuhe udi ne mpalata dikumi.

²⁵ Bakamuambila ne Mukelenge, yeye udi ne mpalata dikumi.

²⁶ Ndi nuambila ne, Muntu yonso udi ne bintu, nebamuhe binga; kadi muntu yonso udi kai ne tshintu nebamunyenge tshidiye nʼatshi.

²⁷ Kadi bantu aba badi nʼanyi lukuna, bakadi kabai basue meme ngikale mukelenge wabo, nulue nʼabo kunoko, nubashihe ku mesu kuanyi.

²⁸ Hakashikisheye kuamba dî edi, wakatungununa ku mpala kuabo, uya ku Yelushalema.

Yesu udi ubuela mu Yelushalema ne butumbi

²⁹ Hakafikabo ha buihi ne Bete-fage ne Betania, ku mukuna udibo babikila ne Oleve, wakatuma bayidi babidi ne,

³⁰ Yai bienu mu musoko udi buludiludi bunudi batangile; hanuabuelamu, nenusangane muana wa nyama wa mpunda musuika, muntu kena muanze kushikama ha nyima handi; numusulule, nulue nʼandi.

³¹ Bianukonka muntu ne, Nudi numusuluila tshinyi? Numuambile ne, Mukelenge udi nʼandi bualu.

³² Bakadi batumibue bakasangana bu muakabambileye.

³³ Hakatshidibo basulula muana wa mpunda, banfumuʼandi bakabakonka ne, Nudi nusuluila muana wa mpunda tshinyi?

³⁴ Bakamba ne, Mukelenge udi nʼandi bualu.

³⁵ Bakalua nʼandi kudi Yesu; bakateka bikowelu ha nyima handi, bakashikikahu Yesu.

³⁶ Hakadiye uya, bakâdisha bikowelu biabo mu nshila.

³⁷ Hakafikeye kunshi kua mukuna wa Oleve, tshisumbu tshionso tshia bayidi bakabanga kusanka ne kutumbisha Nzambi ne dî dikole bua malu onso a kukema akumonamonabo,

³⁸ bakamba ne, Mukelenge udi ulua mu dina dia Nzambi atumbishibue; ditalala dikale mulu ne butumbi mu diulu.

³⁹ Bafalese bakuabo bakadi mu tshisumbu tshia bantu bakamuambila ne, Muyishi, ubele bayidi bebe.

⁴⁰ Yeye wakabakudimuna dî ne, Biahuabo, mabue nêle mbila.

Yesu udi ujinga Yelushalema

⁴¹ Hakafikeye ha buihi, wakatangila musoko, wakajinga,

⁴² wakamba ne, Bu wewe mumanye mu dituku edi malu adi akuhesha ditalala! Kadi bakukusokokau ku mesu kuebe.

⁴³ Bualu bua matuku nealue adi badi nʼebe lukuna babuelela luhangu, nebatunyunguluke, nebakutshintshimike ku nseke yonso,

⁴⁴ nebakukume hanshi ne bana badi nʼebe; kabena bashîa dibue dimue ha mutu ha dikuabo, bualu bua wewe kuakumanya dituku diakalua Nzambi kûdi.

Yesu udi wihata bena mushinga ma ntempelo

⁴⁵ Yeye wakabuela mu ntempelo, wakabanga kuihata bahanyi ba bintu,

⁴⁶ wakabambila ne, Bakafunda mu Mukanda wa Nzambi ne, Nsubu wanyi neikale nsubu wa kutendelelamu Nzambi, kadi nuenu nuakumuvuisha muaba wa banyengi.

⁴⁷ Wakadi ubayisha mu ntempelo ku dituku ku dituku. Kadi bakuidi banene ba Nzambi ne bafundi ba bantu bakakeba mua kumushiha;

⁴⁸ kabakamanya mua kuenza bualu, bua bantu bakadi bamunguile, batelesha mei andi.