Genese 4 - Mukanda wa Nzambi Dihungila Dikulukulu ne Dihungila Dihia-dihia 2003

Kana ne Ebele

¹ Adama wakamanyangana ne Eva, mukashi wandi, ne yeye wakimita difu, wakalela Kana, wakamba ne, Nakuangata muntu kudi Yehowa.

² Yeye wakalela muakunyʼandi Ebele kabidi Ebele wakadi mulami wa mikoko, kadi Kana wakadi tshidime.

³ Dituku dikuabo Kana wakalua ne bintu biakamena mu buloba bu mulambu kudi Yehowa.

⁴ Ebele kabidi wakalua ne ban a bute ba mikoko ne dianyi diai Yehowa wakitabusha Ebele ne mulambu wandi,

⁵ kadi yeye wakahidia Kana ne mulambu wandi Kana wakadi ne tshiji, wakabungama

⁶ Yehowa wakakonka Kana ne, Udi ne tshiji bua tshinyi? Udi ubungamina tshinyi?

⁷ Biwenza bimpe, kuena ubanduluka, anyi? Kadi biwokala kuyi wenza bimpe, bualu bubi budi bualamina ku mbelu kuebe, mutshima wa bubi newikale kudi, kadi wewe ubukokeshe.

⁸ Kana wakambila Ebele muakunyʼandi bualu ebu Hashishe hakadibo mu budimi, Kana wakabika ku mpala kua Ebele muakunyʼandi, wakamushiha.

⁹ Yehowa wakakonka Kana ne, Muakunyʼebe Ebele udi kudi kunyi? Yeye wakamba ne, Tshiena mumanye, ndi mulami wa muakunyʼanyi, anyi?

¹⁰ Yeye wakamukonka ne, Wewe wakuenza tshinyi? Muadi wa mashi a muakunyʼebe udi wela di kundi difume ha buloba.

¹¹ Katataka wewe wakuedibua mulau mufume ha buloba buakubulula mukana muabu bua kumina mashi a muakunyʼebe ku tshianza tshiebe,

¹² hawadima buloba, kabuena bukumeneshila bintu bimpe, wewe newikale munyemi ne muena tshiendenda ha buloba.

¹³ Kana wakambila Yehowa ne, Dikenga dianyi didi dintamba bukole

¹⁴ Mona, wewe wakungihata lelu ha buloba, nengikale musokome ku mesu kuebe, nengikale munyemi ne muena tshiendenda ha buloba, ne hashishe yonso wansangana neanshihe.

¹⁵ Yehowa wakamuambila ne, Muntu yonso udi ushiha Kana, nebamusombuele misangu muanda mutekete Yehowa wakalekela Kana tshimanyinu bua wamusangana kamushihi.

¹⁶ Kana wakumuka ku mesu kua Yehowa, wakashikama mu buloba bua Nodo, ku esete kua Edene.

¹⁷ Kana wakamanyangana ne mukashi wandi, yeye wakimita difu, wakalela Hanoka, yeye wakasa musoko, wakidika musoko dina dia muanʼandi Hanoka.

¹⁸ Hanoka wakalela Ilada ne Ilada wakalela Mehuyaela ne Mehuyaela Wakalela Metushaele ne Metushaele wakalela Lemeke.

¹⁹ Lemeke wakabaka bakashi babidi, dina dia muadi diakadi Ada, ne dina dia tshilondi ne, Sila.

²⁰ Ada wakalela Yabala, yeye wakadi nkambua wa badi bashikama mu nsubu ya ntenta ne badi ne bimuna.

²¹ Dina dia muakunyʼandi diakadi Yubala, yeye wakadi nkambua wa badi bimba bisanji ne nshiba.

²² Sila wakalela Tubalakana, yeye wakadi mutudi wa tshiamu tshia mitaku ne tshiamu tshifike, muakunyʼandi mukashi wakadi Nama.

²³ Lemeke wakambila bakashi bandi ne, Ada ne Sila, telejai matshu, bakashi ba Lemeke, unvuai di dianyi, nakashiha muntu bualu bua yeye wakantaha mputa, nakashiha nsongalume bualu bua yeye wakantuta,

²⁴ biasombuelabo Kana nusangu muanda mutekete, bulelela, nebasombuele Lemeke misangu makumi muanda mutekete ne muanda mutekete.

²⁵ Adama wakamanyangana ne mukashi wandi kabidi, Wakalela muana mulume, wakamuidika dina ne, Sheta Wakamba ne, Nzambi wakumpa muana mukuabo mu muaba wa Ebele, bualu bua Kana wakamushiha.

²⁶ Sheta wakalela muana mulume kabidi, wakamuidika dina ne, Enosha Etshi ntshibangidilu tshiakabikilabo dina dia Yehowa.