Ekesode 18 - Mukanda wa Nzambi Dihungila Dikulukulu ne Dihungila Dihia-dihia 2003

Yetelo Udi Usomba ne Mose

¹ Yetelo, mubuki wa Midiyana, tatu-muenu wa Mose, wakunvua malu onso akenzela Nzambi Mose ne Bena Isalele, bantu bandi, ne muakalua Yehowa ne Bena Isalele mu Ejipitu.

² Yetelo, tatu-muenu wa Mose, wakangata Sipola, mukashi wa Mose, hakadiye mumutume,

³ ne bana bandi balume babidi, dina dia mukuabo ne, Geshoma, bualu bua Mose wakamba ne, Nakadi muenyi mu buloba bua bende.

⁴ Dina dia mukuabo ne, Eliezê, bualu bua Mose wakamba ne, Nzambi wa tatuʼanyi wakadi mukuatshishi wanyi, wakansungila ku muele wa nvita wa Palô.

⁵ Yetelo, tatu-muenu wa Mose, wakalua ne bana bandi balume ne mukashi wandi kudi Mose mu tshihela hakadiye ushikama ku mukuna wa Nzambi.

⁶ Yeye wakambila Mose ne, Meme tatuʼebe-muenu, Yetelo, nakukuluila ne mukashi webe ne bana bandi ba balume babidi.

⁷ Mose wakaya kusangakena ne tatuʼandi-muenu, wakamukukuila, wakatuangana nʼandi mishiku, bakakonkangana bua malu abo, bakabuela mu ntenta.

⁸ Mose wakambila tatuʼandi-muenu malu onso akenzela Yehowa Palô ne Bena Ejipitu bualu bua Bena Isalele, ne bua makenga akabakuata mu nshila, ne muakabasungila Yehowa.

⁹ Yetelo wakasanka bua malu mimpe onso akenzela Yehowa Bena Isalele, bualu bua yeye wakabasungila mu bianza bia Bena Ejipitu.

¹⁰ Yetelo wakamba ne, Yehowa avudishibue disanka, wakanusungila mu bianza bia Bena Ejipitu ne mu bianza bia Palô, wakahatula bantu mu bianza bia Bena Ejipitu.

¹¹ Katataka ndi mumanye ne, Yehowa udi utamba nzambi yonso buene, bualu bua wakahatula bantu mu bianza bia Bena Ejipitu hakabaleshabo dikamakama.

¹² Yetelo, tatu-muenu wa Mose, wakoshila Nzambi nyama ya mulambu, ne Alona ne bakulu ba Bena Isalele bakalua kudia bidia ne tatu-muenu wa Mose ku mesu kua Nzambi.

Badi Basungula Balumbuluishi

¹³ Hakatshiabu, bakashikama Mose bua kulumbuluila bantu bilumbu, bantu bakimana ku mpala kua Mose dinda tô ne ku dilolo.

¹⁴ Hakatangila tatu-muenu wa Mose malu onso akenzeleye bantu, yeye wakamba ne, Wewe udi wenzela bantu tshinyi? Udi ushikama nkayebe ne bantu bimana ku mpala kuebe dinda tô ne ku dilolo munyi?

¹⁵ Mose wakambila tatuʼandi-muenu ne, Bualu bua bantu badi balue kundi bua kuebesha Nzambi malu.

¹⁶ Bikalabo ne tshilumbu, badi balue kundi, ne meme ndi ndumbulula hankatshi ha muntu ne mmena mutumba nʼandi, ndi mbamanyisha mei a Nzambi ne mikenji yandi.

¹⁷ Tatu-muenu wa Mose wakamuambila ne, Bualu ebu bûdi wenza kambuimpe.

¹⁸ Wewe neuhange bulelela, ne wewe ne bantu badi nʼebe bujitu bua bualu ebu budi bukutamba bukôle, wewe nkayebe kuena mua kubuenza.

¹⁹ Unvua dî dianyi, nenkuhe lungenyi, ne Nzambi neikale nʼebe, wewe wikale muakuidi wa bantu kudi Nzambi, Ulue biebe ne malu onso kudi Nzambi.

²⁰ Neubamanyishe mei a Nzambi ne mikenji, neubaleshe nshila udibo ne bua kuendamu, ne mudimu udibo ne bua kuenza.

²¹ Bualu bukuabo, usungule munkatshi mua bantu bonso balume badi ne lungenyi lule, badi batshina Nzambi, bena bulelela, badi bakina mbueshilu, ubateke ku mutu kua bantu bu bakokeshi ba bantu tshinunu ne ba bantu lukama ne ba bantu makumi atanu ne ba bantu dikumi.

²² Bobo nebalumbuluile bantu bilumbu matuku onso bobo nebalue kûdi ne bilumbu binene, kadi bobo nebakose bilumbu bikese; nunku badi mua kukumatshisha.

²³ Biwenza nunku, ne Bikala Nzambi numuambile dî diandi nunku, wewe neumanye mua kuikala ne bukole ne bantu nebaye ku miaba yabo talalâ.

²⁴ Mose wakitabusha di dia tatuʼandi-muenu, wakenza mei onso akambeye.

²⁵ Mose wakasungula balume ba lungenyi lule ba munkatshi mua Bena Isalele, wakabateka bakokeshi ha mutu ha bantu, bakokeshi ba bantu tshinunu ne ba bantu lukama ne ba bantu makumi atanu ne ba bantu dikumi.

²⁶ Bobo bakalumbuluila bantu bilumbu matuku onso, bakalua ne bilumbu bikole kudi Mose, ne bobo bakakosa bilumbu bikese.

²⁷ Mose wakitabusha bua tatuʼandi-muenu ahingane, yeye wakaya mu nshila wa ku buloba buandi.