Luke 18 - Mukanda wa Nzambi Dihungila Dikulukulu ne Dihungila Dihia-dihia 2003

Lusumuinu lua njuji mubi

¹ Yeye wakabelela lusumuinu bua kubamanyisha ne, Mbimpe bia nuenu kutendelela Nzambi matuku onso, kanuhangi;

² wakamba ne, Mu musoko mukuabo muakadi njuji, yeye kakadi utshina Nzambi, kakadi unemeka bantu;

³ mu musoko au kabidi muakadi mukashi wa mu lufuila; wakalua kudiye misangu ya bungi, wakamuambila ne, Unsombuele kudi udi nʼanyi lukuna.

⁴ Yeye kakasua kubuenza musangu mule, kadi ku nyima wakamba munda munda ne, Bulelela, tshiena ntshina Nzambi, tshiena nemeka bantu,

⁵ kadi bualu bua mukashi eu wa mu lufuila udi untatshisha, nemusombuele; bialueye misangu ya bungi, neasunsule.

⁶ Mukelenge wakamba ne, Unvuai muakamba njuji mubi.

⁷ Nzambi mene kena usombuela bakasunguleye, batu badila kudiye butuku ne munya, nasha bialehesheye musangu mule bua kubakuatshisha, anyi?

⁸ Ndi nuambila ne, Neabasombuele lubilu. Kadi halua Muana wa muntu, neasangane ditabusha ha buloba, anyi?

Lusumuinu lua Mufalese ne musangishi wa mulambu

⁹ Bantu bakuabo bakadi badieyemena ne, Tudi bakane, bakadi bahetula bantu bakuabo, Yesu wakabelela lusumuinu ne,

¹⁰ Bantu babidi bakabanda mu ntempelo bua kutendelela Nzambi; munga wakadi Mufalese, mukuabo wakadi musangishi wa mulambu.

¹¹ Mufalese wakimana, wakatendelela Nzambi munda munda ne, Nzambi, ndi nkusakidila bua meme tshiena bu bantu bakuabo, bobo badi banyengi, badi babi, badi bena masandi, tshiena kabidi bu musangishi wa mulambu eu.

¹² Ntu ngajila bia kudia lumingu lumue misangu ibidi; ntu ngafila tshia dikumi tshia bintu bionso bintu ngaheta.

¹³ Kadi musangishi wa mulambu wakimana ha bule, kakasua kuambula mpala mulu, wakadikuma mu tshiadi, wakamba ne, Nzambi, ndi muntu mubi, unfue luse.

¹⁴ Ndi nuambila ne, Muntu au wakuhueka ku nsubu kuandi mubinge, mukuabo muhile; bualu bua wadibandisha nebamuhuekeshe, wadihuekesha nebamubandishe.

Yesu udi usankisha bana bakese

¹⁵ Bakadi balua ne bana bakese kudiye bua yeye kubalenga tshianza tshiandi; kadi hakamona bayidi bualu ebu, bakabasamina.

¹⁶ Kadi Yesu wakababikila wakamba ne, Nuitabushe bua bana bakese kulua kundi, kanubakandi; bualu bua bukelenge bua Nzambi mbua badi bu bana.

¹⁷ Bulelela, ndi nuambila ne, Muntu yonso udi kai witabusha bukelenge bua Nzambi bu muana mukese, kena ubuelamu.

Nsongalume mubanshi udi ukeba muoyo wa tshiendelele

¹⁸ Mukelenge mukuabo wakamukonka ne, Muyishi Muimpe, nengenze tshinyi bua kuhiana muoyo wa tshiendelele?

¹⁹ Yesu wakamuambila ne. Udi umbikidila meme ne, Muimpe, tshinyi? Kakuena muntu muimpe anu umue, Nzambi.

²⁰ Wewe udi mumanye mikenshi ya Nzambi ne, Kuendi masandi, kushihi muntu, kuibi, kudingidi muntu, unemeke tatuʼebe ne mamuʼebe.

²¹ Nsongalume wakamba ne, Nakenzenza malu â onso, hanakadi muana mukese tô ne katataka.

²² Hakunvua Yesu dî adi, wakamuambila ne, Bualu bumue mbukushala; uhane biudi nʼabi bionso, ubiabanyine bantu bahele, newikale ne bintu mu tshibutshilu mu diulu; ulue kundonda meme.

²³ Kadi hakunvueye mei â, mutshima wandi wakatamba kunyingalala, bualu bua yeye wakadi ne bubanshi buhite.

²⁴ Hakamumona Yesu, wakamba ne, Ha kubuela kua bantu badi ne bintu bia bungi mu bukelenge bua Nzambi mbualu bukole.

²⁵ Kubuela kua kamelu mu disu dia kashingi kudi kutambe kubuela kua muntu mubanshi mu bukelenge bua Nzambi kuteketa.

²⁶ Bantu bakunvua dî adi bakamukonka ne, Ahu udi mumanye mua kusungidibua nganyi?

²⁷ Yeye wakamba ne, Malu adi bantu kabai bamanye mua kuenza Nzambi udi mua kuênza.

²⁸ Petelo wakamba ne, Ahu tuetu tuakushia bintu bietu, tuakukulonda.

²⁹ Yeye wakabambila ne, Bulelela, ndi nuambila ne, Kakuena muntu wakashia nsubu wandi, anyi mukashi wandi, anyi bana babo, anyi bamuledi, anyi bana bandi, bualu bua bukelenge bua Nzambi,

³⁰ udi kai uheta bintu bikuabo bitambe bia diambedi misangu ya bungi mu tshikondo etshi; halua tshikondo tshikuabo, neahete muoyo wa tshiendelele.

Yesu udi wambila bayidi bandi kabidi bua lufu luandi ne dibika diandi

³¹ Hakadiye uya ne bayidi nkayabo dikumi ne babidi, wakabambila ne, Unvuai, tudi tubanda ku Yelushalema, nebenzele Muana wa muntu malu onso akafundabo kudi baprofete.

³² Nebamufile mu bianza bia bantu ba bisamba bia bende, nebamuseke, nebamuhende, nebamutuile mate;

³³ nebamukume, nebamushihe; kadi hahita matuku asatu, neabike kabidi.

³⁴ Bayidi kabakajingulula malu â; di edi diakabasokoma, kabakamanya malu akambeye.

Yesu udi utabasha mesu a mufofo hehi ne Yeleko

³⁵ Hakafikeye hehi ne Yeleko, mufofo wakadi ushikama kukala kua nshila ulomba.

³⁶ Hakunvueye tshisumbu tshia bantu tshihita, wakakonka ne, Ntshinyi?

³⁷ Bakamuambila ne, Yesu wa ku Nazaleta udi uhita.

³⁸ Wakela dî diandi bikole ne, Yesu, muana wa Davidi, unfue luse.

³⁹ Bakadi baya ku mpala bakamukanda ne, Hua; kadi yeye wakatamba kuela dî diandi bikole ne, Wewe muana wa Davidi, unfue luse.

⁴⁰ Yesu wakimana, wakamba ne, Balue nʼandi; hakalueye ha buihi, wakamukonka ne,

⁴¹ Udi musue meme nkuenzele tshinyi? Wakamba ne, Mukelenge, mesu anyi atabale.

⁴² Yesu wakamuambila ne, Tabala, ditabusha diebe diakukusungila.

⁴³ Wakatabala lukasa, wakamulonda utumbisha Nzambi; bantu bonso, hakatangilabo bualu ebu, bakatumbisha Nzambi.