Luke 10 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi utuma bayidi bandi makumi muanda mutekete ku mpala kuandi

¹ Hakashika malu â, Mukelenge wakasungula banga bayidi kabidi makumi muanda mutekete, wakabatuma ku mpala kuandi ku babidi ku babidi mu misoko yonso ne mu miaba yonso, yakadiye wamba kuya.

² Yeye wakabambila ne, Bulelela, bintu bia kunowa bidi bia bungi, kadi bena mudimu badi banya-banya. Nunku nulombe mukelenge wa bintu bia kunowa, atume bena mudimu mu kunowa kuandi.

³ Yai bienu; monai, ndi nutuma bu bana ba mikoko badi munkatshi mua nkashama,

⁴ Kanuyi ne tshibombo tshia mpalata ne nsahu wa bintu bikuabo, anyi bisabata bikuabo; kanuedi muntu muoyo musangu mule mu nshila.

⁵ Hanuabuela mu nsubu, nudianjile kuamba ne, Ditalala dikale mu nsubu eu.

⁶ Bikalamu muana wa ditalala, ditalala dienu nedikale nʼandi; kadi bikaleye kaimu, nedihingane kunudi kabidi.

⁷ Nushale mu nsubu amu mene, nudie nunue bidibo banuha; bualu bua muena mudimu udi muakanyine bua kuangateye difutu diandi. Kanutambakanyi ku nsubu ne ku nsubu.

⁸ Binuabuela mu musoko, bianuitabushabo, nudie biatekabo ku mpala kuenu;

⁹ nuondahe bena mabedi badimu, nubambile ne, Bukelenge bua Nzambi buakulua ha buihi nʼenu.

¹⁰ Kadi hanuabuela mu musoko, biabenga bena musoko kunuitabusha, yai mu misesu yau, nuambe ne,

¹¹ Nsenga ya musoko wenu idi milamate mu makasa etu, tudi tunukuhuilai; kadi numanye bienu ne, Bukelenge bua Nzambi buakulua ha buihi.

¹² Ndi nuambila ne, Halua dituku diadia, bujitu bua dikenga dia musoko au nebutambe bua Sodoma.

Yesu udi wela misoko idi ibidia Nzambi mulau

¹³ Wewe Kolazina, mulau ulualua kûdi! Wewe Bete-saîda, mulau ulualua kûdi! Bu malu a kukema akenjibua munkatshi muenu, menjibue mu Tulo ne mu Sidona, bakadi kukudimuna mitshima yabo kale, bashikame mu bilulu bikayabala ne mu butue.

¹⁴ Halua dituku dia kulumbulula, bujitu bua dikenga dienu nebutambe bua Tulo ne bua Sidona.

¹⁵ Ne wewe Kapênuma, nebakubandishe mu diulu, anyi? Nebakuhuekeshe mu Muaba wa Bafue.

¹⁶ Wanunvuila udi ungunvuila meme, wanuhidia udi umpidia meme; wampidia meme udi uhidia wakuntuma.

¹⁷ Bayidi makumi muanda mutekete bakahingana ne disanka, bakamba ne, Mukelenge, bademon mene badi batumikila dî dietu mu dina diebe.

¹⁸ Yeye wakabambila ne, Nakadi nmona Satana mukuluke mu diulu muhone bu muele wa nvula.

¹⁹ Nakunuha bukole bua kudiata nyoka ne tuminyiminyi, ne bua kuhita bukole buonso bua muena lukuna; tshintu katshiena tshinuenzela bibi.

²⁰ Kadi kanusanki bua nyuma mibi idi itumikila dî dienu, kadi nusanke bua mena enu adi mafunda mu diulu.

²¹ Ha diba adi mene yeye wakasanka mu Nyuma Muimpe, wakamba ne, Tatu wanyi, Mukelenge wa diulu ne wa buloba, ndi nkusakidila bua wewe wakusokoka bena meshi ne bena budimu malu â, wakuasokolola kudi bana bakese; bulelela, Tatu, bua bualu ebu buakadi buimpe ku mesu kuebe.

