Luke 12 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi udimusha bayidi bandi bua luevene lua Bafalese

¹ Ha diba adi mene, bantu mbombo ne mbombo bakadisangisha, bakadiatangana ha makasa; yeye wakabanga kuambila bayidi bandi diambedi ne, Nudimukile luevene lua Bafalese, ludi lubombo.

² Kadi kakuena tshintu tshibuikila tshiahanga kubuluibua, kakuena tshintu tshisokoka tshiahanga kumanyibua.

³ Nunku malu onso anuakamba mu midima nebaûnvue mu munya; malu onso anuakakula mu ditshu mu bisokomenu nebâmbe ha mitu ya nsubu.

⁴ Ndi nuambila nuenu balunda banyi ne, Kanutshinyi badi bashiha mubidi, kadi ku nyima kabena bamanye mua kuenza bunga bualu.

⁵ Meme nenudimushe bua wa nuenu kutshina: Nutshine udi ne bukole bua kuela bantu mu Ngena; bulelela, ndi nuambila ne, Numutshine yeye.

⁶ Kabatu bahana mishamisha itanu ku makuta makese abidi, anyi? Mushamusha umue kawena muhua muoyo ku mesu kua Nzambi.

⁷ Nsuki ya ku mitu yenu mene mene idi mibala yonso. Kanutshinyi, mushinga wenu udi mutambe wa mishamisha ya bungi.

⁸ Ndi nuambila ne, Muntu yonso wangitabusha ku mesu kua bantu, Muana wa muntu neamuitabushe kabidi ku mesu kua banjelo ba Nzambi;

⁹ kadi muntu yonso wampidia ku mesu kua bantu neahidibue ku mesu kua banjelo ba Nzambi.

¹⁰ Muntu yonso watela Muana wa muntu dî dibi nebamujimishile bubi buandi; kadi kabena bajimisha bubi bua wahenda Nyuma Muimpe.

¹¹ Haluabo nʼenu ku mpala kua badi ku mutu kua nsunagoga, ne kua balumbuludi, ne kua banfumu, kanutambi kuelangana meshi ne, Netubakudimune dî kai? Netuambe tshinyi?

¹² Nyuma Muimpe neanuyishe mua kuamba ha diba adi.

Lusumuinu lua mubanshi muhote

¹³ Muntu wa mu tshisumbu tshia bantu wakamuambila ne, Muyishi, ambila muanʼetu antahuluile buhianyi.

¹⁴ Kadi Yesu wakamukonka ne, Mulumiana, wakunteka meme mulumbuludi wenu ne munutahuluidi nganyi?

¹⁵ Yeye wakabambila ne, Nudimuke, kanukumi mitshima ku biuma; bua muntu kena ne muoyo bualu bua bungi bua bintu bidiye nʼabi.

¹⁶ Yeye wakabelela lusumuinu ne, Budimi bua muntu mubanshi buakakuama bintu bia bungi;

¹⁷ wakelangana meshi munda ne, Ngenze tshinyi? Tshiena ne ha kusangishila bintu bianyi.

¹⁸ Wakamba ne, Nengenze nunku, nensasule mayeba anyi, nengase makuabo matambe a diambedi bunene, nensangishilemu maminu anyi onso ne biuma bianyi.

¹⁹ Nengambile mutshima wanyi ne, Mutshima, wewe udi ne bintu bia bungi bibuta bia bidimu bingi; wikishe, udie, unue, usanke biebe.

²⁰ Kadi Nzambi wakamuambila ne, Wewe udi muhote, butuku ebu mene badi balomba muoyo webe; bintu biwakulongolola nebikale kudi nganyi?

²¹ Muntu udi udibutshila bintu biandi, kai mubanshi ku mesu kua Nzambi, udi nunku.

²² Yeye wakambila bayidi bandi ne, Ebu mbundi nuambila ne, Kanutambi kuelangana meshi a muoyo wenu ne, Netudie tshinyi? Ne a mibidi yenu ne, Netuluate tshinyi?

²³ Bua muoyo udi mutambe bia kudia, mubidi udi mutambe bilulu,

²⁴ Monai bikololo; kabitu biakuna maminu, kabiena ne bibutshilu ne mayeba; kadi Nzambi utu waidisha; mushinga wenu udi mutambe wa nyunyu misangu bungi munyi?

²⁵ Muntu kai wa munkatshi muenu, bikaleye utamba kuelangana meshi, udi mumanye mua kulunga ku bule buandi nkubita umue?

²⁶ Binuikala kanui bamanye mua kuenza bualu butambe bukese, nudi nuelelangana meshi a malu makuabo tshinyi?

²⁷ Monai bilongo bia mu mpata mudibi bileha; kabitu biakuata mudimu, kabitu biasala buanda; kadi ndi nuambila ne, Solomo wakadi ne butumbi buandi bunene, kadi kabakamuluatshisha bu tshilongo etshi.

²⁸ Bisosa bia mu mpata bidiku lelu, hatshiabu nebibueshibue mu matshua; nuenu bena ditabusha dikese, bialuatshisha Nzambi bisosa nunku, yeye kena utamba kunuluatshisha, anyi?

²⁹ Nuenu, kanukebi bia kudia ne bia kunua, mitshima yenu kailubakanyi.

³⁰ Bisamba bia ha buloba bidi bikeba bintu ebi bionso; kadi Tatu wenu udi mumanye ne, Nuenu nudi ne bintu ebi bionso bualu.

³¹ Kadi kebai bukelenge buandi, nebanuhe bintu ebi.

³² Nuenu tshisumbu tshikese tshia mikoko, kanutshinyi; bua Tatu wenu udi musue kunuha bukelenge.

