Ekesode 6 - Mukanda wa Nzambi Dihungila Dikulukulu ne Dihungila Dihia-dihia 2003

¹ Yehowa wakambila Mose ne, Katataka wewe mutangile bu mundi ngenzela Palô, bualu bua yeye neabalekele ku tshianza tshikole, neabihate mu buloba buandi ne tshianza tshikole.

² Nzambi wakambila Mose ne, Meme ndi Yehowa.

³ Nakamueneka kudi Abalahama ne kudi Isaka ne kudi Yakoba bu Nzambi wa Bukole Buonso, kadi bobo kabakamanya dina dianyi Yehowa nansha

⁴ Meme kabidi nakajadika nʼabo tshihungidi tshianyi bua kubaha buloba bua Kanana, buloba buakadibo bashikamamu bu benyi.

⁵ Bualu bukuabo, nakunvua mikemu ya Bena Isalele badi mu butaka kudi Bena Ejipitu, ndi muvuluke tshihungidi tshianyi.

⁶ Nunku wambile Bena Isalele ne, Ndi Yehowa, ne meme nennuhatule muinshi mua majitu a Bena Ejipitu, nennusungile ku buhika buabo, nennuhikule ne diboko diolola ne dilumbulula dikole.

⁷ Nennuangate bu bantu banyi ne meme nengikale Nzambi wenu, nuenu nenumanye ne, Meme udi Yehowa, Nzambi wenu, udi unuhatula muinshi mua majitu a Bena Ejipitu.

⁸ Meme nendue nʼenu mu buloba bunakalaya Abalahama ne Isaka ne Yakoba, nennuhebu bu buhianyi ndi Yehowa.

⁹ Mose wakambila Bena Isalele nunku kadi bobo kabakatumikila dî dia Mose bualu bua kanyinganyinga ka mutshima, ne bua dikenga dia buhika.

¹⁰ Yehowa wakambila Mose ne,

¹¹ Ya biebe kudi Palô, mukelenge wa Ejipitu, umuambile ne, Lekela Bena Isalele bahatuke mu buloba buebe.

¹² Mose wakamba ku mesu kua Yehowa ne, Mona, Bena Isalele kabena banze kutumikila dî dianyi, Palô neunvuile muena tshikukumina kudi kunyi?

¹³ Yehowa wakambila Mose ne Alona mei a kuya nʼau kudi Bena Isalele ne kudi Palo, mukelenge wa Ejipitu, bualu bua kuhatula Bena Isalele mu buloba bua Ejipitu.

¹⁴ Aba mbantu badi ku mutu kua nsubu ya batatuʼabo. Bana ba balume ba Lubena, muanʼa bute wa Isalele Hanoka ne Palu, Heselona ne Kâmi, â mmeku a Lubena.

¹⁵ Bana ba balume ba Shimeona Yemuele ne Yamina ne Obada ne Yakina ne Soha ne Shaula, muana wa balume wa mukashi wa Bena Kanana, â mmeku a Shimeona.

¹⁶ Mena a bana ba balume ba Lewi ku bikondo biabo adi nunku Geshona ne Kohata ne Melah, bidimu bia Lewi biakadi lukama makumi asatu ne muanda mutekete.

¹⁷ Bana ba balume ba Geshona: Libini ne Shimei, ku meku abo.

¹⁸ Bana ba balume ba Kohata: Amalama ne Yisehâ ne Hebelone ne Uziele, bidimu bia Kohata biakadi lukama ne makumi asatu ne bisatu.

¹⁹ Bana ba balume ba Melali: Mali ne Mushi. Â mmeku a, Bena Lewi ku bikondo biabo.

²⁰ Amalama wakabaka Yokebede, muanʼabo wa bakashi ne tatu wandi, ne yeye wakamulelela Alona ne Mose, bidimu bia Amalama biakadi lukama ne makumi asatu ne muanda mutekete.

²¹ Bana ba balume ba Yisehâ: Kola ne Nefege ne Zikeli.

²² Bana ba balume ba Uziele Mishaele ne Ehsafana ne Siteli.

²³ Alona wakabaka Elisheba, muana wa bakashi wa Aminadaba, muanʼabo wa bakashi ne Nashona ne yeye wakamulelela Nadaba ne Abihu, Eleazâ ne Itamâ.

²⁴ Bana ba balume ba Kola: Asi ne Elekana ne Abiasafa, â mmeku a Bena Kola.

²⁵ Eleazâ, muana wa balume wa Alona, wakabaka umue wa bana ba bakashi ba Putiele, yeye wakamulelela Pinehasa. Bantu aba badi ku mutu kua nsubu ya batatuʼabo, Bena Lewi, ku meku abo.

²⁶ Bantu aba Mose ne Alona mbantu bakambila Yehowa ne, Hatulai Bena Isalele mu buloba bua Ejipitu ku misumba yabo.

²⁷ Bantu aba Mose ne Alona tuakambila Palo, mukelenge wa Ejipitu, ne, Lekela Bena Isalele mu Ejipitu Ka Mose ne Alona aba.

²⁸ Mu dituku diakadi Yehowa uyikila ne Mose mu buloba bua Ejipitu,

²⁹ Yehowa wakambila Mose ne, Meme ndi Yehowa, Wambile Palô, mukelenge wa Ejipitu, mei onso anakuambila.

³⁰ Mose wakamba ku mesu kua Yehowa ne, Mona, meme ndi muena tshikukumina, Palo neangunvuile munyi?