Dielulula 9 - Mukanda wa Nzambi Dihungila Dikulukulu ne Dihungila Dihia-dihia 2003

Yehowa Neabuele Bisamba bia Bena Kanâna

¹ Unvuai, Isalele, nenusabuke Yadene lelu, bualu bua kuihata bisamba bidi binuhita bunene ne bukole, ne misoko minene idi ne mpangu mile idi mihite mulu,

² bantu banene badi bale, bana balume ba Anaka, banudi bamanye; nuakulua lumu luabo ne, Nganyi udi mua kuimana ku mpala kua bana balume ba Anaka?

³ Numanye bienu lelu ne, Yehowa, Nzambi wenu, udi uya ku mpala kuenu udi bu kahia kadi kabutula bionso; yeye nembashihe, neabahoneshe ku mpala kuenu: nunku nenubihate, nembajimishe lubilu, bu muakanuambila Yehowa.

⁴ Hashikisha Yehowa kubihata, kanuambi mu mitshima yenu ne, Mbualu bua buakane buetu, Yehowa wakaluamu nʼetu bua kuhiana buloba ebu: bualu bua Yehowa udi ubihata ku mpala kuenu bualu bua bubi buabo.

⁵ Kanuena nuhiana buloba buabo bualu bua buakane buenu anyi bua dijalama dia mitshima yenu: kadi Yehowa, Nzambi wenu, udi ubihata ku mpala kuenu bualu bua bubi buabo; bualu bua kuakasha nʼenu dî diakalaya Yehowa kudi batatu benu, Abalahama ne Isaka ne Yakoba.

Bena Isalele Badi Batombokela Yehowa ku Holeba

⁶ Numanye bienu ne, Yehowa kena munuhe buloba ebu buimpe bu buhianyi bualu bua buakane buenu; bualu bua nudi bantu ba tshitshu.

⁷ Vulukai, kanuhu muoyo bu munuakafuisha Yehowa, Nzambi wenu, tshiji mu tshihela; ku dituku dinuakahatuka mu buloba bua Ejipitu tô ne hanuakafika ku muaba eu, nuakahidia Yehowa.

⁸ Mu Holeba nuakafuisha Yehowa tshiji kabidi ne Yehowa wakadi nʼenu tshiji, wakamba kunushiha.

⁹ Hanakabanda ku mukuna bua kuangata mabue akadi ne mei a tshihungidi tshia Yehowa mafundahu, nakashala ku mukuna matuku makumi anai munya ne butuku; tshiakadia bidia, tshiakanua mai.

¹⁰ Yehowa wakumpa mabue au abidi akadi mafunda ne munu wa Nzambi; akadi mafundahu mei onso akanuambila Yehowa ku mukuna munkatshi mua kahia mu dituku dia disangisha dietu.

¹¹ Hakaleha matuku makumi anai, Yehowa wakampa mabue au abidi akadi malundahu mei a tshihungidi.

¹² Yehowa wakangambila ne, Bika biebe, uhueke lubilu bualu bua bantu bebe bawakahatula mu Ejipitu, bakoneka, bakasesuka lubilu mu nshila unakabalesha; bakadienzela luhingu ne biamu biakatulabo.

¹³ Yehowa wakangambila kabidi ne, Nakatangila bantu aba ne mona, badi bantu ba tshitshu;

¹⁴ undekele, bua meme neashihe, nenjimishe dina diabo muinshi mua diulu; meme nenkuvuishe wewe tshisamba tshidi tshibahita bunene ne bukole.

¹⁵ Nunku nakanyunguluka, nakahueka mu tshibanda, ne mukuna wakadi utema ne kahia; ne mabue abidi a mei a tshihungidi akadi mu bianza bianyi bibidi.

¹⁶ Nakatangila ne monai, nuakenzela Yehowa, Nzambi wenu, bubi; nuakadienzela kana ka ngombe ne biamu biakatulabo; nuakadi nusesuka lubilu mu nshila wakanulesha Yehowa.

¹⁷ Nakangata mabue au abidi akadi mu bianza bianyi, nakashiha ku mesu kuenu.

¹⁸ Nakadikuma hanshi ku mpala kua Yehowa matuku makumi anai bu munakenza diambedi, tshiakadia bidia, tshiakanua mai, bualu bua mibi yenu muakenza, hanuakenza bualu ebu bubi ku mesu kua Yehowa bua kumufuisha tshiji.

¹⁹ Bualu bua nakutshina difikʼa munda ne tshiji tshikole biakadi Yehowa nʼabi bua kunushiha. Kadi Yehowa wakangunvuila musangu eu kabidi.

²⁰ Yehowa wakadi ne Alona tshiji tshikole bua kumushiha; nakalombela Alona musangu eu kabidi.

²¹ Nakangata bualu bubi bunuakenza, kana ka ngombe mene, nakakosha ne kahia, nakakadiata munda mua dikasa, nakakabotesha bu dinfuenkenya dia buloba: nakela dinfuenkenya diaku mu kasulu kakadi kafuma ku mukuna.

²² Ku Tabela ne Masa ne Kibelota-hatawa nuakafuisha Yehowa tshiji.

²³ Hakanumusha Yehowa ku Kadeshe-bânea ne, Yai bienu, nuhiane buloba bunakanuha; hashishe nuakahidia dî dia Yehowa, Nzambi wenu, kanuakamuitabusha, kanuakunvua di diandi.

²⁴ Nuenu nutu nuahidia Yehowa katshia ku dituku dinakanumanya.

²⁵ Nunku nakadikuma hanshi ku mpala kua Yehowa matuku makumi anai, bualu bua Yehowa wakamba ne, Nembashihe.

²⁶ Nakatendelela Yehowa, nakamba ne, Mukelenge Yehowa, kushihi bantu bebe ne buhianyi buebe buwakahikula ne bukole buebe, bantu bawakahatula mu Ejipitu ne tshianza tshikole.

²⁷ Uvuluke bantu bebe, Abalahama ne Isaka ne Yakoba; kutangidi tshitshu tshia bantu aba anyi buhidia buabo anyi mibi yabo,

²⁸ bua bena buloba buwakatuhatula kabambi ne, Bualu bua Yehowa kakadi ne bukole bua kulua nʼabo mu buloba buakahaneye ne bualu bua yeye wakadi nʼabo tshiji, yeye wakalua nʼabo mu tshihela bua kubashiha.

²⁹ Bobo batshidi bantu bebe ne buhianyi buebe, bawakahatula ne bukole buebe bunene ne diboko diebe diolola.