Ekesode 19 - Mukanda wa Nzambi Dihungila Dikulukulu ne Dihungila Dihia-dihia 2003

Bena Isalele ku Mukuna wa Sinai

¹ Hakadi Bena Isalele bamane kuluhuka mu buloba bua Ejipitu ngondo isatu, mu dituku adi mene bakafika mu tshihela tshia Sinai.

² Hakumukabo ku Lefidima ne hakafikabo ku tshihela tshia Sinai, bakashikama mu tshihela, Bena Isalele bakashimika ntenta ku mpala kua mukuna.

³ Mose wakabanda ha mukuna kudi Nzambi, ne Yehowa wakamubikila mu mukuna, wakamba ne, Wewe newambile ba mu nsubu wa Yakoba nunku, neumanyishe Bena Isalele ne, Yehowa udi wamba ne,

⁴ Nuenu nuakutangila malu anakenzela Bena Ejipitu, ne bu munakanutuala ha mahuahua a nyunyu wa mukanku, bu munakalua nʼenu kundi meme.

⁵ Binuatumikila dî dianyi, ne binuanemeka tshihungidi tshianyi, nuenu nenuikale bantu banyi ba munkatshi mua bantu bonso, bualu bua buloba buonso mbuanyi.

⁶ Nuenu nenuikale kundi bu bukelenge bua bakuidi, bu tshisamba tshia tshijila. Â mei audi mua kuambila Bena Isalele.

⁷ Mose wakalua, wakabikila bakulu ba bantu, wakabamanyisha mei onso akamuambila Yehowa.

⁸ Bantu bonso bakamba hohamue ne, Netuenze mei onso akutuambila Yehowa Mose wakambila Yehowa mei akamba bantu.

⁹ Yehowa wakambila Mose ne, Mona, ndi mulue kudi mu ditutu difike, bua bantu bunvue hanayikila nʼebe, bobo bitabushe di diebe tshiendelele. Mose wakamanyisha Yehowa mei a bantu.

¹⁰ Yehowa wakambila Mose ne, Ya biebe kudi bantu, ubajidike lelu ne makelela, bobo bauvu-we bilulu biabo,

¹¹ badilongolole ku dituku disatu, bualu bua Yehowa neahueke ha mukuna wa Sinai ku mesu kua bantu dituku disatu.

¹² Wewe ujidike nshila ya ku mukuna, wambile bantu ne, Nudimuke, kanuyi ku mukuna, kanûlengi tshianza, muntu udi ulenga mukuna tshianza nebamushihe.

¹³ Muntu kamulengi tshianza nansha, kadi nebamushihe ne mabue anyi nebamutahe ne difuma, bikaleye nyama anyi muntu, yeye kena wikala ne muoyo Helabo mpungi musangu mule, bantu nebalue ku mukuna.

¹⁴ Mose wakumuka ku mukuna, wakahueka kudi bantu, wakabidika bantu ne bobo bakuvuwa bilulu biabo.

¹⁵ Yeye wakambila bantu ne, Nudilongolole ku dituku disatu, kanuyi ha buihi ne bakashi nansha.

¹⁶ Hakalua dituku disatu ne dinda, makubakuba ne miele ya nvula ne difutu difike biakadi ha mukuna, ne di dia mpungi diakatamba bukole, bantu bonso bakadi mu tshitudilu bakazakala.

¹⁷ Mose wakaluhuka mu tshitudilu ne bantu bua kusangakena ne Nzambi, bobo bakimana kuinshi kua mukuna.

¹⁸ Mukuna wa Sinai wonso wakadi ne muishi, bualu bua Yehowa wakahueka ha mutu hau mu kahia, muishi wakabanda bu muishi wa tshikutu, mukuna wonso wakakanka bikole.

¹⁹ Hakakola dî dia mpungi bikole bikole, Mose wakela dî ne Nzambi wakitaba kudiye ne dî diandi.

²⁰ Yehowa wakahueka mu diulu, wakalua ha mutu ha mukuna wa Sinai. Yehowa wakabikila Mose ku mutu kua mukuna, ne Mose wakabanda.

²¹ Yehowa wakambila Mose ne, Uhueke biebe, udimushe bantu, kabalu ha buihi bua kumona Yehowa, bungi buabo nebafue.

²² Bakuidi bonso badi balue hehi ne Yehowa badijidile, bua Yehowa kabashihi.

²³ Mose wakambila Yehowa ne, Bantu kabena mua kulua ku mukuna wa Sinai bualu bua wewe wakamba ne, Ujidike mukuna, ûjidile

²⁴ Yehowa wakamuambila ne, Ya, hueka biebe, wewe neuhingane, wewe ne Alona kadi bakuidi ne bantu kabalu ha buihi nansha, bua Yehowa kabashihi.

²⁵ Nunku Mose wakahueka kudi bantu, wakabamanyisha.