Genese 9 - Mukanda wa Nzambi Dihungila Dikulukulu ne Dihungila Dihia-dihia 2003

Nzambi Udi Uhunga Tshihungidi ne Noa

¹ Nzambi wakasankisha Noa ne bana bandi, wakabambila ne, Nulelangane, nukumbane ba bungi, nuikale ha buloba buonso.

² Ditshina ne buowa nebikale kudi nyama yonso ne kudi nyunyu yonso ya mulu ne kudi tshintu tshionso tshidi tshidikoka hanshi ne kudi minyinyi ya mu mai manene bua bualu buenu, nakafila bintu bionso mu bianza bienu.

³ Bintu bionso bidi ne muoyo mbia kudia bienu, bu munakanuha midioko, mbu mundi nnuha bintu bionso.

⁴ Kadi kanudi muoyo wa munyinyi wonso, mmashi mene mene.

⁵ Numanye kabidi ne, Nendombe bulami bua mashi enu, nembulombe kudi nyama yonso ne kudi muntu yonso, nendombe bulami bua muoyo wa muntu hankatshi ha muntu ne muntu

⁶ Muntu yonso udi umatshisha mashi a munga muntu hanshi, nebamatshishe mashi andi hanshi, bualu bua Nzambi wakafuka bantu mu tshifuanyikishi tshiandi.

⁷ Nuenu kabidi nulelangane, nukumbane, nuvulangane ba bungi ha buloba, nukumbanehu.

⁸ Nzambi wakambila Noa ne bana bandi balume ne,

⁹ Meme bianyi ndi njadika tshihungidi tshianyi nʼenu ne bana benu badi banulonda.

¹⁰ Ndi ntshijadika ne bintu bionso bidi ne muoyo ne nyunyu ne bimuna ne nyama yonso bidi nʼenu bintu bionso bia ha buloba biakaluhuka mu buatu.

¹¹ Nenjadike nʼenu tshihungidi tshianyi ne, Tshiena njimisha bintu bionso ne mai kabidi nansha, mai kaena awilangana kabidi bua kujimishau buloba.

¹² Nzambi wakamba ne, Etshi tshidi tshimanymu tshia tshihungidi tshindi nteka hankatshi hetu ne bintu bionso bidi nʼenu to ne tshiendelele.

¹³ Ndi muteke muanzankongolo wanyi mulu, newikale bu tshimanymu tshia tshihungidi hankatshi hetu ne buloba.

¹⁴ Hashishe hanatuma matutu mulu, muanzankongolo neumueneke mu matutu,

¹⁵ nenvuluke tshihungidi tshianyi tshidi hankatshi hetu ne bintu bionso bidi ne muoyo, ne mai kaena avulangana kabidi bua kujimishau bintu bionso

¹⁶ Muanzankongolo wanyi newikale mu matutu, hanaumona, nenvuluke tshihungidi tshia kashidi tshidi hankatshi ha Nzambi ne bintu bionso bidi ne muoyo ha buloba.

¹⁷ Nzambi wakambila Noa ne, Etshi ntshimanyinu tshia tshihungidi tshinakujadika hankatshi hetu ne bintu bionso bidi ne muoyo ha buloba.

Noa Udi Ukuatshika Maluvu

¹⁸ Bana balume ba Noa bakaluhuka nʼandi mu buatu bakadi Sheme, Hama ne Yafete Hama wakadi nkambua wa Kanâna.

¹⁹ Basatu aba bakadi bana balume ba Noa ne tunkanuniuna tuabo tuakamuangalaka ha buloba buonso.

²⁰ Noa wakabanga kuikala tshidime ne yeye wakakuna mitshi ya tumuma tukese.

²¹ Noa wakanua nvinyo, wakakuatshika nvinyo, wakalala mu ntenta wandi butaka.

²² Hama, tatu wa Kanana, wakamona butaka bua tatu wandi, wakamanyisha bana babo babidi bakadi ha bule.

²³ Sheme ne Yafete bakangata tshilulu, bakatshiteka ha makaya abo, bakaya tshianyima, bakabuikila butaka bua tatu abo, mpala yabo yakadi mitangile kukuabo, kabakatangila butaka bua tatuʼabo nansha.

²⁴ Noa wakatabala ku muoyo wandi, wakamanya bu muakenza muanʼandi wa mukala.

²⁵ Yeye wakamba ne, Kanana udi muedibue mulau, yeye neikale muhika wa bahika kudi bana babo.

²⁶ Yeye wakamba kabidi ne, Yehowa, Nzambi wa Sheme, atumbishibue, Kanana neikale muhika wandi.

²⁷ Nzambi akumbashe Yafete, yeye ashikame biandi mu ntenta ya Sheme, Kanana ikale muhika wandi kabidi.

²⁸ Noa wakashala ne muoyo bidimu nkama isatu ne makumi atanu ku nyima kua nvula munene.

²⁹ Matuku onso a Noa akadi bidimu nkama tshitema ne makumi atanu, yeye wakafua.