²² Tatu wanyi wakufila bintu bionso mu bianza bianyi; kakuena muntu udi mumanye Muana, anu Tatu; kakuena muntu udi mumanye Tatu, anu Muana ne udi Muana musue kulesha Tatu.

²³ Wakatshinguluka kudi bayidi bandi, wakabambila ha nkayabo ne, Mesu adi amona malu anudi numona adi ne disanka;

²⁴ ndi nuambila ne, Baprofete ba bungi ne banfumu bakasua kumona malu anudi numona, kabakâmona; bakasua kunvua malu anudi nunvua, kabakaûnvua.

Yesu udi wamba bualu bua mikenshi ya Nzambi

²⁵ Mumanyi wa mikenshi wakimana, wakateta Yesu munda ne, Muyishi, nengenze tshinyi bua kuhiana muoyo wa tshiendelele?

²⁶ Yesu wakamukonka ne, Bakafunda tshinyi mu mikenshi ya Mose? Udi ubala munyi?

²⁷ Yeye wakakudimuna dî ne, Sua Mukelenge Nzambi webe ne mutshima webe wonso ne muoyo webe wonso ne bukole buebe buonso ne lungenyi luebe luonso; ne sua mukuenu bu mûdi mudisue.

²⁸ Yesu wakamuambila ne, Wewe wakuandamuna banue; enza biebe nunku, newikale ne muoyo.

²⁹ Kadi yeye wakasua kudibingisha, wakakonka Yesu ne, Mukuetu nganyi?

Lusumuinu lua Muena Samalea

³⁰ Yesu wakamukudimuna dî ne, Muntu wakabika mu Yelushalema, wakadi uhueka ku Yeleko; wakatukidila mu bianza bia banyengi, bakamuvula bilulu biandi, bakamukuma, bakaya, bakamushîa ne tshioyoyo.

³¹ Muakuidi wa Nzambi wakadi uhueka mu nshila au; hakamoneye muntu, wakahitshila ku luseke lukuabo.

³² Muena Lewi muomumue, hakalueye ku muaba au, hakamumoneye, wakahitshila ku luseke lukuabo kabidi.

³³ Kadi Muena Samalea wakadi ulua mu nshila, wakalua kudiye; hakamumoneye, luse luakamukuata,

³⁴ wakalua kudiye, wakamujingila tshilulu ha mputa, wakelabu manyi ne nvinyo; wakamushikika ha nyima ha nyama wandi, wakalua nʼandi ku nsubu wa tshilala benyi, wakamulama bimpe.

³⁵ Hakatshiabu wakahatula ndenalio ibidi, wakaha umena nsubu wa tshilala benyi, wakamuambila ne, Umulame bimpe; hanahingana, nenkuhingishile binga bintu biwahana.

³⁶ Bantu aba basatu, wewe udi wela meshi ne, Muena kuabo ne wakatukidila mu bianza bia banyengi nganyi?

³⁷ Yeye wakakudimuna di ne, Wakamufua luse. Yesu wakamuambila ne, Ya biebe wenze muomumue.

Mâta ne Malia

³⁸ Hakadibo baya mu nshila, Yesu wakafika ku musoko mukuabo; mukashi wakadimu, dina diandi Mâta, wakamubuesha mu nsubu muandi.

³⁹ Wakadi ne muakunyiʼandi mukashi dina diandi Malia, yeye wakadi mushikame ku makasa a Mukelenge, ulelesha dî diandi.

⁴⁰ Kadi Mâta wakadi utata ne mudimu wa bungi wa mu nsubu; yeye wakalua kudi Yesu, wakamukonka ne, Mukelenge, kuena ubenga bua muakunyiʼanyi anshile mudimu nkayanyi, anyi? Umuambile alue kunkuatshisha.

⁴¹ Mukelenge wakamuandamuna ne, Mâta, Mâta, wewe udi utamba kuela meshi a malu a bungi adi akutatshisha;

⁴² tudi anu ne tshintu tshimue bualu; Malia wakusungula luseke ludi luimpe, kabena bamanye mua kumunyengalu.