Ekesode 16 - Mukanda wa Nzambi Dihungila Dikulukulu ne Dihungila Dihia-dihia 2003

Nzambi Udi Ubaka Mona

¹ Bakabika mu Elima ne Bena Isalele bonso, bakalua mu tshihela, dina diatshi Sina, hankatshi ha Elima ne Sinai. Bakafika nunku dituku dia dikumi ne ditanu dia ngondo muibidi hakumukabo mu buloba bua Ejipitu.

² Bena Isalele buonso buabo bakajiana Mose ne Alona mu tshihela.

³ Bena Isalele bakabambila ne, Biakadi bimpe bua tuetu kufua mu Ejipitu ku tshianza tshia Yehowa hatuakashikama hadi bivuadi bia munyinyi ne hatuakukutshika mafu ne bidia, kadi nuenu nuakuluila nʼetu mu tshihela etshi bualu bua kushiha tshisumbu etshi tshionso ne nzala.

⁴ Yehowa wakambila Mose ne, Mona, nennulokeshile bidia bia mu diulu, bantu nebaye, nebabisangishe ku dituku bikumbane ku dituku bikumbane. Nembatete ne badi benda mu di dianyi, anyi?

⁵ Mu dituku disambombo nebalongolole bidibo bangate, bikale tshituha ha mutu ha tshituha tshidibo basangisha ku dituku ku dituku.

⁶ Mose ne Alona bakambila Bena Isalele bonso ne, Dilolo nenumanye ne, Yehowa wakunuluhula mu buloba bua Ejipitu,

⁷ ne dinda nenumone butumbi bua Yehowa, bualu bua Yehowa udi munvue munudi numujiana, tuetu tudi banganga bua nudi nutujiana?

⁸ Mose wakamba ne, Halua Yehowa kunuha munyinyi dilolo ne kunukutshisha bidia ne dinda, bualu bua Yehowa udi munvue bu munudi numujiana, tuetu tudi banganyi? Kanuena nutujiana, nudi nujiana Yehowa.

⁹ Mose wakambila Alona ne, Ambila tshisumbu tshionso tshia Bena Isalele ne, Luai ha buihi ku mpala kua Yehowa, bualu bua yeye wakunvua tshitanu tshienu.

¹⁰ Hakadi Alona wambila tshisumbu tshionso tshia Bena Isalele nunku, bakatangila ku tshihela, ne monai, butumbi bua Yehowa buakamueneka mu ditutu.

¹¹ Yehowa wakambila Mose ne,

¹² Nakunvua tshitanu tshia Bena Isalele, ubambile ne, Dilolo nenudie munyinyi, dinda nenukute bidia, nuenu nenumanye ne, Meme ndi bianyi Yehowa, Nzambi wenu.

¹³ Hakalua dilolo nkuadi yakalua, yakabuikila tshitudilu, dinda dime diakadi dinyunguluka tshitudilu.

¹⁴ Kakahanda dime diakadi hanshi, monai, tshintu tshikese tshibulunge tshiakadi ha tshihela, tshiakadi tshikese bu dime dikuatakane ha buloba.

¹⁵ Hakatshimonabo, Bena Isalele bakakemangana ne, Etshi ntshinyi? bua bobo kabakatshumanya Mose wakabambila ne, Tshidi bidia biakunuha Yehowa bua kudia.

¹⁶ Tshidi tshintu tshiakunuambila Yehowa ne, Muntu ne muntu adisangishilebi mudiye mua kudia, tshihiminu ku muntu ne muntu, muntu ne muntu adisangishilebi bu bungi bua bantu ba mu ntenta wandi.

¹⁷ Bena Isalele bakenza nunku, bakuabo bakasangisha bia bungi, bakuabo bakasangisha bikese.

¹⁸ Hakabidikishabo ne tshihiminu, muntu wakadi usangisha bia bungi bintu kabiakashala kudiye, ne muntu wakadi usangisha bikese kakadi ne nzala, muntu ne muntu wakadisangishilabi bu muakamanyeye mudiadieye.

¹⁹ Mose wakabambila ne, Muntu kabishiyi tô ne dinda.

²⁰ Kadi bobo kabakitabusha dî dia Mose, bakuabo bakabishiya tô ne ku dinda, bishi biakabuelamu, bidia biakanunka muhuya mubi, Mose wakadi nʼabo tshiji.

²¹ Bakabisangisha buatshia-buatshia, muntu ne muntu bu muakamanyeye mudiadieye, ne hakatema munya, bidia biakenguluka.

²² Hakalua dituku disambombo, bakasangisha bituha bibidi, bihiminu bibidi ku muntu ne ku muntu, ne bakulu ba munkatshi muabo Bakalua, bakamanyisha Mose.

²³ Yeye wakabambila ne, Edi ndî diakuamba Yehowa ne, Makelela udi dituku dia kuikisha dia tshijila, dituku diakadijidila Yehowa nulambe bidia ne munyinyi binudi basue, ne bintu bionso bidi bishala, nubitekele bua kudia makelela.

²⁴ Bakalekela bidia tô ne ku dinda bu muakamba Mose, ne bidia kabiakabola, ne bishi kabiakabuelamu.

²⁵ Mose wakamba ne, Nudie bintu ebi lelu, bualu bua edi ndituku diakadijidila Yehowa, kanuena nubisangana mu mpata lelu.

²⁶ Nudisangishe matuku asambombo, kadi dituku dia muanda mutekete didi dijidila, kabiena bikalaku dituku adi.

²⁷ Hakalua dituku dia muanda mutekete, bakuabo bakaya kusangisha bidia, kadi kabakabisangana.

²⁸ Yehowa wakambila Mose ne, Nenuhidie kutumikila mikenji ne mei anyi musangu bule munyi?

²⁹ Monai, Yehowa wakunuha dituku dijidila, nunku yeye wakunuha bidia bia matuku abidi ku dituku disambombo, muntu ne muntu ashale mu muaba wandi, kaluhuki mu muaba wandi dituku dia muanda mutekete.

³⁰ Nunku bantu bakikisha dituku dia muanda mutekete.

³¹ Bena Isalele bakabikila bidia abi ne, Mana Tshiakadi tshintu tshitoke tô bu ntete ya conandre, tshiakadi tshintu tshia kutua kuimpe bu mikata mienza ne bintshi.

³² Mose wakamba ne, Etshi ntshintu tshiakuamba Yehowa ne, Nushale ne tshihiminu tshia bintu ebi tô ne ku bikondo bienu bionso, bua nuenu numone bidia binakanudisha nʼabi mu tshihela, hanakanuhatula mu buloba bua Ejipitu.

³³ Mose wakambila Alona ne, Angata tshivuadi, tekamu tshihiminu tshia bidia abi tente, ubiteke ku mesu kua Yehowa, nushale nʼabi tô ne ku bikondo bienu bionso.

³⁴ Alona wakabiteka ku mpala kua Mushete wa Yehowa bu muakambila Yehowa Mose.

³⁵ Bena Isalele bakadia bidia abi tô bidimu makumi anai, tô ne hakaluabo mu buloba muakadi bantu, baka dia bidia abi tô ne hakaluabo ku matshika a buloba bua Kanâna.

³⁶ Tshihiminu etshi tshidi bu tshia dikumi tshia épha.