Ekesode 1 - Mukanda wa Nzambi Dihungila Dikulukulu ne Dihungila Dihia-dihia 2003

Dikengeshibua dia Bena Isalele mu Ejipitu

¹ Â mmena a bana balume ba Isalele bakalua mu Ejipitu, muntu ne muntu ne ba mu nsubu wandi bakalua ne Yakoba.

² Lubena, Shimeona, Lewi ne Yuda,

³ Yisakâ, Zebuluna ne Benyamina,

⁴ Dana ne Nafatale, Gada ne Ashe

⁵ Bantu bonso ba munda mua Yakoba bakadi makumi muanda mutekete, Yosefe wakadi mu Ejipitu diambedi

⁶ Yosefe wakafua ne bana babo bonso, ne bantu bonso ba mulongo au

⁷ Bena Isalele bakakumbana ba bungi, bakavulangana, bakalua bakole be, bakula mu buloba tente.

⁸ Mukelenge muhia muhia wakahingana mu bukelenge bua Ejipitu, wakadi kayi mumanye Yosefe.

⁹ Yeye wakambila bantu bandi ne, Tangilai, Bena Isalele badi batuhita bungi ne bukole.

¹⁰ Tuye kuenza budimuke, kabalu ba bungi, halua nvita, kabayi kudi bantu badi nʼetu lukuna bua kuhingana nʼetu nvita, kabumuki mu buloba buetu.

¹¹ Bakabatekela tuhita, bakabakengesha ne mudimu. Bakashala Palô misoko ya kutekelamu bintu biandi, mena ai Pitoma ne Lamesese.

¹² Hakabakengeshabo nunku, Bena Isalele bakakumbana ba bungi, bakatangadika Mitshima ya Bena Ejipitu yakanyingalala bualu bua Bena Isalele.

¹³ Bena Ejipitu bakenzesha Bena Isalele mudimu bikole.

¹⁴ Bakabakengesha ne mudimu mukole, mudimu wa tushola ne buloba busoha ne midimu yonso ya mu madimi. Bakabenzesha mudimu mukole.

¹⁵ Mukelenge wa Ejipitu wakambila baleleshi ba bakashi ba Bena Ebelu, dina dia umue wabo ne, Shifela, ne dina dia mukuabo ne, Pua ne,

¹⁶ Hanuaya kuenzela bakashi ba Bena Ebelu mudimu wa baleleshi, ne hanuabatangila mu buledi, bialelabo muana wa balume, nuenu nenumushihe, kadi bialelabo muana wa bakashi, numushiye ne muoyo.

¹⁷ Kadi baleleshi bakatshina Nzambi, kabakenza muakabambila mukelenge wa Ejipitu, kadi bakasungila bana balume.

¹⁸ Mukelenge wa Ejipitu Wakabikila baleleshi, wakabambila ne, Bualu kai nuakuenza nunku, nuakusungila bana ba balume?

¹⁹ Baleleshi bakambila Palo ne, Bualu bua bakashi ba Bena Ebelu kabena bu bakashi ba Bena Ejipitu bobo badi ne bukole bua kudilelela, ne bakamana kulela diambedi baleleshi kabayi banze kulua kudibo.

²⁰ Nzambi wakenzela baleleshi bimpe, bantu bakakumbana ba bungi, bakalua bakole be,

²¹ Bualu bua baleleshi bakatshina Nzambi, yeye wakabaha bana.

²² Palo wakelela bantu bandi bonso mukenji ne, Bialelabo muana mulume, nenumuele mu musulu, kadi nensungile bana bakashi.