Luke 13 - Mukanda wa Nzambi Dihungila Dikulukulu ne Dihungila Dihia-dihia 2003

Bantu bakudimune mitshima yabo kudi Nzambi

¹ Bantu bakadiku dituku adi, bakambila Yesu bualu bua Bena Galela, bakadi Pilato mukasangishe mashi abo ne a nyama yakadi mishihela Nzambi.

² Yeye wakabakonka ne, Nudi nuelangana meshi ne, Bena Galela aba bakadi batambe Bena Galela bonso bubi, bua bobo bakakenga nunku; anyi?

³ Ndi nuambila ne, Nasha; badi binuikala kanui nukudimuna mitshima yenu, buonso buenu nenufue muomumue.

⁴ Ne bualu bukuabo, bantu aba dikumi ne muanda mukulu, bakuhukilabo kudi tshibunda tshia tushola mu Siloama, tshiakabashiha, nudi nuelangana meshi ne, Bobo bakadi batambe bonso ba mu Yelushalema bubi, anyi?

⁵ Ndi nuambila ne, Nasha; kadi binuikala kanui nukudimuna mitshima yenu, buonso buenu nenufue muomumue.

Lusumuinu lua mutshi wa nfigi wakadi kawi mukuame mamuma

⁶ Yeye wakela lusumuinu elu ne, Muntu wakadi ne mutshi wa nfigi mukuna mu budimi buandi bua mamuma a nvinyo; yeye wakalua kukebaku mamuma, kakâsangana.

⁷ Wakambila mulami wa budimi ne, Tangila, nakalua bidimu ebi bisatu bua kukeba mamuma ku mutshi eu wa nfigi, nakûsangana hatuhu; ûtahe; udi wonena buloba tshinyi?

⁸ Kadi yeye wakandamuna dî ne, Mukelenge, ûlekele tshidimu etshi; nenguihile, nenguele tunvi;

⁹ biakuamau mamuma, mbimpe; kadi bikalau kawi mukuame, ûtahe.

Yesu udi ukolesha mukashi udi ne mubidi mukonyame

¹⁰ Yeye wakadi uyisha bantu mu nsunagoga dituku dia Lumingu lua Bayuda.

¹¹ Mukashi wakadiku, wakadi ne nyuma wa butekete bidimu dikumi ne muanda mukulu, mubidi wandi wakadi mukonyame, kakadi ne bukole bua kudiolola.

¹² Nakamumona Yesu, wakamubikila, wakamuambila ne, Mukashiana, matekete ebe akulekele.

¹³ Wakamulenga bianza, mubidi wandi wakololoka katataka, yeye wakatumbisha Nzambi.

¹⁴ Mukelenge wa nsunagoga wakadi ne tshishi bualu bua Yesu wakondaha muntu dituku dia Lumingu, wakambila bantu ne, Matuku asambombo adiku adibo ne bua kukuata mudimu wabo; mu matuku au nulue bua kuondahibua, kanulu dituku dia Lumingu.

¹⁵ Kadi Mukelenge wakamukudimuna dî ne, Nuenu bena lubombo, mukuabo wenu kai udi kai usulula ngombe wandi anyi nyama wa mpunda ku tshidilu bua kuyeye kumunuisha mai dituku dia Lumingu?

¹⁶ Mukashi eu udi muana wa Abalahama, wakadi musuika kudi Satana bidimu ebi dikumi ne muanda mukulu; kabiakadi bimpe bia kumusulula dituku dia Lumingu, anyi?

¹⁷ Hakambeye dî edi, bonso bakadi nʼandi lukuna bakakuatshika bundu ku mesu; bantu ba tshisumbu tshionso bakasanka bua malu onso a butumbi akenzeye.

Lusumuinu lua lutete lua mutada

¹⁸ Yeye wakamba ne, Bukelenge bua Nzambi budi bu tshinyi? Nembufuanyikishe bu tshinyi?

¹⁹ Budi bu lutete lua mutada luakangata muntu bua kukuneye mu budimi buandi; luakuleha, luakulua mutshi munene; nyunyu ya mu diulu yakuikila mu matamba au.

Lusumuinu lua luevene

²⁰ Yeye wakamba kabidi ne, Nenfuanyikishe bukelenge bua Nzambi bu tshinyi?

²¹ Budi bu luevene luakangata mukashi, wakalusokoka mu bihikilu bisatu bia bukula tô ne hakenduluka luevene mu bukula buonso.

Yesu udi wenda uyisha bantu ha kuya ku Yelushalema

²² Yesu wakahitshila mu bimenga ne mu misoko mikese, wenda uyisha bantu, uya ku Yelushalema.

²³ Muntu wakamukonka ne, Mukelenge, bantu banya-banya nebasungidibue, anyi? Yeye wakabambila ne,

²⁴ Nuidikishe mua kubuela ku mushiku wa mbelu mubumbakane; ndi nuambila ne, Ba bungi nebakebe kubuelaku, nebahange.

²⁵ Habika muena nsubu, hinshileye tshibi, nuenu nenubange kuimana ku bula nukokola ku tshibi ne, Mukelenge, utunzuluile; yeye neanuandamune ne, Tshiena mumanye kunuakufuma;

²⁶ hashishe nenubange kuamba ne, Tuakadi tudia nʼebe, tunua nʼebe, wewe kabidi wakadi uyisha bantu mu misesu yetu;

²⁷ yeye neambe ne, Ndi nuambila ne, Tshiena mumanye kunuakufuma, buonso buenu benji ba malu mabi, umukai kundi.

²⁸ Muadi newikalemu ne kusumakana menu, hanuatangila Abalahama ne Isaka ne Yakoba ne baprofete bonso bashikame ku mesa mu bukelenge bua Nzambi, ne hanuaditangila bahatula ku bula.

²⁹ Nebafume ku esete ne ku wesete ne ku node ne ku sude, nebashikame ku mesa mu bukelenge bua Nzambi.

³⁰ Banga badi ku nyima katataka nebikale ku mpala, banga badi ku mpala katataka nebikale ku nyima.

Lukuna lua Helode; Yesu udi ujinga Yelushalema

³¹ Ha diba adi mene Bafalese bakuabo bakalua, bakamuambila ne, Umuka eku, ya biebe, bualu bua Helode udi musue kukushiha.

³² Yeye wakabambila ne, Yai bienu nuambile nyama au wa budimu ne, Lelu ne makelela ndi ngumusha bademon munda mua bantu, ndi nmana masama a bantu, maihi nenshikishe mudimu wanyi.

³³ Kadi bundi nʼabu mbua kuya mu nshila lelu ne makelela ne maihi; bualu bua muprofete kena mumanye mua kufuila kukuabo anu mu Yelushalema.

³⁴ Wewe Yelushalema, Yelushalema, utu washiha baprofete, utu wakuma bakukutuminabo mabue! Misangu ya bungi nakasua kusangisha bana bebe bu mudi nsolo usangisha bana bandi mu mahuahua andi, kadi nuenu nuakuhidia.

³⁵ Tangilai, nsubu wenu udi mushale hatuhu; ndi nuambila ne, Kanuena nuntangila tô ne hanuamba ne, Udi ulua mu dina dia Mukelenge atumbishibue.