Ekesode 7 - Mukanda wa Nzambi Dihungila Dikulukulu ne Dihungila Dihia-dihia 2003

¹ Yehowa wakambila Mose ne, Nakukuvuisha bu Nzambi ku mesu kua Palô, ne Alona mukuluʼebe neikale muakuidi webe.

² Wewe newambe mei onso andi nkuambila, ne Alona mukuluʼebe neambile Palo ne, Ulekele Bena Isalele mu buloba buebe.

³ Nenkoleshe mutshima wa Palô, nennudishe bimanyinu bianyi ne malu anyi a kukema mu buloba bua Ejipitu.

⁴ Kadi Palô kena ukunyuila, ne meme nenteke tshianza tshianyi ha Ejipitu, nempatule bantu banyi Bena Isalele mu buloba bua Bena Ejipitu ku dilumbulula dikole.

⁵ Bena Ejipitu nebamanye ne meme ndi Yehowa, hangolola tshianza tshianyi ha Ejipitu ne hanahatula Bena Isalele munkatshi muabo.

⁶ Mose ne Alona bakenza bu muakamba Yehowa, bakenza nunku.

⁷ Mose wakadi ne bidimu makumi muanda mukulu, ne Alona wakadi ne bidimu makumi muanda mukulu ne bisatu, hakadibo bakula ne Palô.

Mutengula wa Alona

⁸ Yehowa wakambila Mose ne Alona ne,

⁹ Hanuambila Palo ne, Nundeshe bualu bua kukema, hashishe, wewe wambile Alona ne, Angata mulangala webe, uwele hanshi ku mesu kua Palô ne mulangala neukudimuke nyoka.

¹⁰ Mose ne Alona bakaya kudi Palô, bakenza bu muakamba Yehowa: Alona wakela mulangala wandi hanshi ku mesu kua Palô ne bantu bandi, ne mulangala wakakudimuka nyoka.

¹¹ Palô wakabikila bena meji ne bena muhongo ne bena bilengulengu ba mu Ejipitu, bakenza muomumue ne manga abo.

¹² Muntu ne mundi wakela mulangala wandi hanshi, wakakudimuka nyoka, kadi mulangala wa Alona wakatuma milangala yabo.

¹³ Mutshima wa Palo wakakoleshibua, yeye kakabunvuila, bu muakamba Yehowa.

Mulau wa Mashi

¹⁴ Yehowa wakambila Mose ne, Mutshima wa Palô udi ne tshitshu, yeye udi uhidia kulekela bantu.

¹⁵ Ya biebe kudi Palô ne dinda, hayeye ku mai, wimane kukala kua musulu bua kusangakena nʼandi, uye ne mulangala wakakudimuka nyoka au mu tshianza tshiebe.

¹⁶ Umuambile ne, Yehowa, Nzambi wa Bena Ebelu, wakuntuma kudi ne, Ulekele bantu banyi, baye bua kuntendelela mu tshihela, ku diambedi to ne mpindiu wewe kuena muanze kunvua.

¹⁷ Yehowa udi wamba ne, Mu bualu ebu wewe neumanye ne, Meme ndi Yehowa tangila, nenkume mai adi mu musulu ne mulangala udi mu tshianza tshianyi, ne mai onso neakudimuke mashi.

¹⁸ Minyinyi ya mu mai idi mu musulu neyifue, mai neanunke muhuya mubi, mai a mu musulu neatonde Bena Ejipitu.

¹⁹ Yehowa wakela dî kudi Mose ne, Wambile Alona ne, Angata mulangala webe, olola tshianza tshiebe ha mutu ha mai a mu Ejipitu, ku mutu kua misulu yabo ne tusulu tuabo ne mashiba abo, mai onso akudimuke mashi, mashi neikale mu buloba bua Ejipitu buonso ne mu milondo ya mitshi ne mu milondo ya mabue.

²⁰ Mose ne Alona bakenza bu muakamba Yehowa, Alona wakabisha mulangala, wakakuma mai akadi mu musulu, ku mesu kua Palô ne ku mesu kua bantu bandi, mai onso akadi mu musulu akakudimuka mashi.

²¹ Minyinyi ya mu mai yakadi mu musulu bakafua, musulu wakamuha muhuya mubi, ne Bena Ejipitu kabakamanya mua kunua mai a mu musulu, mashi akadi mu buloba bua Ejipitu buonso,

²² Bena bilengulengu ba mu Ejipitu bakenza muomumue ne manga abo, mutshima wa Palô wakakoleshibua, yeye kakabunvuila, bu muakamba Yehowa.

²³ Palô wakanyunguluka, wakaya mu nsubu wandi, kakateka bualu ebu mu mutshima wandi.

²⁴ Bena Ejipitu bonso bakumbula mena hehi ne musulu, bakakeba mai a kunua, bualu bua kabakamanya mua kunua mai a mu musulu.

Mulau wa Buihi

²⁵ Matuku akakumbana muanda mutekete ku nyima kua dituta dia mai a mu musulu kudi Yehowa.