Ekesode 25 - Mukanda wa Nzambi Dihungila Dikulukulu ne Dihungila Dihia-dihia 2003

Bena Isalele badi ne Bualu bua Kufila Bintu Biabo

¹ Yehowa wakambila Mose ne,

² Wambile Bena Isalele bua kumpeshabo bintu bia kuntendelela nʼabi, nenuangate kudi muntu ne muntu bintu bidi mutshima wandi musue bua kuntendelela nʼabi.

³ Ebi mbintu binudi mua kuangata kudibo or ne argent ne tshiamu tshia mitaku,

⁴ ne bilulu bia bleu ne bilulu bifikuluke ne bilulu bikunze-kunzû ne bilulu bia lin ne miosa ya mbushi,

⁵ ne biseba bia bimpanga bina mu mai makunze, ne biseba bia nkonge ne mutshi wa acacia,

⁶ ne manyi a muinda, manananshi adibo bela mu manyi a kulaba hamʼbidi, ne manyi adi atua dihembu,

⁷ mabue a mushinga mukole adibo bateka mu efoda ne mu tshiamu tshidibo baluata ha tshiadi.

⁸ Bobo bangashile tshitendelelu, bua meme kuikala munkatshi muabo.

⁹ Nutshiase bu bintu binakakulesha ne bu tshidikishilu tshia tshitendelelu ne bu tshidikishilu tshia bintu bia kutekamu.

Mushete wa Mei a Tshihungidi

¹⁰ Bobo nebenze mushete wa mutshi wa acacia buludi bua mushete nebuikale coudées ibidi ne tshituha, ne butshiama buau nebuikale coudée umue ne tshituha, ne bule buau bua mulu nebuikale coudée umue ne tshituha.

¹¹ Wewe neulamike tshiamu tshia or mutambe buimpe ha nyima honso ne munda mua mushete kabidi, neuteke tshiamu tshia or ku mibangu ya mushete.

¹² Enza biebe nkanu ya or mai, witeka kû mikolo ya mushete, ibidi ku luseke lumue, ibidi ku luseke lukuabo.

¹³ Enza biebe mitshi ya acacia, lamika tshiamu tshia or ku nseke yai yonso.

¹⁴ Neubueshe mitshi ai mu nkanu idi ku nseke ya mushete, bua kutuala nʼai mushete.

¹⁵ Mitshi ai neyikale mu nkanu ya mushete, kayumuki nansha.

¹⁶ Wewe neuteke mu mushete mabue a dihungila andi nkuha.

¹⁷ Wewe newenze tshibuikilu ne tshiamu tshia or mutambe buimpe, buludi buatshi nebuikale coudées ibidi ne tshituha ne butshiama buatshi nebuikale coudée umue ne tshituha.

¹⁸ Enza biebe bakeluba babidi ne or mutudibue, ubateke ku matshika a tshibuikilu tshia mushete.

¹⁹ Enza mukeluba umue ku butshika bumue ne mukeluba mukuabo ku butshika bukuabo enza bakeluba ne tshibuikilu tshia mushete ne tshituha tshijima tshia or.

²⁰ Bakeluba nebolole mahuahua abo kulu, nebabuikile tshibuikilu tshia mushete ne mahuahua abo, bobo batangilangana mpala, mpala yabo neyikale mitangile ha tshibuikilu tshia mushete.

²¹ Wewe neuteke tshibuikilu ha mutu ha mushete neubueshe mabue a dihungila andi nkuha mu mushete.

²² Meme ne nsangakene nʼebe aha, nensombe nʼebe ha mutu ha tshibuikilu tshia mushete, hankatshi ha bakeluba badi ha mutu ha mushete, nenkumanyishe malu onso andi nkuhesha bu mikenji kudi Bena Isalele.

Mesa a Bidia Bilesha

²³ Wewe newenze mesa a mutshi wa acacia buludi buau nebuikale coudées ibidi, ne butshiama buau nebuikale coudée umue, ne bule buau bua mulu nebuikale coudée umue ne tshituha.

²⁴ Wewe neulamike tshiamu tshia or mutambe buimpe mu nseke yonso, ne ku mpenge kabidi.

²⁵ Enza mushonyi wa or bunene bua butshiama bua tshianza ku matshika onso, enza tshintu tshia or ku matengu onso.

²⁶ Enza nkanu ya or mai, ne teka nkanu ku mikolo mai ya mesa.

²⁷ Teka nkanu hehi ne mpenge ya mesa bualu bua kutuala nʼai mesa

²⁸ Enza biebe mitshi ya acacia, ulamike or ku nseke yai yonso, bua kutuala nʼai mesa.

²⁹ Wewe newenze malonga ne nkuta ne mpanza ne bihanza bia or mutambe buimpe.

³⁰ Teka bidia bilesha ha mesa au matuku onso ku mpala kuanyi.

Tshitekelu tshia Minda tshia Or

³¹ Wewe newenze tshitekelu tshia minda tshia or mutambe buimpe, nebenze tshitekelu etshi ne or muhite, ne tshishikaminu tshiatshi ne mukolo watshi, tukoho tuatshi ne mahu atshi ne bilongo biatshi nebenze ne tshituha tshimue tshia or mene tshiakenzabo nʼatshi tshitekelu.

³² Enza mahu asambombo ha tshitekelu, mahu asatu ku luseke lumue, mahu asatu ku luseke lukuabo.

³³ Uzole tukoho tusatu bu bilongo bia amande mu ditamba dimue, dihu ne tshilongo dihu ne tshilongo, uzole tukoho tusatu bu bilongo bia amande mu ditamba dikuabo, dihu ne tshilongo dihu ne tshilongo, uzole nunku ku matamba asambombo adi masa ku tshitekelu.

³⁴ Enza tukoho binai tua ha tshitekelu bu bilongo bia amande ne mahu atshi ne bilongo bia tshi.

³⁵ Enza dihu ne tshituha tshimue tshia or hankatshi ha mahu abidi, hankatshi ha mahu abidi ku mahu asambombo a ha tshitekelu tshia minda.

³⁶ Bintu ebi bionso ubienze ne tshituha tshimue tshia or, tshintu tshijima tshienza ne tshituha tshimue tshia or muedibue mutambe buimpe.

³⁷ Enza minda muanda mutekete, bualu bua kutemenayi muaba udi ku mpala kua tshitekelu.

³⁸ Enza mpandu ne tulonga tukese bia tsiutekelu ne or mutambe buimpe.

³⁹ Enza tshitekelu ne bintu ebi bionso ne ntalanta umue wa or mutambe buimpe.

⁴⁰ Udimuke biebe bua kuenza bintu bionso bu tshidikishilu tshinakukulesha mu mukuna.