³³ Nuhane binudi nʼabi, nubihe bantu bahele ku luse; nudienzele bibombo bidi kabi bikulukasha, bintu bia mu tshibutshilu tshia mu diulu bidi kabi bishika tshiendelele, mudi muibi kai ulua ha buihi, mudi tshishi katshi tshinyanga.

³⁴ Mitshima yenu kabidi idi kudi bintu bia mu tshibutshilu tshienu.

Yesu udi udimusha bayidi bandi bualu bua kalua kuandi kua tshiakabidi

³⁵ Nuele mikaya yenu, minda yenu ikale itema;

³⁶ nuenu kabidi nuikale bu bantu badi batekemena nfumu wabo, udi ufuma kuakudieye bidia bia dibanji; hafikeye, hakokoleye ku tshibi, nebamunzuluile lubilu.

³⁷ Bahika aba, biabasangana nfumu wabo bamutekemena, nebikale ne disanka; bulelela, ndi nuambila ne, Yeye neasuike mukaba, neabashikike ku mesa, neabenzele mudimu.

³⁸ Bialueye nasha mundankulu, nasha hasama tshitala tshiaʼmbedi, biabasanganeye benza nunku, bobo nebikale ne disanka.

³⁹ Nudi bamanye ne, Bu muena nsubu mumanye ha diba dialua muibi, wakadi kulala tshitabala, kakadi kukuitabusha batubule nsubu wandi disoso.

⁴⁰ Nuenu kabidi nudilongolole, bualu bua Muana wa muetu nealue ha diba dinudi kanui belangana meshi.

Lusumuinu lua mulami wa bintu

⁴¹ Petelo wakamukonka ne, Mukelenge, tuetu nkayetu mbûdi welela lusumuinu elu, anyi udi welela bantu bonso?

⁴² Mukelenge wakamba ne, Nganyi mulami wa bintu udi ulamata nfumu wandi ne dinanukila, ne udi muntu wa lungenyi? Nfumu wandi neamuteke ha mutu ha bantu bandi bua yeye kubaha bidia biabo, halua dituku diabi.

⁴³ Muhika au neikale ne disanka, hahingana nfumu wandi, hamusanganeye wenza nunku.

⁴⁴ Bulelela, ndi nuambila ne, Yeye neamuteke ha mutu ha bintu biandi bionso.

⁴⁵ Kadi biamba muhika au munda munda ne, Nfumu wanyi kena ulua katataka, biabangeye kukuma bahika bakuabo, balume ne bakashi, biadieye, bianueye, biabangeye kukuatshika maiuvu,

⁴⁶ nfumu wa muhika au nealue dituku didiye kai mumutekemene ne ha diba didiye kai mumanye, neamukume bibi, neamuteke ku luseke lua bena buhidia.

⁴⁷ Nunku muhika wakadi mumanye muakadi nfumu wandi musue, kadi yeye kakalongolola malu andi, kakenza bu muakasueye, nebamukume bikole;

⁴⁸ kadi wakadi kai mumanye bualu, Wakenza malu a kukumibua, nebamukume bikese. Muntu yonso udi uheshibua bia bungi nebamulombe bia bungi; biatekabo bia bungi mu bianza bia muntu, nebamulombe bikuabo ha mutu.

Bualu bua Yesu budi buabulula bantu

⁴⁹ Nakuluila bua kutuma kahia ha buloba; nakadi musue kateme!

⁵⁰ Ndi ne dibatiza diambatizabo nʼadi, ndi mu bualu bukole tô ne hashikadi!

⁵¹ Nudi nuelangana meshi munda ne, Nakuluila bua kuha bantu ditalala ha buloba, anyi? Ndi nuambila ne, Nasha, nakuluila bua kuabulula bantu;

⁵² mu nsubu umue nemuikale bantu batanu bâbuluke; basatu nebikale ne babidi mpata, babidi nebikale ne basatu mpata.

⁵³ Nebâbuluke; tatu neikale ne muanʼandi mulume mpata, muana mulume-neikale ne tatuʼandi mpata; mamu neikale ne muanʼandi mukashi mpata, muana mukashi neikale ne mamuʼandi mpata; mamuʼandi-muenu neikale ne mukashiʼa muanʼandi mpata, mukashiʼa muana neikale ne mamuʼandi-muenu mpata.

Bantu badi bamanye bimanyinu via nvula ne bia malu makuabo, kadi kabena bamanye bimanyinu bia bukelenge bua Nzambi

⁵⁴ Yeye wakambila bisumbu bia bantu kabidi ne, Hanuatangila ditutu dibanda ku wesete, nudi nuamba lubilu ne, Nvula ukadi ulua; bulelela, nealue.

⁵⁵ Hanuatangila luhehele lulua ku sude, nudi nuamba ne, Munya mukole ukadi ulua; bulelela, neulue.

⁵⁶ Nuenu bena lubombo, nudi bamanye mua kujingulula mpala wa buloba ne wa diulu, munyi kanuena bamanye mua kujingulula malu a tshikondo etshi?

⁵⁷ Munyi kanuena nudisunguile bualu budi buakane?

⁵⁸ Hautshidi uya ne udi nʼebe lukuna kudi mukelenge, mu nshila mene umusengelele bikole akulekele; biwikala kui wenza nunku, yeye neakukoke kudi mulumbuludi, mulumbuludi neakufile mu bianza bia mpolushe, mpolushe nenkuele mu nsubu wa lukanu.

⁵⁹ Ndi nkuambila ne, Kuena uluhukamu tô ne hawafuta dibanza dionso, nasha kakuta kakese kushala.