Genese 2 - Mukanda wa Nzambi Dihungila Dikulukulu ne Dihungila Dihia-dihia 2003

¹ Diulu ne buloba ne bintu bionso biakashikishibua, buonso buabi.

² Mu dituku dia muanda mutekete Nzambi wakadi mumane kushikisha mudimu wandi wakenzeye, yeye wakikisha dituku dia muanda mutekete ku mudimu wonso wakenzeye

³ Nzambi wakavudishila dituku dia muanda mutekete disanka, wakadijidila, bualu bua yeye wakikisha dituku diadia ku mudimu wandi wonso wa kufuka ne kuenza.

Bantu mu Budimi bua Edene

⁴ Eku nkulondolola kua malu a diulu ne a buloba hakafukibuabi Mu dituku diakenza Yehowa Nzambi buloba ne diulu,

⁵ midioko ya mu madimi kayakanza kudiunda ha buloba ne mashinde kâkanza kutoloka, bualu bua Yehowa Nzambi kakanza kulokesha nvula ha buloba, ne kakuakadi muntu bua kuihileye buloba,

⁶ kadi dibungi diakabanda ha buloba, ne tshitelele tshiakadi ha buloba buonso.

⁷ Yehowa Nzambi wakafuka mulume ne dinfuenkenya dia buloba, wakela muhuya wa muoyo mu diulu diandi, ne mulume wakalua ne muoyo.

⁸ Yehowa Nzambi wakakuma bintu mu budimi ku esete, mu Edene, wakatekamu mulume wakafukeye.

⁹ Yehowa Nzambi wakamenesha mitshi yonso idi buimpe ku mesu ne idi mimpe bua kudia mu buloba, mutshi wa muoyo kabidi wakadi munkatshi mua budimi, ne mutshi wa lungenyi lua kujingulula malu mimpe ne malu mabi.

¹⁰ Musulu wa mai wakaluhuka mu Edene bua kumiamina midioko mai, wakahanduluka maboko anai.

¹¹ Dina dia diboko dia kumudilu didi Pishona, didi dinyunguluka buloba buonso bua Hawila, kudi or,

¹² or wa mu buloba abu udi muimpe, ne mabue a mushinga mukole a bdelhum ne a onyx adiku.

¹³ Dina dia diboko dibidi didi Gihona, didi dinyunguluka buloba buonso bua Atiopa.

¹⁴ Dina dia diboko disatu didi Hidekela, didi dinyunguluka ku esete kua buloba bua Ashû. Dina dia diboko dinai didi Pelata.

¹⁵ Yehowa Nzambi wakangata mulume, wakamuteka mu budimi bua Edene bua kubuihileye ne bua kubulama.

¹⁶ Yehowa Nzambi wakamuelela mukenji ne, Udi mua kudia mamuma a mitshi yonso ya mu budimi, bu mûdi musue,

¹⁷ kadi mamuma a mutshi wa lungenyi lua kujingulula malu mimpe ne malu mabi kuadi nansha, bualu bua mu dituku diudi wadia wewe neufue bulelela.

¹⁸ Yehowa Nzambi wakamba ne, Kambimpe bua mulume ashale nkayandi nansha, nemmufukile mukuatshishi bu mudiye.

¹⁹ Yehowa Nzambi wakafuka nyama yonso ya mu madimi ne nyunyu yonso ya mulu ne buloba, wakalua nʼai kudi mulume bua kutangila bu muakadiye mua kuyidika, dina dionso diakidikeye tshifukibue tshionso diakadi dina dia tshi.

²⁰ Mulume wakidika bimuna bionso ne nyunyu yonso ya mu diulu ne bimuna bionso bia mu madimi mena abi, kadi mulume kakadi ne mukuatshishi wa bu muakadiye nansha.

²¹ Yehowa Nzambi wakaladika mulume tulu tukole, ne yeye wakalala tulu, wakangata lubale luandi lumue, Wakabikila musunyi kabidi,

²² ne lubale luakangata Yehowa Nzambi kudi mulume, yeye Wakenza nʼalu mukashi, wakalua nʼandi kudi mulume.

²³ Mulume wakamba ne, Eu udi mufuba wa mifuba yanyi ne musunyi wa misunyi yanyi, nebamuedike ne, Mukashi, bualu bua bakamuangata kudi mulume.

²⁴ Bua bualu ebu mulume neashiye tatuʼandi ne mamu andi, nealamate mukashi wandi, bubidi buabo nebikale mubidi umue.

²⁵ Bubidi buabo, mulume ne mukashi, bakadi butaka, kabakadi ne bundu.