Ekesode 8 - Mukanda wa Nzambi Dihungila Dikulukulu ne Dihungila Dihia-dihia 2003

¹ Yehowa wakambila Mose ne, Ya biebe kudi Palô, umuambile ne, Yehowa udi Wamba ne, Lekela bantu banyi baye kuntendelela.

² Biwahidia kubalekela, nentume biula mu buloba buebe.

³ Musulu newikale tente ne biula, neubuele mu nsubu webe ne mu nsubu webe wa bulalu ne ha bulalu buebe, ne mu nsubu ya bahika bebê ne kudi bantu bebe, ne mu nfulu yenu ne mu binu bienu.

⁴ Biula nebilue hamʼbidi hebe ne hamʼbidi ha bantu bebe ne hamʼbidi ha bahika bebe bonso.

⁵ Yehowa wakela dî kudi Mose ne, Wambile Alona ne, Olola tshianza tshiebe ne mulangala webe ha mutu ha misulu ne ha mutu ha tusulu ne mashiba bualu bua kutuma biula mu buloba bua Ejipitu.

⁶ Alona wakolola tshianza tshiandi ku mutu kua mai a mu Ejipitu, biula biakabaha, biakûsha buloba bua Ejipitu tente.

⁷ Bena bilengulengu bakenza muomumue ne manga abo, bakatuma biula mu buloba bua Ejipitu.

⁸ Palo Wakabikila Mose ne Alona, wakamba ne, Nundombele Yehowa, yeye umushe biula kundi ne kudi bantu banyi, nendekele bantu baye kushihela Yehowa nyama.

⁹ Mose wakambila Palô ne, Wikale ne butumbi ebu kundi, ndituku kai diudi musue meme nkulombele bua kumusha biula kûdi ne kudi bantu bebe ne kudi bahika bebe ne mu nsubu yenu, bishale anu mu musulu nkayau?

¹⁰ Yeye wakamba ne, Makelela Mose wakamba ne, Bualu buikale bu mu dî diebe, bua kukumanyisha ne, Kakuena nzambi mukuabo bu Yehowa Nzambi wetu.

¹¹ Biula nebiumuke kûdi ne ku nsubu yebe, ne kudi bahika bebe ne kudi bantu bebe, nebishale anu mu musulu nkayau.

¹² Mose ne Alona bakaluhuka kudi Palô. Mose wakalomba Yehowa bua buila biakatumeye kudi Palô.

¹³ Yehowa wakenza bu mu dî dia Mose, biula biakafua mu nsubu ne mu mbanza ne mu madimi.

¹⁴ Bakabisangisha mu bisumbu, ne buloba buakanunka muhuya mubi.

¹⁵ Kadi bakatangila Palô ne, Bualu buakushika, wakakolesha mutshima wandi, kakabinvuila, bu muakamba Yehowa.

Mulau wa Nkusu

¹⁶ Yehowa wakela dî kudi Mose ne, Wambile Alona ne, Olola mulangala webe, ukume dinfuenkenya dia buloba, dinfuenkenya nedikudunuke nkusu ya mu mitu mu buloba buonso bua Ejipitu.

¹⁷ Bakenza nunku, Alona wakolola tshianza tshiandi ne mulangala wandi, wakakuma dinfuenkenya dia buloba ne nkusu yakadi kudi bantu ne kudi nyama, dinfuenkenya dionso dia ha buloba diakakudimuka nkusu mu buloba bua Ejipitu buonso.

¹⁸ Bena bilengulengu bakenza nunku ne manga abo bua kutuma nkusu, kadi kabakamanya mua kuenza, nkusu yakadi kudi bantu ne kudi nyama.

¹⁹ Bena bilengulengu bakambila Palo ne, Bualu ebu budi bu munu wa Yehowa, kadi mutshima wa Palô wakakoleshibua, yeye kakabunvuila, bu muakamba Yehowa.

Mulau wa Tuishi

²⁰ Yehowa wakambila Mose ne, Ubike ne dinda dionso, uye kudi Palô hayeye ku mai, umuambile ne, Yehowa udi Wamba ne, Ulekele bantu banyi, baye kuntendelela.

²¹ Biwahidia kulekela bantu banyi, nentumine bisumbu bia tuishi kûdi ne kudi bahika bebe ne kudi bantu bebe ne mu nsubu yenu, nsubu ya Bena Ejipitu neyikale ne bisumbu bia tuishi tente, ne hanshi ha buloba kabidi.

²² Mu dituku adi nendame buloba bua Goshene budi bantu banyi bashikame, bisumbu bia tuishi kabiena bifikaku, bualu bua kukumanyisha ne, Meme ndi Yehowa hanshi ha buloba.

²³ Nenteke ditahulula hankatshi ha bantu banyi ne bantu bebe, nengenze tshimanyinu etshi makelela.

²⁴ Yehowa Wakenza nunku, ne bisumbu binene bia tuishi biakabuela mu nsubu wa Palô ne mu nsubu ya bena mudimu bandi, tuishi tuakahaula buloba bua Ejipitu buonso.

²⁵ Palô Wakabikila Mose ne Alona, wakamba ne, Yai bienu, nushihele Nzambi wenu nyama mu buloba bua Ejipitu.

²⁶ Mose wakamba ne, Katuena mua kuenza nunku, bituashihela Yehowa Nzambi wetu nyama, netuenze bualu budi bufuisha Bena Ejipitu bundu, bituenza bualu budi bufuisha Bena Ejipitu bundu ku mesu, bobo kabena batukuma ne mabue, anyi?

²⁷ Netuye luendu lua matuku asatu mu tshihela, netushihele Yehowa Nzambi wetu nyama bu muatuambileye.

²⁸ Palô wakamba ne, Nennulekele, nuye mu tshihela bua kushihela Yehowa Nzambi wenu nyama, kadi kanuyi kule, nundombele Nzambi.

²⁹ Mose wakamba ne, Mona, nengumuke kûdi, nendombe Yehowa ne yeye neamushe bisumbu bia tuishi kudi Palô ne kudi bena mudimu bandi ne kudi bantu bandi makelela, kadi Palô katu dingi kabidi bua kulekela bantu baye kushihela Yehowa nyama.

³⁰ Mose wakaluhuka kudi Palô, wakalomba Yehowa.

³¹ Yehowa wakenza bu mu dî dia Mose yeye wakumusha bisumbu bia tuishi kudi Palô ne kudi bena mudimu bandi ne kudi bantu bandi, nansha kishi kamue kakashala.

³² Palô wakakolesha mutshima wandi musangu eu kabidi, yeye bakalekela bantu bua kuyabo.